Ubushakashatsi bushya bwakozwe na Lifeway Research bwagaragaje ikintu gikomeye gikwiye gutuma amatorero atekereza ku buryo apima iterambere ryayo, adashingiye ku kuba insengero zuzura abantu.
Raporo yasohotse ku wa Kabiri tariki ya 1 Nzeri 2026, ishingiye ku bushakashatsi bwakorewe ku bapasiteri b’Abaprotestanti 1,003 muri Leta Zunze Ubumwe za Amerika, yagaragaje ko 54% by’abapasiteri bavuze ko umubare w’abitabira amateraniro wazamutse nibura 4% ugereranyije na 2023.
Ku mpuzandengo, abapasiteri bavuze ko amateraniro yabo yazamutseho hafi 16% kuva mu 2023. Ariko inyuma y’iyi mibare myiza, hari ikindi kibazo gikomeye. Lifeway yasanze umubare w’amatorero avuga ko nta bantu bashya biyemeje gukurikira Kristo, wazamutse ukava kuri 6% mu 2016 ukagera kuri 9% mu 2025.
Ikindi gitangaje ni uko mu 2016, ku bantu 100 bitabiraga amateraniro, impuzandengo y’abavugwaga ko biyemeje gukurikira Kristo yari 16. Mu 2025, uwo mubare wari waramanutse ugera kuri 11 ku bantu 100.
Scott McConnell, Umuyobozi Mukuru wa Lifeway Research, yavuze ko iyi mibare itahita isobanura ko ubutumwa bwiza bwa Yesu burimo kubwirizwa gake kurusha mbere, ahubwo igaragaza ko abantu bake ari bo barimo kwakira ubutumwa bwa Kristo.
Yagize ati: “Iyi mibare ntabwo ihita isobanura ko Ubutumwa Bwiza burimo gusangizwa abantu gake kurusha uko byari bimeze mu myaka icumi ishize, ariko igaragaza ko abantu bake ari bo barimo kwitabira ubutumwa bwiza bwa Kristo.”
McConnell yasabye amatorero gukomeza gusengera agakiza k’abantu bo mu baturage bayo no kongera imbaraga mu guhugura no gukangurira abakristo gusangiza abandi ubutumwa bwiza.
Ese kuzura k’urusengero ni ko gukura kw’itorero? Iki ni ikibazo gikomeye cyane. Ni byiza ko abantu baza mu rusengero. Ni byiza ko amateraniro yuzura. Ni byiza ko abantu bashaka kumva ijambo ry’Imana. Ariko umubare w’abicaye ku ntebe z’urusengero si wo wonyine upima umurimo w’Imana.
Yesu ntiyigeze avuga ko ubutumwa bwe bugomba gupimirwa ku mubare w’abantu bateraniye ahantu hamwe gusa. Yaravuze ati: “Nimugende muhindure abantu bo mu mahanga yose abigishwa.” — Matayo 28:19. Iri jambo rituma umuntu yibaza niba hari itandukaniro hagati yo kuzana abantu mu rusengero no kubagira abigishwa ba Kristo.
Umuntu ashobora kuba amaze imyaka icumi ajya mu rusengero, akamenya indirimbo zose, akamenya amagambo menshi ya Bibiliya, ariko ubuzima bwe ntibuhinduke. Ashobora no kujya mu rusengero buri cyumweru, ariko ntabe yarigeze yihana ibyaha bye, ngo ahindukire Kristo, ngo atangire kubaho ubuzima bushya.
Ni yo mpamvu Pawulo avuga mu 2 Abakorinto 5:17 ati: “Umuntu wese iyo ari muri Kristo aba ari icyaremwe gishya.”
Ikibazo gikwiye kurenga ku mibare. Amatorero ashobora kwishimira ko abantu 1,000, 5,000 cyangwa 10,000 bateraniye mu materaniro. Ariko ikibazo gikomeye kurushaho ni iki: Muri abo bantu, ni bangahe bahinduriwe ubuzima? Ni bangahe baretse ubusinzi, ubusambanyi, inzangano, uburiganya n’ubwibone?
Ni bangahe batangiye kubabarira abandi? Ni bangahe batangiye gukunda Imana no kuyumvira mu buzima bwabo bwa buri munsi? Ni bangahe bavuye mu rusengero bakajya guhindura imiryango yabo, aho bakorera n’abaturanyi babo?
Kuko itorero ryuzuye abantu ariko ridahindura abantu rishobora kuba rifite umubare munini, ariko rikabura umusaruro w’Umwuka. Yesu ubwe yavuze ko: “Muzabamenyera ku mbuto zabo.” — Matayo 7:16.
Kuzura k’urusengero ni ikintu gishimishije, ariko ntigikwiriye kuba iherezo ry’umurimo. Intego ikomeye kurushaho ni uko umuntu winjiye mu rusengero ahinduka, akakira Kristo, akihana, akagira ubuzima bushya kandi akagera n’aho na we ahindura abandi.
Ubushakashatsi bwa Lifeway butanga isomo rikomeye: ushobora kugira abantu benshi baza mu rusengero, ariko ibyo ntibisobanuye ko hari abantu benshi barimo kuza kuri Kristo.
Ni yo mpamvu amatorero adakwiye kubaza gusa ati: “Abantu bacu ni benshi bingana iki?” Ahubwo hakwiriye no kubazwa ngo: “Abantu bacu bahinduka ku rugero rungana iki?” Kuko ku munsi w’imperuka, Imana ntizareba uko urusengero rwari rwuzuye gusa, ahubwo izareba n’imbuto ubuzima bw’abantu bwatanze.
