Iki giterane kigamije gufasha abakobwa n’abagore kumenya neza abo bari bo muri Kristo no kubaho ubuzima bwuzuye nubwo bahura n’igitutu cy’isi. Iki giterane cyiswe “Special Saturday for Ladies” kizaba ku wa 25 Mata 2026, ku rusengero rwa ERC Kimisagara.

Iki gikorwa cyitezweho guhuriza hamwe abakobwa n’abagore b’ingeri zitandukanye, aho bazigishwa ku nsanganyamatsiko igira iti: “Becoming a Whole Girl: Living a Full Life by Knowing My Identity in Christ in a World Full of Pressure,” ari byo “Kuba umukobwa wuzuye: Kubaho ubuzima busesuye uzi uwo uri we muri Kristo mu isi yuzuye igitutu.”

Mu nyigisho ziteganyijwe, hazibandwa ku kumenya neza agaciro n’icyubahiro umukobwa afite muri Kristo, no kubaka imico myiza (character) ishingiye kuri uwo mwirondoro.

Abazaba bitabiriye bazasobanurirwa uburyo bwo kwirinda kuyoborwa n’imyumvire ya sosiyete (social norms) ishobora kubatesha umurongo, ahubwo bagashingira ku kuri kw’Ijambo ry’Imana.

Hazaganirwa kandi ku kubaho ubuzima bwuzuye mu buryo bwose, haba mu mwuka, mu mitekerereze no mu mubiri, ibizafasha umukobwa kwigirira icyizere no gufata ibyemezo bifite ireme mu buzima bwe bwa buri munsi.

Iki giterane kizitabirwa n’abavugabutumwa batandukanye barimo Pastor Concilie Mukasoni, umuhanzi w’indirimbo zo kuramya no guhimbaza Imana Rachel Uwineza, ndetse na Pastor Alice Uwera, bose bakaba bazatanga inyigisho n’ubuhamya bigamije kubaka no gukomeza abakobwa.

Abateguye iki giterane batangaje ko ari amahirwe akomeye ku bakobwa n’abagore bose bashaka gukura mu mwuka no kumenya agaciro kabo nyakuri. Igikorwa kizatangira saa munani z’amanywa (14h00) kugeza saa kumi n’ebyiri n’igice z’umugoroba (18h30), kikazabera ku cyicaro cya ERC Kimisagara.

Abazitabira basabwe kuzitabira bambaye imyenda ifite ibara rimwe cyangwa white top na blue jeans, kandi hazanatangirwa utuntu two gufungura tworoheje.

ERC Kimisagara yateguye igiterane kidasanzwe cy’abakobwa, ku nsanganyamatsiko bise Kuba Umukobwa Wuzuye