Raporo ya World Watch List 2026 yasohowe n’umuryango Open Doors igaragaza ko Abakirisitu bakomeje guhura n’itotezwa rikabije mu bihugu bitandukanye ku isi, aho bamwe bafungwa, bagakubitwa, bakicwa cyangwa bagahunga iwabo bazira ukwemera kwabo. Iyi raporo yerekana ko nubwo ubuzima bwabo buri mu kaga, hari aho ukwizera gukomeje gukura mu buryo butangaje.

Mu bihugu icumi bya mbere aho Abakirisitu batotezwa cyane harimo Koreya ya Ruguru iza ku isonga, aho kuba Umukirisitu bifatwa nk’icyaha gikomeye. Ikurikirwa na Somaliya, Afuganisitani, u Bushinwa, Iraki, Misiri, Irani, Yemeni, Sudani, Nigeria na Pakisitani. Muri ibi bihugu, Abakirisitu bahura n’igitutu cya leta, imitwe y’iterabwoba, cyangwa imiryango ibarwanya bitewe n’umuco n’imyemerere yiganje.

Raporo ivuga ko Abakirisitu barenga miliyoni 380 ku isi babayeho mu bihe bikomeye byo gutotezwa muri uyu mwaka wa 2026. By’umwihariko muri Nigeria, ni ho hakomeje kwibasirwa Abakirisitu benshi bicwa n’imitwe yitwaje intwaro, ibintu bikomeje guteza impungenge imiryango mpuzamahanga iharanira uburenganzira bwa muntu.

Nubwo bimeze bityo, Open Doors ivuga ko hari ibimenyetso by’akazi gakomeye k’Umwuka Wera muri ibi bihugu. Abakirisitu benshi bakomeje guhagarara bashikamye mu kwizera, bakabwiriza ubutumwa bwiza mu ibanga, abandi bakabona imbaraga zo kubabarira no gukomeza kubaho nubwo batotezwa.

Abayobozi ba Open Doors basaba Abakirisitu bo hirya no hino ku isi gukomeza gusengera abo bavandimwe babo, bakibuka ko gukurikira Kristo bifite igiciro, ariko kandi bikazana ibyiringiro n’ubugingo bushya ku bababaye.