Umukinnyi Jonathan Roumie, uzwi cyane mu gukina ari Yesu muri filime The Chosen, yavuze ko urugendo rwo gukina uwo mwanya rwamwigishije byinshi ku kwizera, ku ntambara zo mu mwuka no ku buntu bw’Imana.
Roumie yabivugiye mu gikorwa cyiswe ChosenCon 2026 cyabereye mu mujyi wa Charlotte hagati ya tariki ya 19 na 21 Gashyantare 2026, cyitabiriwe n’abakunzi ba filime The Chosen barenga ibihumbi bine n’igice.
Mu kiganiro yahaye itangazamakuru, Roumie yavuze ko gukina ari Yesu byabaye amahirwe akomeye kuri we, ndetse ko abikesha Imana. Yagize ati: “Icyo nshobora gukora ni uguha Imana icyubahiro, kuko ari yo yangiriye icyizere ikampa uru ruhare.”
Yavuze ko mu gihe bafataga amashusho ya Season ya 6 ya The Chosen, igaragaza ibyabaye mbere yo kubambwa kwa Yesu, bahuye n’ibibazo byinshi birimo umunaniro, ibibazo by’imirimo n’ibindi bibazo bitandukanye, ariko ko ibyo byose byatumye barushaho kwegera Imana mu masengesho.
Uwakoze iyi filime akaba anayiyobora, Dallas Jenkins, yavuze ko nubwo filime The Chosen yakunzwe cyane ku isi hose, ubuzima bwe n’umuryango we bwagiye buhura n’ibigeragezo bikomeye kuva yatangira kuyikora.
Jenkins yavuze ko kuva mu mwaka wa 2017 ubwo batangiraga gukora iyi filime, ubuzima bwe bwahise buhinduka cyane kuko ibibazo byagiye byiyongera kurusha mbere.
Yatanze urugero rw’ibibazo by’uburwayi mu muryango we, cyane cyane uburwayi bw’umugore we Amanda Jenkins, uherutse kubagwa inshuro ebyiri ku mabere (double mastectomy) mu rugamba rwo kuvura kanseri.
Yasobanuye ko ibi bibazo byose abifata nk’igice cy’icyo yise “intambara yo mu mwuka”, aho yemera ko iyo igikorwa kigamije kwamamaza ubutumwa bw’Imana kigenda kigira ingaruka nziza ku bantu benshi, hakabaho imbogamizi n’ibigeragezo bishobora kugerageza kugihagarika.
Jenkins yavuze ko ibyo bibazo bitigeze bituma acika intege, ahubwo byatumye we n’umuryango we barushaho kwegera Imana no kuyishingiraho. Yongeyeho ko rimwe na rimwe Imana ishobora kureka umuntu agahura n’ibibazo birenze ubushobozi bwe kugira ngo amenye ko akeneye kuyisaba ubufasha.
Yagize ati: hari igihe abantu bavuga ko “Imana itaguha ibirenze ibyo ushoboye,” ariko we yemeza ko hari igihe Imana ishobora kukureka ugahura n’ibirenze ubushobozi bwawe kugira ngo uyishingikirizeho uyisaba ubufasha.
Jenkins yavuze ko nubwo bahuye n’ibibazo bitandukanye, bizera ko Imana iri inyuma y’iyi filime kandi ko ikomeje gukoraho ku buzima bw’abantu benshi ku isi.
