Ku mugoroba w’uyu wa Gatatu ni bwo Perezida Kagame yakoze impinduka muri Guverinoma. Muri izo mpinduka harimo Francis Gatare wagizwe Umuyobozi Mukuru w’Urwego rw’Igihugu rushinzwe Iterambere (RDB), akaba yasimbuye Clare Akamanzi wari umaze imyaka myinshi kuri uyu mwanya.

Clare Akamanzi wari umaze imyaka 6 yikurikiranya ayobora RBD, yari yageze kur uwo mwanya asimbuye Francis Gatare. Francis Gatare yongeye kuyobora RDB nyuma y’uko yari Umujyanama Mukuru wa Perezida wa Repubulika mu by’Ubukungu guhera mu 2021. Bongeye gusimburana ku buyobozi bwa RDB.

Gen (Rtd) James Kabarebe yahawe inshingano nshya, aho yagizwe Umunyamabanga wa Leta ushinzwe Ubutwererane bw’Akarere muri Minisiteri y’Ububanyi n’Amahanga. Yasimbuye Prof. Nshuti Manasseh wagizwe Umujyanama Mukuru mu Biro bya Perezida wa Repubulika ushinzwe Imirimo yihariye.

Dr. Yvonne Umulisa wagizwe Umunyamabanga Uhoraho mu Biro bya Minisitiri w’Intebe, Alphonse Rukaburandekwe agirwa Umuyobozi Mukuru w’Ikigo Gishinzwe guteza imbere Imiturire mu Rwanda (Rwanda Housing Authority - RHA), naho Bonny Musefano agirwa Umujyanama wa mbere muri Ambasade y’u Rwanda i Tokyo.

Clare Akamanzi yongeye gusimburana na Francis Gatare mu kuyobora RDB

Perezida Kagame yakoze impinduka muri Guverinoma