Mu kiganiro Coach Gaël Karomba, umushoramari ukomeye mu Rwanda yagiranye na Muchoma, umuhanzi n’umukinnyi wa filime, yasobanuye ibintu Imana ishingiraho iha umuntu ubukire.
Karomba Gaël, uzwi cyane ku izina rya Coach Gaël, ni umwe mu bashoramari bakomeye mu Rwanda, wamenyekanye cyane mu myidagaduro, siporo, n’ubucuruzi. Yatangiye urugendo rwe rw’ubucuruzi nyuma yo kwiga ibaruramari mu Buhinde, aho yakuye impamyabumenyi y’icyiciro cya gatatu cya kaminuza. Icyo gihe, bivugwa ko yari umupasiteri.
Mu myaka yashize, Coach Gaël yashinze inzu itunganya umuziki ya 1:55 AM, ikaba yarafashije abahanzi batandukanye. Yashoye imari mu bikorwa bitandukanye birimo n’ubwubatsi bw’inyubako y’imyidagaduro yitwa Kigali Universe, iherereye hejuru y’inyubako ya CHIC mu mujyi wa Kigali, ikaba yaragutse ku buso bwa metero kare 6000, ifite agaciro ka miliyoni $1.5.
Mu kiganiro yagiranye na Nizeyimana Didier wamenyekanye ku izina ry’ubuhanzi nka Muchoma, Young Billionaire, Kabwera n’andi mazina anyuranye, Coach Gaël yatanze inama z’uburyo bwo kugera ku bukire, avuga ko igishoro cya mbere ari ukubaha abantu bose no gushaka ubumenyi. Mu gusubiza ikibazo Muchomawe yamubajije ("Ndi umukene, kandi nshaka kuba umukire nibura nkagera ku rwego rwawe. Nakora iki?”)
Coach Gael wahoze ari n’umuvugabutumwa, yagize ati: "Igishoro cya mbere cy’ubukire ni ibintu bibiri: kubaha abantu bose (kugira umutima uciye bugufi) n’ubumenyi. Wikwicara hamwe, shaka ubumenyi. Hari amasomo wakwiga, imyuga n’ibindi. Niba udafite amafaranga, shaka ubumenyi. Niba ufite ubumenyi, shaka amafaranga."
Yakomeje yemeza ko kugira ubumenyi n’ubunyangamugayo ari inkingi z’iterambere, kandi ko Imana ihemba abaharanira kugera ku nzozi zabo. Yagize ati: "Mu ijuru hari Imana ikomeye, n’abatemera Imana hari na herumos, uzisanga hari amahirwe izaguha. Kugira ubumenyi n’ubunyangamugayo ni ibintu byaguteza imbere."
Uyu mushoramari w’inararibonye yagiye anashora imari mu mikino, aho yagaragaje ubushake bwo kugura ikipe ya Basketball, ndetse anashora imari mu ikipe ya United Generation Basketball (UGB).
Herumos: Ijambo "herumos" ryavuzwe na Coach Gaël rishobora kuba ryerekeza kuri "hermos", ijambo rikoreshwa mu myemerere imwe n’imwe, ariko bisaba ko risobanurwa mu buryo bwimbitse bitewe n’aho ryakoreshejwe.
Coach Gaël na Muchoma
Muchoma yagiriwe inama na Coach Gaël yo gushaka ubumenyi no kugira ikinyabupfura kugira ngo Imana izamuhe ubukire
Coach Gaël ashimangira ko "Iyo ufite ubumenyi kandi ukubaha bose, Imana iguha ubukire."
