Muri iki giterane cya Esther Kamaliza hari hatumiwemo abakozi b’Imana batandukanye nka Ev. Ndayishimiye na Pastor Kamikazi Naomi, n’abacuranzi batandukanye barimo Daudi na Dr. Beya.

Cyabereye muri Uganda kuva tariki ya 12 kugera ku ya 14 Mata 2024, kuri Shekinah Glory Church Nakivale. Ni igiterane cyari gifite insanganyamatsiko igira iti "Guhinduka Ubwami bw’Abatambyi n’Ishyanga Ryera." Kuva 19.6.

Esther Kamaliza yagarutse ku ntego yacyo agira ati: "Icya mbere ni ukubwira abapfakazi n’abababaye ko Yesu abakunda, muri make iki giterane ni icyo gutanga ihumure ku bababaye, bakaganira nange imbonankubone."

Uretse aba bavugabutumwa n’aba bacuranzi twavuze haruguru, iki giterane cyahuriyemo abantu benshi Esther Kamaliza yatumiye barimo n’abaterankunga babo baturutse muri Leta Zunze Ubumwe z’Amerika, Afurika y’Epho n’ahandi babasuye nka Esther’s Hope.

Nyuma y’iki giterane cyabereye muri Uganda i Nakivale, abantu batari bake bamuhaye ubutumwa bumushimira bagira bati: “Wakoze cyane kutubera umugisha mu muryango wacu, Imana ikomeze ikwagure, turagukunda.”-Umutoniwase Christine.

– “Imana ikomeze igushyigikire kandi ukomeze waguke mu mwuka no mu bikorwa, uri umugisha kuri twe, ubera imfubyi n’abapfakazi igisubizo.”-Erneste Gasana.

Kuva kera Esther Kamaliza ubarizwa muri Leta Zunze Ubumwe z’Amerika, muri Leta ya Michigan, akiri umwana, yifuzaga gufasha abana bari mu bibazo ariko akabura uburyo. Uko yagendaga akura yiga n’amashuri, yifuzaga kuzashyira mu bikorwa icyo gitekerezo yagize.

Yagize ati: “Igitekerezo cyo kuyishinga nakigize ubwo nari nkiri umwana, gusa mu buzima bwange nkunda abana, mu byo nanga nanga kubona umwana amerewe nabi. Igitekerezo cyo kuyishinga, nshingiye ku byo nagendaga mbona mu nzozi binkangurira gutanga ubufasha ku bana bababaye.”

Yakomeje agira ati: "Mu gihe nakoraga ako kazi (ko gusukura ubwiherero), abazungu bo muri icyo kigo baramfotoraga ntabizi, barebye umutima mbikorana umunsi umwe barampamagara bambwira ko bakeneye ko dukorana, kubera ko hari icyo bambonyemo - umutima w’urukundo no gufasha abandi nta gihembo ntegereje.

Ni bwo bambajije icyo nifuza mbabwira ko mfite igitekerezo cya Esther’s Hope for Children bemera kumfasha kuyitangira, dutangirana abana 9 bigaga Icyongereza muri Kampala, mbishyurira ishuri no kubatunga nyuma Esther’s Hope yaje gukomera, ubu ifite abanyeshuri 150 biga mu mashuri y’incuke, 350 biga mu mashuri yisumbuye, bose hamwe ni 500.”

Uyu mushinga wa Esther’s Hope for Children washinzwe mu mwaka wa 2014, utangirana abana 9 ariko ubu bageze kuri 500. Ibikorwa remezo bafite, abakozi bahemba n’inkunga baha abana batishoboye, bifite agaciro karenga Miliyoni y’Amadolari.
Uko byari byifashe mu giterane

Abantu bakomeje gushimira Esther Kamaliza ku bw’iki giterane

Esther Kamaliza washinze Esther’s Hope

Byari uburyohe mu giterane cya Ev. Esther