Uyu muyobozi, anenga imvugo ikunze gukoreshwa n’abarokotse Jenoside yakorewe Abatutsi cyangwa bamwe mu bayobozi b’amadini bavuga ko Imana ari yo yarokoye bamwe muri Jenoside yakorewe Abatutsi mu 1994.

Yabigarutseho mu gikorwa cyo kwibuka ku nshuro ya 32 Jenoside yakorewe Abatutsi, cyateguwe n’umuryango wa Gikirisitu wibanda ku isanamitima n’ubwiyunge, Pilgrim Center for Healing and Reconciliation, cyahuje abayobozi n’abayoboke b’amadini atandukanye.

Mu ijambo rye, Rutaremara yibanze ku ruhare rw’amadini mbere no mu gihe cya Jenoside yakorewe Abatutsi, yibaza impamvu inyigisho z’urwango zatsinze inyigisho z’amahoro n’urukundo amadini yigishaga.

Yagize ati: “Kuki ijambo mwigishaga ry’Imana ryarushijwe amaboko n’ijambo ry’abantu? Mujya mwibaza ukuntu bigishaga gutemana namwe murimo mwigisha ngo mugire amahoro?”

Rutaremara yavuze ko na mbere ya Jenoside yakorewe Abatutsi, hari ibimenyetso byagaragazaga ko Igihugu kigana mu icuraburindi, ariko bamwe mu bayobozi b’amadini ntibabihagurukiye uko bikwiriye.

Yavuze ko igihe amashyaka n’imitwe yakwirakwizaga urwango byari bimaze kugaragara, hari n’abayobozi b’amadini bagaragazaga imyitwarire itajyanye no kwamagana ibikorwa by’ubwicanyi.

Yagarutse kandi ku ruhare rw’itangazamakuru ryabibaga urwango, by’umwihariko RTLM, avuga ko ryamaze igihe ryigisha amacakubiri n’urwango ariko amadini menshi agakomeza kurebera.

Ku bwe, ikibazo gikomeye kurushaho ni uko hari bamwe mu bayobozi b’amadini n’Abakirisitu bumvishije abantu ko Abatutsi batagifite agaciro cyangwa ko Imana yabatereranye, ibintu byatumye bamwe mu bicanyi bumva ko ibyo bakora atari icyaha.

Ati: “Umukirisitu yahitaga yumva kwica bitakiri icyaha kuko Imana yabarekuye. Kandi abo Bakirisitu bicaga barakomeje bakajya basenga bagiye kurya no kuryama harimo n’abiriwe bica abantu.”

Yavuze ko atemeranya n’imvugo zigaragaza ko Imana ari yo yarokoye bamwe mu barokotse Jenoside, mu gihe abandi benshi bishwe mu buryo ndengakamere.

Ati: “Ikindi ndambiwe ni uko muzana Imana muri Jenoside. Umuntu akavuga ngo bantemye ukuboko, bantema ukuguru ariko Imana irankiza. Njye ndabaza nti kuki iyo Mana itamukijije mbere y’uko bamukata ukuboko?”

Yakomeje yibaza uburyo bamwe bavuga ko Imana yabarokoye kandi abo mu miryango yabo bose bakicwa. Ati: “Hari uvuga ngo mu muryango wacu bishe abantu ibihumbi bitatu ariko njye ndarokoka. Iyo Mana ni bwoko ki itoranya umuntu umwe ikareka abandi bose bakicwa?”

Rutaremara yanagarutse ku bavuga ko Inkotanyi ari Imana yazizanye kugira ngo zihagarike Jenoside, avuga ko na byo atabyemera.

Ati: “Ngo Imana yazanye Inkotanyi ziradukiza. None kuki itahagaritse imihoro y’Interahamwe? Kuki itazanye Inkotanyi mbere y’uko Jenoside iba? Kuki yazizanye abantu bamaze gushira?”

Yashimangiye ko Jenoside yakorewe Abatutsi, yakozwe n’abantu, igakorerwa abantu kandi igahagarikwa n’abantu, bityo ko bidakwiriye gushyirwa ku Mana. Ati: “Imana ntimukayizane muri Jenoside. Jenoside yakozwe n’abantu, ikorerwa abantu, ihagarikwa n’abantu.”

Rutaremara yavuze ko we ku giti cye yumva byarushaho kumvikana kuvuga ko Imana itari ihari muri icyo gihe aho kuvuga ko yari ihari ariko igahitamo gukiza bake ikareka benshi bagapfa.

Yagize ati: “Njye nemera ko Imana itari mu Rwanda muri kiriya gihe. Imana igira neza. Iyo ihaba ntiyari kureka miliyoni y’abantu igashira.”

Yatanze urugero rw’abana bato, abagore n’abandi bantu bishwe urw’agashinyaguro, yibaza uburyo byashoboka kuvuga ko Imana yari ihari irebera ibyo byose.

Ati: “Ni gute Imana yaba ihari ikareka agahinja kagakubitwa ku rukuta, nyina akicwa, ikarokora umukobwa wamaze gufatwa ku ngufu no kwanduzwa SIDA?”

Yavuze ko iyo yumvise abantu bavuga ko Imana yahagaritse Jenoside cyangwa ko ari yo yarokoye bamwe, yumva ahubwo baba bagaragaza ikibazo mu buryo basobanukirwa Imana.

Ati: “Imana itoranya umwe ikareka ibihumbi bikicwa, iyo ni Imana?”

Rutaremara yasabye abanyamadini kongera gutekereza ku nyigisho zatangwaga mbere ya Jenoside no kwisuzuma ku ruhare rw’amadini muri ayo mateka.

Yasoje asaba abayobozi b’amadini n’Abakirisitu kwibaza niba inyigisho zatangwaga icyo gihe zari koko iz’Ijambo ry’Imana cyangwa niba hari aho zivanze n’inyungu, urwango n’ibitekerezo byatumye abantu bica bagenzi babo kandi bakomeza kwiyita Abakirisitu.

Ati: “Mubaze abigishaga icyo gihe. Ese bigishaga Ijambo ry’Imana? Cyangwa abaryigishaga bagiraga Satani muri bo? Kuki muticara ngo mubitekereze?”