Korali Jehovah Nissi Ni Korali ikorera umurimo w’Imana mu Itorero rya ADEPR, ahitwa muri Rukiri I, ikaba imwe mu makurali afite igikundiro muri iyi paruwasi bitewe n’ubutumwa bwiza bukubiye mu ndirimbo zabo ndetse n’imyandikire myiza aho usanga indirimbo zabo zigendana n’ukuri kw’ijambo ry’Imana.

Aba baririmby bateguye igiterane cy’Iminsi 2 giteganyijwe kuri uyu wa Gatandatu ndetse no ku Cyumweru, ni ukuvuga tariki ya 4 ndetse na 5 z’Ukwezi kwa Werurwe 2023, kikazabera mu Itorero rya ADEPR Rukiri I aho isanzwe ikorera umurimo w’Imana.

Tuyambaze Eric ushinzwe Media muri iyi korali, yagize ati "Dufite Intego yo gushima Imana no kwibutsa abandi ko bakwiye gushima Imana ku byo yabakoreye. Uzaba ari umwanya mwiza wo kuramya, guhimbaza Imana n’ijambo ry’Imana byose bihembura imitima."

Jehovah Nissi Ni Korali ikorera umurimo w’Imana mu Itorero rya ADEPR, ahitwa muri Rukiri I,

Iki giterane cyo gushima Imana hagendewe mu Ijambo ryanditse muri Zaburi 126:23 "Uwiteka yadukoreye ibikomeye natwe turishimye", kigamije gushimira Imana kuba itarahwemye kubana n’iyi korali mu murimo wayo mu rugendo rw’Imyaka 13, aho itahwemye kubagaragariza ineza yayo, ndetse no kubaremera amashimwe aremereye mu mitima yabo;

Kandi igakomeza kubarindira mu njyendo zitandukanye zakorwaga hagamijwe gushakisha iminyago yo kumurikira Umwami Yesu Kristo, no kugarura intama zazimiye, nk’uko igitero cya 4 cy’indirimbo ya 21 mu ndirimbo z’agakiza ibivuga ngo "Kandi abantu benshi cyane, ntibazi inzira y’ijuru, babohewe mu maboko ya wa mugome satani, muze twese tubashake, tubasangishe umukiza".

Abazitabira iki giterane bazagira umugisha wo gutaramana n’amakorali akunzwe mu mujyi wa Kigali nka Korali Naioth ADEPR SGEEM yakunzwe mu ndirimbo nka "Ntajoro ridacya, Uzajye utuza, Nta kinanira Imana" ...Iki giterane kandi kizitabirwa na Korali Maranatha, Ijwi ry’Impanda ndetse na korali Siloam zisanzwe zibarizwa mu itorero rya rukiri I.

Umuramyi Nkomezi Prosper uherutse gukorera igitaramo cy’amateka muri Kaminuza y’u Rwanda Ishami rya Huye, nawe azifatanya n’iyi korali.

Mu rwego rwo guhembura Imitima, iyi korali izifatanya n’umushumba Mitima Jonathan uzwiho kubwiriza Ijambo rihembura ubugingo ndetse n’impuguro, ndetse n’abavugabutumwa batandukanye barimo Evangelist Singirankabo Boniface, Ev Sibomana Innocent ndetse na Harerimana.

Mu myaka 13 iyi korali Imaze, kuri ubu imaze kwandika indirimbo zirenga 100 ndetse no gushyira hanze indirimbo 20 zirimo indirimbo 2 zifite amashusho, zose zikaba ziboneka ku muyoboro wabo wa YouTube witwa Jehova-Nisi Choir ADEPR Rukiri I.

Zimwe mu ndirimbo z’iyi korali igizwe n’abaririmbyi bagera ku 105 ni: Igihango, Himbazwa, Umukiza yatuvukiye, Mu ijuru ndetse n’iyitwa: Igihango ariyo iheruka gusohoka mu minsi ya vuba.

Korali Maranatha yo mu Rukiri I izaba iri muri iki giterane

Korali Naioth ya ADEPR Sgeem

Nkomezi Prosper azaririmba muri iki giterane

Ni igiterane cy’iminsi ibiri
Src: InyaRwanda