Itangazamakuru ryandika, kuri radiyo, televiziyo no ku mbuga nkoranyambaga, riributswa gukorera mu murongo w’ubunyamwuga mu gihe cyo Kwibuka Jenoside yakorewe Abatutsi mu 1994.
Mu gihe u Rwanda rwatangiye Icyumweru cy’Icyunamo cyo Kwibuka Jenoside yakorewe Abatutsi mu 1994, Urwego rw’Abanyamakuru Bigenzura (Rwanda Media Commission - RMC) rwasohoye amabwiriza mashya agenga imikorere y’ibitangazamakuru mu rwego rwo kurushaho kubungabunga ukuri kw’amateka no kwimakaza ubumwe bw’Abanyarwanda.
Aya mabwiriza No 01/2026 yashyiriweho umukono i Kigali, ku wa 5 Mata 2026 na Mugisha Emmanuel akaba Umunyamabanga Nshingwabikorwa, yatangajwe hashingiwe ku mategeko atandukanye arimo Itegeko rigenga itangazamakuru n’irigenga Kwibuka Jenoside yakorewe Abatutsi, ndetse n’inyobora bikorwa ya Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) ku nshuro ya 32 yo Kwibuka.
Mu biteganywa, itangazamakuru risabwa gukorera mu mucyo, kubahiriza amategeko no kwirinda imvugo cyangwa ibikorwa byakwangiza intego y’icyunamo. RMC ishimangira ko itangazamakuru rifite uruhare rukomeye mu gusigasira amateka, kurwanya ingengabitekerezo ya Jenoside no guteza imbere ubumwe n’ubudaheranwa bw’Abanyarwanda.
Aya mabwiriza agaragaza ko abanyamakuru bagomba gukoresha imvugo yemewe ari yo “Jenoside yakorewe Abatutsi mu 1994”, bakirinda amagambo ashobora kugoreka ukuri cyangwa gutesha agaciro uburemere bw’aya mateka. Ibi binagomba kugendana no kwirinda gukoresha inkuru cyangwa amashusho ashobora gukomeretsa amarangamutima y’abarokotse Jenoside.
Mu gihe cy’Icyumweru cy’Icyunamo (7–13 Mata), ibitangazamakuru bisabwa guhindura gahunda zabyo, bigashyira imbere ibiganiro byibanda ku kwibuka, ubuhamya, n’inyigisho zubaka ubumwe, aho gutambutsa ibiganiro bidafite aho bihuriye n’icyo gihe.
Aya mabwiriza anasaba ibitangazamakuru gutangaza no gukurikirana ibikorwa byo Kwibuka ku nzego zitandukanye, harimo ibikorwa by’Igihugu, iz’inzego z’ibanze, ndetse n’ibikorwa byo mu midugudu, mu mashuri no mu zindi nzego.
Ku bijyanye n’inyigisho, ibitangazamakuru bishishikarizwa gutegura ibiganiro bigamije kwigisha ku mateka ya Jenoside yakorewe Abatutsi, impamvu zayo n’ingaruka zayo, hagamijwe kurwanya icyakongera kuyigarura.
RMC kandi yasabye abanyamakuru kubahiriza amahame y’umwuga, kugenzura amakuru mbere yo kuyatangaza, ndetse no kwirinda amakuru atizewe, kubogama cyangwa gukabya.
Ku mbuga nkoranyambaga, ibitangazamakuru bisabwa kugenzura ibyo bisakaza, bikarwanya ihakana n’ipfobya rya Jenoside, ndetse n’imvugo z’urwango, bikanafata ingamba zihuse mu gukosora amakuru yatangajwe atari yo.
Mu rwego rwo gusigasira amateka, ibitangazamakuru bishishikarizwa gufata no kubika amashusho, amajwi n’ubuhamya bifasha mu nyigisho n’ubushakashatsi, ndetse no gusangiza MINUBUMWE ibikoresho bifite agaciro binyuze ku rubuga rwateganyijwe rwa www.kwibuka.rw
Aya mabwiriza atangajwe mu gihe u Rwanda n’Isi muri rusange bibuka ku nshuro ya 32 Jenoside yakorewe Abatutsi, mu rwego rwo kunamira inzirakarengane zayizize no gushimangira umuhigo wo “Kwibuka Twiyubaka”, intego igamije kubaka ejo hazaza h’Igihugu gishingiye ku bumwe, amahoro n’ubwiyunge.
Abaroma 13: 1-4 hagira hati: Umuntu wese agandukire abatware bamutwara, kuko ari nta butware butava ku Mana, n’abatware bariho bashyizweho n’Imana.
Ni cyo gituma ugandira umutware aba yanze itegeko ry’Imana, kandi abaryanga bazatsindwa n’urubanza. Abatware si abo gutinywa n’abakora ibyiza, keretse abakora nabi.
Mbese ushaka kudatinya umutware? Kora neza na we azagushima, kuko ari umukozi w’Imana uguhesha ibyiza. Ariko nukora nabi utinye, kuko adatwarira inkota ubusa. Ni umukozi w’Imana, uhōresha umujinya ukora nabi.
