Iyi korali yateguye umusangiro ngarukamwaka uhuza abaririmbyi bayo, inshuti, abayiririmbyemo ndetse n’ubuyobozi bw’itorero hagamijwe gusabana ndetse no kumurika imishinga irimo kunononsorwa.

Ni umusangiro wabaye kuri iki cyumweru tariki 18/12/2022 ubera aho iyi korali isanzwe ikorera umurimo w’Imana ku itorero rya ADEPR Kageyo mu Karere ka Gicumbi. Witabiriwe n’abaririmbyi, abaterankunga 21 ndetse n’abayobozi b’itorero bahagarariwe n’umushumba w’itorero rya Kageyo Pastor Sunday Emmanuel ari nawe wayoboye amateraniro, ndetse n’umuyobozi wa Paroisse ya Meshero Pastor Mbanzabigwi Theoneste.

Wabanjirijwe n’amateraniro yari yuzuyemo imbaraga z’Umwuka Wera, aho abaririmbyi n’abaKristo bavuze mu ndimi, umunezero wuzura urusengero, abanyabyaha barihana. Abagabura b’ijambo ry’Imana b’uwo munsi bari Ev Nzayisenga Jean Damascene n Ev Mwiseneza Christian.

Uyu musangiro ngarukamwaka wari warahagaritswe n’icyorezo cya COVID 19, wanejeje abawitabiriye bitewe n’uburyo wari wateguwe neza, urugwiro rwari rwose haba mu baririmbyi, abaterankunga ndetse n’ubuyobozi bw’Itorero.

"Ni Imana yadusabye ko buri mwaka twajya dukora umusangiro nk’uko Abakirisito ba mbere basangiraga ibyabo" - Umuyobozi wa Korali Blessing-Key Bwana Niyitegeka JMV asobanura imvo n’imvano y’uyu munsi.

Yabihuje n’uburyo intumwa za Yesu Kristo zasangiraga ibyazo, zikagira urukundo, zikarangwa n’ubumwe ndetse buri wese akiyumvamo mugenzi we. Aha hakaba haragendewe mu ijambo ry’Imana riboneka mu gitabo cy’Ibyakozwe n’intumwa 4:32-37.

Nyuma yo gufata amafunguro ndetse no gukata umutsima, Pasteur Sunday Emmanuel yagaragaje amarangamutima yo kwishimira iki gikorwa anashimira abaje kwifatanya na Korali aho yabagereranyaga n’abana bagarutse mu rugo, dore ko abenshi bakoreye umurimo w’Imana i Kageyo mu bihe bitandukanye anaboneraho guha karibu abandi bantu bafitanye amateka akomeye n’iri torero.

Reverend Pasteur Mbanzabigwi Theoneste uyobora Paroisse Meshero yagaragarije amarangamutima abateguye iki gikorwa by’Umwihariko korali Blessing-Key anayizeza ubufatanye muri byose.

Iyi korali ikorera umurimo w’Imana mu itorero rya ADEPR Kageyo, Paroisse ya Meshero mu karere ka Gicumbi. Kuri ubu igizwe n’abaririmbyi 36. Iyi korali yatangiye ari itsinda ry’abanyamasengesho, byari mu mwaka wa 2005. Nyuma gato mu mwaka wa 2007, yaje gutangira umurimo w’uburirimbyi igizwe n’abantu barindwi barimo abanyeshuri ndetse n’abakozi.

Umubare wakomeje kwiyongera, kuri ubu ifite umubare munini cyane w’abayiririmbyemo batuye hirya no hino mu gihugu ndetse no hanze yacyo bitewe n’impamvu z’akazi.

Basengera mu rusengero rufite agaciro ka Miliyoni 74 Frw

Abayobozi b’Itorero n’abafatanyabikorwa ba korali mu gukata umutsima wa kizungu/cake

Umuyobozi w’Itorero rya Kageyo

Benshi bakiriye agakiza

Amakorali anyuranye yifatanyije na Blessing Key

Ibyishimo byari byose

Bakora umusangiro buri mwaka

Ev. Mwiseneza Christian w’i Kayonza ni umwe mu bavugabutumwa beza bakiri bato

Byari ibirori biryoshye cyane