Korali Urukundo yamenyekanye mu ivugabutumwa ryo kuririmba ndetse ikorera umurimo w’Imana mu ntara y’Amajyaruguru; ADEPR Ururembo rwa Muhoza; Paroisse ya Muhoza, mu mujyi wa Musanze,iratakaje mu kwamamaza ivugabutumwa hirya no hino.
Nyuma y’uko korali Urukundo ivuye mu ivugabutumwa Kuri ADEPR Kabeza mu mujyi wa Kigali, kuri uyu wa 03 Werugwe 2024 ikomereje urugendo mu ntara y’Amajyepfo ku itorero rya Nyabinoni, Paruwasi ya Jurwe, ururembo rwa Nyabisindu aha ni mu karere ka Muhanga.
Korali Urukundo imaze iminsi mike ishyize hanze igihangano yise "Eliya". Ni indirimbo nziza yagiye hanze ku wa 20 Gashyantare 2024 nyuma y’uko bari baherutse gushyira hanze iyitwa "Goligota".
Paradise yaganiriye n’ushinzwe itangazamakuru muri korali Urukundo, Fredrick Nzamwitakuze ati: "Ni urugendo rw’ivugabutumwa twifuza gutangiriraho ivugabutumwa ryo mu cyaro dore ko igihe kinini twakimaze dukorera ivugabutumwa cyane mu mijyi.
Ikindi ni urugendo rugamije kwagura ubwami bw’Imana aho aho twiteze ko abagera ku 100 bazakira Yesu. Turateganya kandi kuzatera inkunga ku nyubako y’urusengero".
Arakomeza ati: "Ku ruhande rwo kuririmba, repetition ziri kugana ku musozo abaririmbyi bameze neza kandi turimo turasenga Imana ngo izadukoreshe iby’ubutwari".
Nk’uko bisanzwe kandi intego nyamukuru ya korali Urukundo ni imwe kandi idahinduka, ni ukwamamaza Yesu Kristo binyuze mu ndirimbo ndetse n’ibikorwa by’urukundo.
Muri uyu mwaka korali Urukundo iri guteganya ibikorwa byinshi bitandukanye nk’amahugurwa, gukora umuzingo wa kane (4) w’indirimbo z’amajwi n’amashusho, Ibikorwa by’urukundo no gushyigikira umushinga w’inyubako y’urusengero rwabo.
Korali Urukundo ifite alubumu eshatu (3) "Hakurya y’inyanja", "Umwami Yesu niyamamare ", "Aririmo" ndetse n’ indi ya Kane iri gutegurwa muri uyu mwaka.
Korali Urukundo irakataje mu ivugabutumwa
