U Rwanda rwatangaje ko rugiye gutangiza ikoranabuhanga ryitwa Block Chain, rizajya ryifashishwa mu kugaragaza igice cy’igihugu amabuye y’agaciro rwohereza mu mahanga aba yaturutsemo.
Byavugiwe mu nama ihuje intumwa ziturutse mu karere k’ibiyaga bigari, aho zirimo kwigira hamwe uko ubucukuzi n’ubucuruzi bw’amabuye y’agaciro bitaba isoko y’amakimbirane n’umutekano muke mu karere.
Ubucukuzi bw’amabuye y’agaciro mu bihugu byo mu karere k’ibiyaga bigari bwakunze kuvugwaho kutubahiriza amategeko uhereye mu bucukuzi nyirizina n’ubucuruzi muri rusange.
Abari muri uru rwego basobanura ko muri iki gihe hashyizweho uburyo bwo kumenyekanisha aho amabuye y’agaciro aya yaturutse ibi bigaca akajagari mu bucukuzi.
U Rwanda nicyo gihugu cya mbere cyabashije gushyira mu bikorwa ingingo 6 zigamije kurwanya ubucukuzi n’ubucuruzi bw’amabuye y’agaciro butubahirije amategeko, aha niho ubuyobozi bw’ihuriro ry’ibihugu 12 bihuriye mu nama mpuzamahanga ku karere k’ibiyaga bigari (ICGLR) buhera buvuga ko iyi ntambwe ishoboka no mu bindi bihugu.
Umuyobozi wungirije w’ikigo gishinzwe mine, petrole na gaz, Dr Ivan Twagirashema agaragaza ko u Rwanda ruteganya gukoresha ibirango by’ikoranabuhanga mu kugaragaza ikomoko y’amabuye y’agaciro ahacukurwa, bikazakuraho urujijo rukunze kumvikana ko nta mabuye y’agaciro rugira.
Kuva kuri uyu wa Mbere intumwa z’ibihugu bigize ihuriro riharanira iterambere mu karere k’ibiyaga bigari (ICGLR) ziri i Kigali, aho ziganira ku bimaze gukorwa mu bucukuzi n’ubucuruzi bw’amabuye y’agaciro banareba icyakorwa ngo ahakiri ibibazo bikemurwe ku nyungu z’abaturage, kandi n’aya mabuye y’agaciro ntabe intandaro y’umutekano muke mu bihugu byo muri aka karere k’ibiyaga bigari.
Src: RBA - Jean Claude Mutuyeyezu
