Mu gihe isi yuzuye ibibazo by’ingutu n’imibabaro ikomeye, hari imbaga y’abantu barimo guca mu bihe bigoye: ubukene, indwara, gufungwa, intambara, amakimbirane mu ngo, amadeni, kubura akazi, no kubura ibyiringiro. Ni muri urwo rwego Pasitor Christian Gisanura yamaze iminsi itatu asengera ibyo byifuzo biremereye imitima ya benshi.

Uyu munsi wa gatatu wo gusengera ibyifuzo ni wo wasoreje iki gikorwa cy’amasengesho yihariye. Pastor Gisanura yavuze amagambo akomeye y’ihumure ati:

“Turasengera abafite ibyifuzo byihuse kubera ibibazo bitunguranye, ubukene, uburwayi, gufungwa n’ibindi... Hari abari mu madeni, mu ntambara no mu bindi, umva gusenga kwabo ubasubize.”

Yibukije amagambo Yesu yavuze muri Yohana aho yavuze ko icyo tuzasaba cyose mu izina Rye, Se azagikora kugira ngo icyubahiro kibe icy’Imana.

“Nange ndi kubatabariza, Data, Data, tuzababone bagarutse amahoro mu izina rya Yesu… Wowe ufite icyifuzo cyo gusengera, bwira Yesu, uvuge icyifuzo mu mazina yawe, umubwire agutabare.”

Yahumurije abakomeretse, ababuze inshuti, abashavuye n’abasigaye bonyine. Abasaba akazi, abasaba amahoro mu miryango, abana barwaye, ababuze ubukode, n’abari mu nkiko; bose yabashyikirije ku ntebe y’imbabazi z’Imana.

“Kingura imiryango ikinguke, udutwikire igitinyiro n’icyubahiro cyawe, buri wese icyo akeneye agihabwe mu izina rya Yesu.”

Pastor Gisanura yasabye buri wese kwiyegereza Imana, adatinya kuvuga icyifuzo ke. Yasabye ko ubuntu bw’Imana butwikira buri wese uri mu makuba:

“Nsengeye abari mu gahinda, mu kaga no mu karengane… fasha abari mu rubanza, ubasaba akazi, ubatwikire ubuntu bwawe, buri wese umuvugire Mwami.”

Iri sengesho ry’umunsi wa gatatu ryasorejwe ku ihame rikomeye ryanditswe muri Zaburi 91:15, rivuga ko Imana izitaba abayiyambaza, ikabana na bo mu makuba, ikabakura mu byago ikabahesha icyubahiro.

Ubwo turi mu gihe gikeneye amasengesho y’ukuri kandi arimo ukwizera, Pastor Gisanura yadusabye gufatanya gusengera imitima iremerewe, abantu bari gutabaza Imana, kugira ngo uwo mwami Yesu akore ibyo yasezeranye.