Paradise.rw yamenye amakuru ko Juliet Tumusiime n’umugabo we John Muhereza, bibarutse umwana w’umuhungu, wabonye izuba mu masaha macye ashize. Juliet yanditse kuri Instagram ko umwana yibarutse yamusengeye, aramurota mbere y’uko avuka. Yabwiye Paradise ko afite ishimwe rikomeye ku mutima.

Uyu munyamakuru washyize itafari rikomeye ku iterambere ry’umuziki wa Gospel, yashimye Imana mu buryo bukomeye ku bw’umugisha yamuhaye. Ati "Umugisha uhebuje, Mana warahabaye". Yahishuye amazina bise umwana wabo, ati "JJ, uri umugisha wacu ukomeye, impano yavuye mu Ijuru, uri Umumalayika wacu muto wo guha agaciro no gukunda".

Juliet na John basezeranye imbere y’Imana tariki ya 21 Kanama 2021, mu rusengero rwa EPR Kabuga mu birori biryoheje ijisho byitabiriwe n’abantu bacye mu kwirinda Covid-19. Kuwa 26 Gicurasi ni bwo basezeranye imbere y’amategeko ya Leta y’u Rwanda.

Ubukwe bw’aba bombi bwabaye nyuma y’amezi 8 bari bamaze bagaragarije inshuti n’imiryango yabo ko bari mu rukundo dore ko tariki 06/12/2020 ari bwo Juliet yabwiye YEGO umukunzi we John mu birori byabereye mu Kiyovu kuri 5 Swiss Hotel.

John na Juliet bambariwe n’abarimo ibyamamare mu myidagaduro yo mu Rwanda nka Uwase Delphine uzwi nka Soleil muri filime y’uruhererekane ’Bamenya’, umunyamakuru Murenzi Emmanuel (Emmalito) wa Isibo Tv;

Sharon Kacyeye uririmba muri Kingdom of God Ministries, Umugabekazi Rebecca [Becky Rocsi] ukorana na Juliet mu kiganiro RTV Sunday Live, Pastor Mucyo Diana umuhanzikazi mu muziki wa Gospel wari Marraine wa Juliet, n’abandi.

Uretse kuba ari umunyamakuru, Juliet ni umukozi wa Equity Bank akaba n’umuhanzikazi mu muziki akora wo guhimbaza Imana, akaba amaze gukora indirimbo zirimo; ’Tera intambwe imwe’, ’Waba usize iki’ na ’Sinzaceceka’. Naho umugabo we John Muhereza ni umunyamakuru kuri Televiziyo yo muri Kenya ariko ayikorera aba i Kigali.

Akari ku mutima wa Juliet wibarutse imfura

Juliet na John bibarutse imfura bise "JJ"

Juliet ubwo yiteguraga kwibaruka imfura ye

Juliet na John bahora mu Ijuru rito

Ni urugo rwishimye cyane

Ku munsi w’ubukwe bwabo

Juliet akora kuri Televiziyo Rwanda mu kiganiro RTV Sunday Live