Itangazo ryemejwe na Grace to You, umurimo wo kwigisha washinzwe na MacArthur, ryatangajwe kuri X (Twitter) rigira riti: Imitima yacu irababaye ariko inanezerewe, dutangaje inkuru y’uko umuvugabutumwa wacu dukunda, John MacArthur, yinjiye mu buzima bw’iteka ari kumwe n’Umukiza. Uyu mugoroba, kwizera kwe kwahawe igihembo.”

MacArthur yari aherutse kujyanwa mu bitaro azize umusonga (pneumonia), ariko uburwayi bwe bwaje kumuhitana nyuma y’imyaka amaze agaragaza intege nke kubera izindi ndwara zagiye zimugaragaraho.

John MacArthur yavukiye i Los Angeles, California ku wa 19 Kamena 1939. Afite inkomoko ya kera ku ntwari y’Amerika mu ntambara ya kabiri y’isi, General Douglas MacArthur.

Yize muri Los Angeles Pacific College (ubu ni Azusa Pacific University), aho yakuye impamyabumenyi ya BSc, nyuma akomereza Talbot Theological Seminary ya Biola University, ahakura impamyabumenyi ya Master of Divinity.

Mu mwaka wa 1969, yabaye umushumba wa Grace Community Church i Sun Valley, California, ahamaze imyaka irenga 50 yigisha Ijambo ry’Imana nta gucika intege.

John MacArthur azwi cyane kubera:
• Ubushishozi mu gusobanura Bibiliya.
• Gukomera ku nyigisho z’ukuri, aho yakomeje kugaragaza ko Ijambo ry’Imana ritagomba kugorekwa.
• Yanditse ibitabo n’ubushakashatsi bibarirwa muri 400, harimo n’ibitekerezo ku nyigisho z’igihe, isengesho, ubutumwa bwiza n’ubuyobozi bw’itorero.
• Yatangije kandi ayobora The Master’s University and Seminary, aho yigishaga abavugabutumwa b’ejo hazaza.

Yavuze ubutumwa biciye mu ndangururamajwi (radio) no kuri televiziyo, bituma izina rye rizamuka nk’umwigisha wizewe ku rwego mpuzamahanga.

MacArthur yakunze kuvugwaho byinshi bitewe n’uko yavugaga adaca ku ruhande, ndetse rimwe na rimwe agakomeretsa bamwe.
• Mu 2013, yashinje ivugabutumwa rya Pentekote/Charismatique ubuyobe, abinyujije mu gitabo Strange Fire.
• Mu 2019, yavugiye mu ruhame ko abagore badakwiye kwigisha mu rusengero, agira ati: “Go home.”
• Ibi byamuteje impaka zikomeye hagati ye n’abandi bayobozi b’amatorero barimo Beth Moore na Max Lucado, bamushinje kudaha agaciro impano z’abagore mu murimo w’Imana.

Kurwanya amabwiriza ya COVID-19
Mu gihe cya COVID-19, MacArthur yanze gufunga insengero nk’uko Leta ya California yari yategetse, avuga ko uburenganzira bwo gusenga ari ubwa Kristo, atari ubwa Leta.

Yaburanye na Leta n’Umujyi wa Los Angeles, ariko mu mpera za 2021, urubanza rwarangiye Leta yemeye kumwishyura $800,000 mu mafaranga y’ubutabera, nk’intsinzi ku burenganzira bwo gusenga.

Ibibazo mu itorero rye
Grace Community Church yayoboraga yaje gushyirwa mu majwi kubera:
• Gutoteza abagore bavugaga ko bakorewe ihohoterwa n’abagabo babo, aho itorero ryashinjwe guhagarara ku ruhande rw’abakoze icyaha aho guha ubufasha abahuye n’ihohoterwa.
• Ibi byashyizwe ahagaragara cyane mu 2023, aho bamwe mu bayobozi b’itorero ndetse n’abahoze muri komite, barimo Hohn Cho, bashimangiye ko hari “imirongo mibi y’imyifatire y’ubuyobozi.”

Uburwayi n’urupfu
Kuva mu 2023, MacArthur yakomeje kugira ibibazo by’ubuzima:
• Yarwaye umutima, ubuhumekero n’impyiko.
• Yabazwe inshuro 3 mu 2024, bituma agira intege nke zatumye atagaragara mu rusengero amezi menshi.
• Mu butumwa yatambukije muri Shepherds Conference 2025, yavuze amagambo yihariye: “Ndumva ndi ku musozo w’urugendo… ariko ndashimira Imana kuko byose yabikoze ku bw’Ijambo ryayo.”

Yasize abamukundaga
John MacArthur yasize:
• Umugore we Patricia, bari bamaranye imyaka irenga 60 mu rushako.
• Abana 4, abuzukuru 15 n’abuzukuruza 9.

Abamukurikiranaga n’abandi banyamuryango b’itorero rye, barimo abashumba n’abigishwa be ku isi hose, bamwibuka nk’“intwari y’ukwemera,” nk’uko byatangajwe na Owen Strachan wagize ati: “Turi mu isi idasanzwe – idafite ijwi rya MacArthur. Imana imuhe iruhuko ridashira, intwari y’ukwemera.”

John MacArthur yapfuye nk’uko yabayeho – ahagaze ku kuri, yishingikirije ku Ijambo ry’Imana, yirinda gutinya, yizeye Iherezo ryiza.

“I have fought the good fight, I have finished the race, I have kept the faith.” – 2 Timoteyo 4:7

Iruhukire mu mahoro, mushumba w’intwari.