Ni indirimbo yasohotse mu buryo bwa Visualizer, ikaba yarakiriwe neza n’abakunda indirimbo zo kuramya no guhimbaza Imana. Yasohotse ku wa 25 Ukuboza 2025 kuri Noheli, umunsi abakristo benshi bibuka ivuka rya Yesu Kristo.

Iyi ndirimbo ishingiye ku ndirimbo yanditswe na Reginald Heber, Umwongereza wabaye Bishop mu Itorero rya Anglican, ikaba yaramenyekanye bwa mbere mu mwaka wa 1826. “Uri Uwera” iri mu ndirimbo zizwi cyane mu ndirimbo zo gushimira Imana ku rwego mpuzamahanga, cyane cyane mu nsengero no mu bihe byo kuramya.

Mu kiganiro na Paradise ku nkomoko y’iyi ndirimbo, Rebecca Niyitegeka yagaragaje ko yayiririmbye ashingiye ku Byanditswe Byera, by’umwihariko umurongo wo muri Yesaya 6:3, uvuga uti: “Uwiteka Nyiringabo arera, arera, arera. Isi yose yuzuye icyubahiro cye.” Uyu murongo ni wo wabaye ishingiro ry’iyi ndirimbo, ugaragaza ukwera kw’Imana, icyubahiro cyayo n’ubushobozi bwayo busumba byose.

Rebecca akomeza asobanura ko mu gutekereza ku kuramya nyakuri, yagiye asubira mu Byanditswe byinshi bisobanura Imana n’imirimo yayo, birimo Itangiriro 1:1–31, hagaragazwa uko Imana yaremye ijuru n’isi, umucyo n’umwijima, amazi n’ubutaka, ibimera, inyamaswa n’umuntu, byose bikarangira Imana ibonye ko ibyo yaremye ari byiza cyane.

Ibi, nk’uko abivuga, byatumye arushaho gusobanukirwa ko Imana ikwiriye kuramywa kubera ko ari yo soko y’ibintu byose.

Yongeye no kwifashisha Abakolosayi 1:15–20, hagaragazwa Kristo nk’ishusho y’Imana itaboneka, uwabanjirije byose, kandi byose bikabeshwaho na we. Ibi byanditswe byamufashije gusobanukirwa ubumwe bw’Imana, Umwana n’Umwuka Wera, ari na ho indirimbo igaruka ku butatu butagatifu, ari na bwo bugaragazwa mu magambo agira ati “Uri ubutatu, uri n’Imana imwe.”

Mu gukomeza gusobanura ishingiro ry’iyi ndirimbo, Rebecca Niyitegeka agaruka no ku nyigisho zo muri Yohana 16:7–15, zivuga ku ruhare rw’Umwuka Wera mu kuyobora abantu mu kuri no guhesha Kristo icyubahiro. Ibi byanditswe byamufashije gusobanukirwa ko kuramya atari amagambo gusa, ahubwo ko ari ubuzima bwose bweguriwe Imana.

Yanifashishije umurongo wo muri Yesaya 42:8, uvuga ko Imana itagabana icyubahiro cyayo n’undi wese. Aha ni ho avuga ko yasobanukiwe impamvu Satani yirukanwe mu ijuru, ari uko yanze kuramya Imana agashaka kuyisumba, nyamara yari yararemwe ngo ayiramye. Ibi byamukoze ku mutima cyane, bituma yiyemeza gushaka amagambo n’indirimbo byamufasha kuramya Imana abikuye ku mutima.

Rebecca avuga ko yabonye uburyo abakora ibibi bakora ibyo bemera babishyizeho umutima wabo wose, bikamutera ishyaka ryo na we kuramya Imana n’imbaraga ze zose. Ni muri urwo rwego atangaza ko umwaka wa 2026 aweguriye Imana byimazeyo, yiyemeza kuyikorera n’umutima we wose, ubwenge bwe bwose n’ubuzima bwe bwose, yiteguye kuba igikoresho Imana izakoresha uko ishatse.

Indirimbo “Uri Uwera”, yakozwe mu majwi na Gate Sound, na ho Visualizer ikorwa na Golden Dot Image, ni indirimbo irimo ubutumwa bwo guhamagarira abantu gusubira mu kuramya nyakuri, kwibuka Imana iyo ari yo, no kuyihesha icyubahiro gikwiriye, by’umwihariko muri ibi bihe bya Noheli.

Rebecca B. Niyitegeka yateguje gukora cyane mu mwaka wa 2026

Yirebe kuri YouTube