Ku wa Gatanu tariki ya 14 Kamena 2025, abagore bazaturuka mu bice bitandukanye by’Umujyi wa Kigali bahurire muri Africa New Life Ministries i Kicukiro – Kagarama, mu giterane ngarukakwezi cyiswe “Women’s Monthly Fellowship”.
Iki giterane kigamije gukomeza abagore mu buryo bw’umwuka no kubashishikariza kugira uruhare mu iterambere ry’umuryango n’Itorero.
Insanganyamatsiko y’uyu munsi igira iti "Yitegereza umurima akawugura", ishingiye ku murongo wo mu gitabo cy’Imigani 31:16, werekana umugore w’intwari uharanira iterambere rishingiye ku bwenge n’ingamba zifatika.
Umwigisha w’uyu munsi, Deaconess Betty Ndahiro, azatanga inyigisho izibanda ku guharanira intego no kugira uruhare rufatika mu kubaka imiryango n’igihugu binyuze mu gukoresha impano n’imbaraga Imana yahaye abagore.
Korali Glory to Glory Choir na yo izatanga umusanzu wihariye binyuze mu kuramya no guhimbaza Imana, ibizafasha benshi mu bagore kwinjira mu mwuka w’isengesho no gusubizwa.
Iki giterane kizasiga ubutumwa bukomeye bwo guha agaciro umugore mu ruhare rwe mu rusengero no mu buzima busanzwe. Abazaba bitabiriye bazataha bafite ihumure, imbaraga n’ubushake bushya bwo gukomeza urugendo rw’ubuzima barushaho kwegera Imana no kuba impamvu y’impinduka aho bari hose.
Ntuzacikwe
