Itsinda ry’Abanyamwuka rigeze kure imyiteguro y’urugendo rw’ivugabutumwa mu Ntara y’Amajyepfo, mu Karere ka Nyanza, ku wa 23 kugera ku wa 24 Gashyantare 2024, kuri Paruwase ya ADEPR Nyanza, Ibwami mu Rukari, ku gicumbi cy’amateka.
Kuri aya matariki ya 23 ku wa Gatanu, na 24 ku wa Gatandatu, hazaba gahunda y’amateraniro n’iy’amasengesho azaba nimugoroba, mu ijoro ry’amasengesho.
Mu bazitabira uru rugendo rw’ivugabutumwa harimo abahanzi bo kuramya no guhimbaza Imana, abavugabutumwa, n’abandi batandukanye babarizwa muri iri tsinda ry’Abanyamwuka. By’umwihariko, hazaba hari korari y’iri tsinda ry’Abanyamwuka (Abanyamwuka Choir) rizifatanya n’abandi mu kuvuga ubutumwa biciye mu ndirimbo zo kuramya.
Mu kiganiro Paradise yagiranye n’umukuru w’abagize iri tsinda ry’Abanyamwuka, Imanirakarama Deo, yayitangarije ko impano zose zizagira umwanya wazo wo kugaragazwa. Izo ni izo guhanura, gusenga, iz’Ijambo ry’Imana, kuririmba (ubuhanzi) n’izindi zibumbiye mu bagize itsinda ryabo.
Ibi bije nyuma y’igiterane cy’iminsi irindwi bakoze mu Kuboza k’umwaka ushize wa 2023, kuva ku itariki ya kane kugera ku ya cumi.
Hagati y’iki giterane n’uru rugendo rw’ivugabutumwa bagiye gukorera mu Ntara y’Amajyepfo, bari bahugiye mu bikorwa byabo bisanzwe birimo ibyo guhugurana mu Ijambo ry’Imana, n’iby’amasengesho.
Nyuma yo kuva muri uru rugendo, bafite umushinga ukomeye wo gukora filime ya gikristo yitwa ‘Komeza Icyo Ufite’, mu rwego rwo gukomeza gutambutsa ubutumwa bwiza bw’Imana. Ni filime y’uruhererkane izajya inyura ku muyoboro wa YouTube witwa Abanyamwuka Tv.
Si iyo filime gusa kuko bafite n’umushinga wo gukora indirimbo ya korali yabo y’Abanyamwuka, izaba ikozwe mu buryo bw’amajwi n’amashusho. Ibi bizarushaho koroha kuko umuyobozi wayo Imanirakarama Deo asanzwe ari umwanditsi n’umuririmbyi w’indirimbo zo kuramya no guhimbaza Imana.
Azwi mu ndirimbo zirimo Isengesho, Gehinomu, Zanira Yesu n’izindi aririmba mu njyana yo kurapa anyuza ku muyoboro wa YouTube witwa Elayo TV, aho asobanurira n’inzozi zitandukanye.
Iri tsinda, ryatangijwe na Deo mu gihe cy’icyorezo cya Koronavirusi ubwo bafungaga insengero. Ryatangiriye kuri WhatsApp rijyamo ababyifuza hadashingiwe ku idini cyangwa imyemerere iyo ari yo yose, ahubwo hashingiwe ku bushake bwo kwiga Ijambo ry’Imana.
Nyuma y’icyorezo ntibahagaze, bahuriye hamwe imbonankubone, bakajya bagirana ibihe byo kwiga Ijambo ry’Imana no gusenga. Imanirakarama Deo waritangije yari asanzwe abarizwa mu itorero ry’ADEPR Segeem riherereye mu Mujyi wa Kigali.
Intego zabo ni ukuvuga ubutumwa hirya no hino (bahita mu mahanga), gukura mu buryo bw’umwuka, no gukora ibikorwa by’urukundo birimo gusura abarwayi mu bitaro bakabashyira ibyo kurya, amasabune, n’ibindi by’ibanze.
Muri uru rugendo rw’ivugabutumwa, nta n’umwe udatumiwe.
Muri iki giterane impano zo guhanura, ubuhanzi no kwigisha Ijambo ry’Imana zizagaragazwa
Gukura mu buryo bw’umwuka, kuvuga ubutumwa hirya no hino no gukora ibikorwa by’urukundo ni byo bibaranga
Deo Imanirakarama waritangije ni umuhanzi mu ndirimbo zo kuramya no guhimbaza Imana
