Umunyatanzaniya, umuhanzi w’icyamamare, Harmonize isi yose by’umwihariko Afurika y’Iburasirazuba yamenye binyuze mu ndirimbo ze, umuyoboke w’idini ya Islam kuva kera, cyane ko n’amazina ye nyakuri Rajabu Abdulkahali Ibrahim abigaragaza, yakoze icyo bagenzi be basengana bita haramu (ikizira), ajya mu rusengero.
Iki gikorwa gitangaje cyatwerewe urukundo akunda Poshy Queen, umukobwa bari mu rukundo muri iyi minsi. Abislam bo muri Tanzaniya ntibahwemye kuvuga ko ikimero cy’uyu mukobwa gitangaje ari cyo cyamukuruye, kikamutwara uruhu n’uruhande, kugera ku rwego rwo gukora ikizira (haramu), akajya mu rusengero.
Kuri uyu wa 18 Gashyantare 2024, ku Cyumweru, umunsi Abakristo batandukanye bajya gusengera mu nsengero babarizwamo, Harmonize usengera mu idini ya Islam na we yagaragaye mu mashusho ari mu rusengero.
Aya mashusho ari kumwe n’umukunzi we Poshy Queen bari mu rusengero, umukobwa w’ikimero, uteye nk’igisabo aka ya mvugo y’Abanyarwanda asengeramo, ni Harmonize ubwe wayishyiriye ku rukuta rwe rwa Instagram.
Ni akavidewo kagaragaza umukunzi we yambaye ikanzu, biteguye kujya mu rusengero, Harmonize amubwira ati: “Umunsi wo ku Cyumweru, umukunzi wange yawugeneye Yesu. Unjyanye mu rusengero mukunzi? Ese nazana nawe mu rusengero, … Ubwire Yesu ababarire abantu, Amen!”
Abantu bagiyeho baramutuka, uretse ko hari n’abamuvuze neza. Hari uwagize ati: “Wa kigoryi we, ni gute uhora mu byo gutereta Abakristo gusa, ukibagirwa gukomeza inzira y’idini ryawe?” Hari uwahise amusubiza agira ati: “Urukundo ntirugendera ku isura, idini, imyaka cyangwa ibindi.” Gusa, amagambo avuga kuri iki gikorwa yabaye menshi cyane.
Nyuma yo kubona ibyo bamwe mu Bislam bagenzi be bamuvuzeho kubera aya mafoto, Harmonize yabihuhuye, agaragaza amashusho noneho yibereye mu rusengero, hallelujah zabaye nyinshi, kandi Abisilam batabikozwa. Yarengejeho amagambo avuga ko umukunzi we ahinduye umuslam akamujyana mu rusengero.
Abakomeje kumubwira ko yakoze ikosa, yabasubije agira ati: “Biratangaje kubona hari abantu bari kuvuga ko bitemewe kuba umukunzi wange yanjyana mu rusengero! Umukunzi wawe akujyana mu birori buri munsi, ahantu hatari Imana. Kiragano kibabaje cyane, nizerera mu Mana imwe.”
Muri uyu mwaka wa 2024, ni bwo iby’urukundo rwabo bigaragariye bose. Hari abavuze ko atazamarana kabiri n’uyu mukobwa bari kumwe, kuko Harmonize ahora ajya mu nkundo akongera akazivamo hadaciye kabiri.
Haremonze yagaragaje umukunzi we yita umugore we Poshy Queen mbere yo kujyana na we mu rusengero
Akigera mu rusengero, Harmonize w’umuslamu yabyeretse isi yose ko urukundo rutumye agerayo
Ntiyitaye na mba ku bamucira urubanza, bumva ko kujya mu rusengero ari icyaha
