Kwifuza kuba Imana, ni igitekerezo kigaragara nk’icyoroshye, ariko mu by’ukuri kirimo ubujyakuzimu bukomeye. Kuba Imana si ugufata ibyemezo byihuse, ahubwo ni ugukorana ubwenge burenze ubw’umuntu, bukora mu butungane no mu kuri.

Umuntu aramutse ashyizwe mu mwanya w’Imana n’amasaha 24 gusa, hari amakosa akomeye ashobora gukora, bitewe n’imiterere ye n’aho agarukira mu kumva ibintu.

Icya mbere, umuntu yakora ikosa ryo gufata ibyemezo ahutiyeho, ashingiye ku marangamutima aho gushingira ku kuri kuzuye. Mu buzima busanzwe, umuntu akunda guhitamo ibyo ashaka ako kanya, akirengagiza ingaruka z’igihe kirekire.

Ni yo mpamvu hari aho Bibiliya igaragaza ko ibitekerezo by’Imana bitandukanye cyane n’iby’abantu (Yesaya 55:8-9). Umuntu aramutse abaye Imana, ashobora kwihutira gukuraho ibibi byose mu isi, ariko ntabone ko hari ibyo Imana ireka bikabaho kugira ngo bigire intego mu mugambi wayo mugari.

Umwanditsi C.S. Lewis yigeze kuvuga ati: “God cannot give us a happiness and peace apart from Himself, because it is not there. There is no such thing”, ugenekereje ni nko kuvuga ngo “Imana ntishobora kuduha ibyishimo n’amahoro bitari muri Yo ubwayo, kuko bitabaho. Nta kintu nk’icyo kibaho.”

Ibi bigaragaza ko hari ibintu umuntu aba ashaka kandi ari byiza, ariko atumva uburyo nyabwo byakorwamo. Umuntu abaye Imana, ashobora gutekereza ko ashobora gutanga amahoro ako kanya, atabanje guhindura imitima y’abantu, bigatuma ayo mahoro aba ay’igihe gito.

Icya kabiri, umuntu yakora ikosa ryo gukoresha ubutabera bukabije butagira imbabazi. Abantu benshi bakunda ubutabera bwihuse: uwakoze nabi agahita ahanwa. Ariko Imana igira impuhwe kandi igategereza.

Mu Byanditswe, hari aho bigaragazwa ko Imana itihutira guhana, ahubwo ko itinda kurakara (Zaburi 103:8). Umuntu abaye Imana, ashobora guhana abantu bose bakoze ibyaha ako kanya, akibagirwa ko imbabazi ari kimwe mu bigize kamere y’Imana.

Umuhanga Fyodor Dostoevsky yigeze kwandika ati: “The degree of civilization in a society can be judged by entering its prisons,” ugenekereje akaba yarashakaga kuvuga ati “Urwego rw’iterambere ry’umuco w’abantu rushobora gupimwa urebye uko gereza zabo zimeze.”

Ibi byerekana uko abantu bapima ubutabera, ariko Imana yo ikareba umutima n’impamvu z’imbere. Umuntu abaye Imana ashobora kureba ibikorwa gusa, ntarebe impamvu n’umutima w’uwabikoze.

Icya gatatu, umuntu yakora ikosa ryo kwishyira ku mwanya w’icyubahiro aho gukorera abandi. Imiterere ya muntu ishaka kwigaragaza no kwishyira hejuru.

Iyo ahawe ububasha, aba ashobora kubukoresha mu kwishyira hejuru aho kubukoresha mu gukiza abandi. Nyamara Bibiliya igaragaza ko ubuyobozi nyakuri bushingiye ku gukorera abandi no kwicisha bugufi (Abafilipi 2:5-7).

Umuhanga mu mitekerereze Friedrich Nietzsche yaravuze ati: “He who fights with monsters should look to it that he himself does not become a monster,” aho ugenekereje wabyumva uku “Uhangana n’ibisimba (ibibi) aba akwiriye kwitonda kugira ngo na we atazahinduka igisimba.”

Ibi bishobora gusobanura ko umuntu ufite imbaraga ashobora guhinduka ikibi arwanya, iyo atagenzuye neza umutima we. Umuntu abaye Imana, ashobora kugwa muri uwo mutego, agatangira gukoresha ububasha nabi.

Mu gusoza iki gitekerezo, kuba Imana si ugufata ububasha gusa, ahubwo ni ugutwara isi mu bwenge, mu rukundo no mu butungane burenze imyumvire y’umuntu.

Amakosa atatu akomeye umuntu yakora yo gufata ibyemezo byihuse, gukoresha ubutabera butagira imbabazi, no kwishyira hejuru, agaragaza ko umuntu adashobora gusimbura Imana mu buryo bworoshye. Ni yo mpamvu Bibiliya itwereka ko Imana ari yo yonyine ifite ubushobozi bwo gutegeka isi mu buryo bwuzuye (Abaroma 11:33).

Ibi bidusigira isomo rikomeye: aho kwifuza kuba Imana, umuntu akwiriye kwiga kuyiringira no kwemera ko hari ibyo atasobanukirwa, ariko bikaba bifite umugambi mwiza urenze ubwenge bwe.