Mu bihe bitandukanye by’amateka, abantu bagiye bagira impungenge ku mwaka binjiyemo, cyane cyane uko isi irushaho guhangana n’intambara, indwara, inzara, ihindagurika ry’ikirere n’ihungabana ry’ubukungu.
Ese umwaka wa 2026 uteye ubwoba kurusha iyawubanjirije kuva Yesu asubiye mu ijuru? Iki kibazo cyagarutsweho n’ibitangazamakuru bitandukanye mu ntangiriro z’uyu mwaka wa 2026. Uyu mwaka, abantu bibajije niba waba uteye ubwoba kurusha indi myaka yose yawubanjirije kuva Yesu Kristo asubiye mu ijuru.
Mu itangazamakuru mpuzamahanga, cyane cyane irishingiye ku ndorerwamo ya gikristo (nk’ibinyamakuru bya gikristo byo mu Burayi na Amerika), hagiye hagaragara inyandiko zisesengura ibihe by’isi, aho bavuga ko isi iri mu “bihe byuzuyemo umuvuduko w’impinduka.” Ariko ibi binyamakuru ntibitangaza ko 2026 ari umwaka wihariye kurusha indi yose mu buryo bw’umwuka cyangwa mu kwegera kw’imperuka.
Ahubwo byibanda ku gusobanura ko buri gihe cyose cyagize ibihe bikomeye byacyo. Iyo dusubiye mu mateka kuva mu kinyejana cya mbere: Habayeho ibihe byo gutotezwa gukomeye kwibasiye Abakristo (nko mu gihe cy’Abaroma).
Habayeho indwara zahitanye abantu benshi cyane kurusha iz’iki gihe (nko mu kinyejana cya 14). Habayeho intambara ebyiri z’isi zahitanye amamiliyoni. Hanabayeho Jenoside n’ubwicanyi ndengakamere mu kinyejana cya 20.
Ugereranyije n’ibi bihe byose, abasesenguzi bavuga ko nta gihamya ifatika igaragaza ko 2026 yihariye mu gutera isi ubwoba kurusha indi myaka yose yabanje. Icyahindutse cyane ni uko amakuru atugeraho vuba, bigatuma ibibazo bigaragara nk’ibikabije kurushaho.
Kera umuntu wabaga wibereye mu gihugu kitarimo intambara, yatekerezaga ko ku isi hose ari ko bimeze. Nyamara, amakuru menshi atuma abantu bahahamuka, bakibwira ko ibintu bizazamba kurushaho.
Ku ruhande rwa gikristo, Bibiliya igaragaza ko kuva Yesu asubiye mu ijuru, Abakristo babayeho mu bihe byiswe “iminsi ya nyuma”, ariko ntiyavuze ko hari umwaka uzaba wihariye kurusha iyindi. Ku batekereza ko iherezo rizaza muri uyu mwaka, Yesu ubwe yavuze ko“Nta muntu uzi uwo munsi n’iyo saha” (Matayo 24:36).
Icyo Abakristo bahamagarirwa si uguhora bibaza niba umwaka runaka uteye ubwoba kurusha indi, ahubwo ni ukubaho biteguye mu by’ukwizera n’imyitwarire yabo bakayigira myiza, uko umwaka waba umeze kose.
Pawulo yibukije Abakristo ko“Imana itaduhaye umwuka w’ubwoba, ahubwo ko yaduhaye uw’imbaraga, n’urukundo, no kwitonda.” (2 Timoteyo 1:7).
Ntitwavuga ko umwaka wa 2026 uteye ubwoba kurusha indi myaka yose yabanje kuva Yesu asubiye mu ijuru. Ahubwo, buri gihe cyose kizana ibigeragezo byacyo. Icy’ingenzi si umubare w’umwaka, ahubwo ni uko umuntu abaho muri wo.
