Abantu basinziriye mu buryo bw’Umwuka bongerewe amahirwe yo gukanguka binyuze mu ndirimbo "Nicyo gihe" ya Salt Worship Team Ministries ikorera i Bruxelles mu Bubiligi.
Iyi ndirimbo yuje ubutumwa bw’ihumure bwakoze ku mitima y’abakunzi ba Gospel nk’uko bigaragazwa n’ibitekerezo byatanzwe n’abakunzi ba Gospel nyuma yo kuyireba.
Mu kiganiro kiryoshye yagiranye na Paradise, Bwana Gashabizi Jean Paul Dominique uzwi ku izina rya Pastor Gasha wagize iyerekwa rigari ryavuyemo iri tsinda, yagize ati: "The Salt Worship Team Ministries yatangiye muri 2022 akaba ari iyerekwa Imana yampaye".
Yakomeje atangaza ko iri yerekwa ryanyuze mu muyoboro w’ijambo ry’Imana riboneka muri Matayo 5:14. Ni ijambo rigira riti: “Muri umucyo w’isi. Umudugudu wubatswe ku mpinga y’umusozi ntubasha kwihisha.
Yasobanuye iri jambo anarihuza n’iri yerekwa ati: "Turi umunyu w’ isi nk’uko umunyu ugira akamaro kanini mu buzima bwacu bwa buri munsi Imana irashaka ko abakristo mu gihe nk’iki tuba abantu b’umumaro".
Ubutumwa bukubiye mu ndirimbo "Nicyo gihe"
Avuga kuri iyi ndirimbo nshya, mu ijwi riremereye ry’abagabo yagize ati: "Indirimbo ni cyo gihe twashaka gutaga ubutumwa bwo gukangura abantu tubibutsa ko iki ari cyo gihe cyonyine dufite kugira ngo dukorere Imana dukureho inzitwazo zose kuko ejo si ahacu ni ah’abejo."
Nyuma y’iyi ndirimbo, abakunzi ba The Salt Worship Team bashonje bahishiwe.
Nyuma y’uko Imana ibarobanuriye kuyiramya nta gahunda bafite yo guha Satani agahenge dore ko basobanukiwe ko Imana ibabikiye ingororano. Ibi bituma buri munsi bayihata amashimwe mvamutima kugira ngo batange urugero rwiza no ku bantu Imana ikorera ibitangaza bakagirango ni ibisanzwe.
Ibi rero Pastor Gasha umushumba w’Umunyembaraga Imana yabihereye amavuta yabigarutseho ubwo yavugaga ku mishinga iri tsinda riteganya. Yagize ati: "Nyuma y’iyi ndirimbo tugiye gutangira gukora ibitaramo tuzajya dutumiramo abandi bahanzi kugira ngo turusheho gukorera Imana."
The Salt Worship Team Ministries yatangiye mu mwaka wa 2022 itangijwe na Gashabizi Jean Paul Dominique nk’uko byavuzwe haruguru. Uyu ukoresha amazina ya Pastor Gasha ni umugabo wubatse utuye I Bruxelles mu gihugu cy’ububirigi.
Kuri ubu iri tsinda rikomeje kugaragara nk’itsinda ryiteguye kwamamaza Kristo ku rwego mpuzamahanga. Ku bw’ibyo, rikomeje kwagura imikoranire.
Kuri ubu bafitanye imikoranire myiza na ATV bakaba bategura "The Salt Talent Competition", irushanwa ryo kuririmba aho abitwaye neza bahembwa mu rwego rwo kwamamaza ubutumwa bwiza no gushishikariza urubyiruko gukorera Imana binyuze mu mpano zabo.
Bafite impano y’ibikorwa by’umusamariya mwiza
Iri tsinda rizwiho kugira umutima wa zahabu ku bw’ibyo bamaramaje kuticara abandi babiba. Muri "The Salt" bafite ibikorwa byinshi bakora byo gufasha birimo guha abana ibikoresho by’ishuri bakaba bibanda ku bana baturuka mu miryango ikennye ndetse n’imfubyi bakanasubiza mu ishuri abana bataye ishuri.
Si ibi gusa doreko bagira uruhare mu gusohoza amasezerano y’abavuganiye n’Imana ku musozi kizabonwa dore ko boroza abantu amatungo magufi.
Uwavuga ko iri tsinda ryahiriwe n’urugendo rigahuriramo impano nyinshi ntiyaba abeshye dore ko rifite n’igice cy’abaririmbyi baririmba indirimbo zo kuramya no guhimbaza Imana ku giti cyabo. Kuri ubu bamaze gukora indirimbo ebyiri arizo "Umwiringiye" na "Nicyo gihe".
Gashabizi Jean Paul Dominique uzwi ku izina rya Pastor Gasha wagize iyerekwa ryavuyemo The Salt Worship Team Ministries
RYOHERWA N’INDIRIMBO NSHYA "NI CYO GIHE"
