Umuyobozi wa Police mu Karere ka Huye, Afande Leonille, Bwana Twahirwa Emmanuel; Umuyobozi Ushinzwe ubucuruzi mu ruganda rwa Nyanza Milk industry mu karere ka Huye ndetse na Mahoro Espoir umucungamutungo (Manager) w’uruganda rwa Jibu mu karere ka Huye, ni bamwe mu bitabiriye iki giterane kimwe n’umushumba wa Paroisse ya Cyarwa Pasteur Nsanzamahoro Fidele.

Paradise. rw yari ihakubereye imbonankubone. Ni igiterane cyagaragayemo imyiteguro yo mu rwego rwo hejuru ndetse n’ubwitabire buri hejuru doreko cyari cyamamajwe ku rwego rukomeye. Korali Elimu ari nayo yateguye iki giterane yafatanyije na korali zikorera umurimo w’Imana kuri iri torero arizo korali Urumuri na korali Itangiriro.

Korali ukuboko kw’iburyo yaturutse muri Paroisse Gatenga ho mu mujyi wa Kigali yafatanyije na korali zavuzwe haruguru guhembura ubugingo bw’abitabiriye iki giterane. Korali Elimu niyo yabimburiye izindi korali kugera ku ruhimbi izamukira mu ikorasi ivuga ngo ’’Ntidufite gutinya haba no mu byago".

Yakomerejeho iririmba indirimbo 2 aho yahereye ku ndirimbo yayo ikunzwe yitwa ’’Tuzamubona’ ikurikizaho indi ndirimbo ihumuriza abasize ibyabo ku bwo gukurikira Yesu Kristo. Yahise iha ikaze korali Ukuboko kw’iburyo. Binyuze mu ikorasi, yibukije abantu ko bagomba kwibera muri Yesu Kristo kuko ariwe utajya ahinduka.

Nyuma y’iyi korasi yazamukiye mu rufaya rw’indirimbo eshanu zirimo intego ya Yesu ,Nzahimbaza umwami,Imitima yacu irakwizeye. Pastor Harerimana Baningene Jean Baptiste niwe wabwirije ijambo ry’Imana ryinjije abantu ahera.

Yifashishije igitabo cya Ezekieli 16:1-6, yibukije abitabiriye iki giterane ko kubaho k’umwana w’umuntu atari impanuka ku Mana. Yasobanuye ibimenyetso bine bigaragaza ko umuntu ari mu mugambi w’Imana aho yavuze ko kuba umuntu yaravutse mu buryo butangaje;

Kuba imfu zigera umuntu amajanja ariko Imana ikamwimana, kuba amaboko y’abantu yakurekura ariko Imana ikakuramira bigaragaza ko Imana igufiteho umugambi.Yifashishije ubuhamya bwe mu kugaragaza umugambi Imana ifite ku muntu aho yasobanuye uburyo yavutsemo ababyeyi batabana;

Se akabanza kumwihakana, nyirarume agashaka kumwica ariko Imana ikamurinda kubw’umugambi imufiteho. Nyuma y’ubu butumwa bwiza, hihannye abantu bagera kuri 25 biyemeza gukurikira Yesu Kristo nk’umwami n’umukiza wabo.

Korali Ukuboko kw’iburyo yongeye guhamagarwa ku ruhimbi iririmba izindi ndirimbo zikunzwe zirimo Kuro ndetse n’Ikidendezi nk’uko abantu benshi bakomezaga kuzisaba.

Ubwo yaririmbaga Ikidendezi, abantu bose barahagurutse, abandi biterera ku ruhimbi bajya kuririmba ikidendezi. Amakuru dufite ni uko hari umubare munini w’abasabye ko iyi ndirimbio yasubirwamo ku munsi wa kabiri w’igiterane. Turakomeza kubakurikirana iki giterane.

Byari bishyushye muri Elimu Week Program: Ku munsi wa 1 w’igiterane hihannye abantu 25, indirimbo ’Ikidendezi’ inyeganyeza Huye