Nyuma yo gutanga integuza mu cyumweru gishize, God’s Power Band - itsinda rya Muzika yo kuramya no guhimbaza rizwi cyane mu mujyi wa Goma /DRC, ryaraye risohoye indirimbo nshya ryise ’Nafsi yangu yakutamani’.
God’s Power Band ni itsinda ribarizwa mu matsinda yizihira ndetse agasusurutsa abaturiye umujyi wa Goma ndetse n’ahandi muri Repubukika Iharanira Demokarisi ya Kongo.
Hari hashize agahe gato iri tsinda ritanze integuza ko rishobora gushyira ahagaragara zimwe mu ndirimbo zabo mu mu mpera z’umwaka wa 2022.
Mu kiganiro yagiranye na Paradise.rw kuri uyu wa Gatandatu, Umuyobozi mukuru wa God’s Power, Bwana Mwamba, yasobanuye ko God’s Power ifite imishinga myinshi ndetse atanga amarenga ko iri tsinda rishobora gusoza umwaka riciye muri Kigali.
Yagize ati "Uyu mwaka twagiye i Butembo muri Province ya Nord-Kivu duherereyemo, tuhakorera igitaramo ndetse dushobora no gusozereza uyu mwaka i Kigali mu Rwanda".
Yakomeje ateguza abanyarwanda ko itsinda ryabo ritagira imipaka kuko ivugabutumwa bakora ritagenewe abakongomani gusa, ahubwo ko bahamagariwe kugeza ubutumwa bwiza ku isi yose ari nayo mpamvu bapanze ko bashobora gusoza uyu mwaka bageze i Kigali.
Si ubwa mbere baba baje gutaramira i Kigali, kuko mu myaka yashize ahagana mu mpera za 2018 baje i Kigali mu ivugabutumwa.
Iyi ndirimbo yabo nshya "Nafsi yangu yakutamani" izakurikirana n’izindi zitandukanye nk’uko Bwana Mwamba umuyobozi Mukuru wa God’s Power Band yabigarutseho.
Mu gihe iri tsinda rikiri mu myiteguro ryabwiye Paradise.rw ko rizaduha inkuru irambuye rimaze kunoza neza gahunda ndetse rigeze ku musozo w’imyiteguro yose.
Yagize ati, "Turacyari kubitegura dushyira akantu ku kandi turebe ibyo dusabwa ku ruhande rwacu kugira ngo tuzaze mu nzira zemewe n’amategeko ndetse tuganira n’aho tuzataramira ibyo bintu byose nibigera ku musozo tuzabaha inkuru irambuye".
RYOHERWA N’INDIRIMBO NSHYA NAFSI YANGU YAKUTAMANI YA GOD’S POWER BAND
