Kuwa 08 Ukwakira 2022 ni bwo Umurungi Yvette yambitswe impeta mu birori byabereye kuri Madras Hotel iherereye ku Gisozi mu Mujyi wa Kigali. Yambitswe iyi mpeta n’umukunzi we witwa Elly utuye i Burayi mu gihugu cya Norway. Yakorewe ibi birori mu buryo bwamutunguye cyane kuko yari yambariye ibirori byo gusezera musaza we witegura kujya kuba Bwongereza.

Umurungi Yvette uzwi nka Kylie Teta Ndebe muri filime ya Gikrsito yitwa "Ndategereje", yabwiye inyaRwanda.com ducyesha iyi nkuru ko yanezerewe cyane, ati "Narishimye, birandenga cyane". Yakomeje ku buryo yatunguwemo, ati "Mfite musaza wanjye wo kwamama wacu uzajya mu Bwongereza, banyobeje bambwira ko tugiye mu kirori cyo kumusezera".

Kylie bakunze no kwita Mukazi nk’izina ryo mu bwana bwe, yavuze ko mukuru we wo kwa nyina wabo uzwi nka Mama Miracle, ari we wateguye umugambi wo kumuyobya. Nubwo ariko yabeshywe, avuga ko byamukoze ku mutima, maze asabira umugisha uyu mukuru we wabigizemo uruhare. Ati "Ndamukunda cyane kandi ibyiza anyifuriza Imana ibimukubire".

Ku bijyanye n’umukunzi we wamwambitse impeta, yavuze ko bamaranye amezi hafi 12 bari mu munyenga w’urukundo. Ati "Yitwa Elly, atuye Norway, umwaka waburaga iminsi 10". Uyu mukobwa yahishuye ibintu yakundiye Elly byatumye amwegurira umutima we. Ati ’Arasenga (anakunda Imana), arankunda, anyitaho". Abajijwe ku bukwe bwabo, yagize ati "Ntabwo turabifatira umwanzuro".

Filime ’Ndategereje’ yamamariyemo Umurungi Yvetter, ni iya Sinzabyibagirwa Jean de Dieu uzwi cyane nka Jado Sinza mu ruhando rwa muzika, dore ko ari umuhanzi mu muziki wo kuramya no guhimbaza Imana wamenyekanye mu ndirimbo ’Nabaho’ aririmbamo ko kuva yabaho atari yabona umugabo umeze nka Yesu.

Jado Sinza yakunzwe kandi mu ndirimbo zitandukanye zirimo: ’Wagize neza’, ’Ongera wivuge’, ’Nta yindi Mana’ na ’Ndategereje’ yatumbagije izina rye binatuma ayihimbamo filime y’uruhererekane ya Gikristo iri mu zikunzwe cyane muri iyi minsi. Tariki 07 z’ukwezi kwa Kamena 2021, ni bwo uyu muramyi yashyize hanze agace ka mbere k’iyi filime ye.

Mu bakinnyi b’imena b’iyi filime harimo uwitwa Umurungi Yvette uzwi na benshi ku izina rya Mukazi, akaba akina yitwa Kylie Teta Ndebe. Kylie akina ari umwana w’imfubyi wababaye cyane kubera ubuzima bushaririye bw’ubupfubyi. Uyu mukobwa w’imyaka 24 y’amavuko, yatubwiye ko nta ’role’ n’imwe atakina kuko biba ari ugukina gusa, atari ibintu bishobora kumubaho mu buzima busanzwe.

Kylie hamwe n’inshuti ze zitabiriye ibirori yambikiwemo impeta

Umurungi akomoka mu Ntara y’Iburasirazuba mu Karere ka Gatsibo mu Murenge wa Rugarama, akaba atuye muri Kigali. Aherutse kubwira inyaRwanda ko ubwo yinjiraga muri Sinema atahiriwe no gukina muri fiime yashakaga kubera ibyo atari yujuje. Ati "Ntangira kwinjira muri filime bwa mbere ntabwo byakunze kuko ntabwo nari nujuje ibyo basabaga (ibipimo)".

’Ndategereje’ ni yo filime yamwinjije mu mwuga wa Sinema. Ati "Iyo natangiye gukinamo bwa mbere hari muri Werurwe 2021 ni bwo twatangiye gu shooting trailer ya mbere isohoka muri Mata. Natangiriye muri ’Ndategereje’, nkinamo nitwa Kylie Teta Ndebe. Nkina ndi umwana wababaye cyane w’imfubyi".

Avuga ko nta muntu yavuga ko ari we wamukundishije gukina filime, ati "Ntawe ahubwo nakuze mbikunda cyane nabona filime nkumva nanjye ndashaka cyane kuzayikina". Yavuze ko arangamiye kuba umukinnyi mpuzamahanga muri sinema ndetse akagera no ku rwego rwo gukora filime ze bwite. Ati "Urwego nifuza kugeraho ni ugukina apana gukinira mu gihugu gusa, no kurenga igihugu kandi nkagera ku rwego nanjye ngira izanjye (producer)".

Uyu mukinnyi utanga icyizere cy’ejo heza muri sinema yavuze ko abakinnyi ba filime bose abakunda, gusa hari umwe yavuze mu izina nk’umuntu yakuze akunda. Ati "Bose ndabakunda ariko nkitangira gukunda filime nyarwanda nakunze ’Amarira y’urukundo’, nakunzemo cyane Kayumba Vianney wakinnye yitwa Manzi".

Nk’umukinnyi wa filime, yavuze ko nawe hari filime akunda cyane ku buryo binashobotse ko yazikinamo byamushimisha cyane. Izo filime abereye umufana zirangajwe imbere n’iyitwa Impanga ya Bahavu Janet wamenyekanye nka Diane muri City Maid. Yvette/Mukazi ati: "Ni nk’eshanu: Impanga, City Maid, Ejo heza, Umuturanyi na Seburikoko".

N’ubwo amaze umwaka umwe nawo utaruzura muri sinema, avuga ko amaze guhuriramo n’imbogamizi zirimo amananiza no kutamenyana n’abantu benshi mu ruganda rwa Sinema. Ati "Connection nkeya kandi n’abo mubashije guhuza bakazana amananiza".

Iyo uganira na Kylie wumva bimugoye kwemeza ko ajya atekereza kuzatungwa na cinema gusa, nta kandi kazi ayibangikanya nayo, icyakora avuga ko hamwe n’Imana nta kidashoboka. Avuga ko yashimishwa no gukabya izo nzozi kuko akunda cyane sinema. Ati: "Biramutse bikunze, Imana ni yo igena byose".

Ku bahanzi, hari uwo muganira akakubwira ko hari indirimbo adashobora kuririmba - urugero nk’abakora umuziki wa Gospel, benshi bakubwira ko badashora kuririmba urukundo kuko baba bariyemeje guhimbaza Imana gusa.

Muri Sinema na ho usanga hari abakinnyi banyuranye badakozwa ibyo kuba bakina ’Role’ zose, urugero hari umukinnyi wa filime udashobora gukina ari umujura, gukina ari umupfumu n’izindi role abantu benshi batinya.

Si ko bimeze kuri Umurungi Yvette kuko we avuga ko nta role n’imwe atakina. Ati "Nta n’imwe ntakina (role) kuko byose nzi ko ari acting bitari ibya nyabyo kandi biba bifite message (ubutumwa) ibikurikiye ishaka gutangwa ku bantu".

Uyu mukobwa usengera muri Bethesda Holy Church, avuga ko aramutse abonye ubushobozi yashakisha abantu bafite impano zo gukina filime kuko hari ababura ubushubozi n’ubuvugizi budahagije bakabura uko berekana ko bafite impano yo gukina filime.

Ikindi yakora/azakora igihe azaba yabonye ubushobozi harimo "gukina filime zigaragaza ihohoterwa abana b’imfubyi bakorerwa mu miryango, n’ubuzima abana b’abakobwa babayeho abantu ba judging (babacira imanza), urugero hari abakora ibintu kubera agahinda gakabije ariko abantu aho kubaganiriza bakabafata nk’ibirara. Njyewe numva ari byo bintu nakwibandaho cyane".

Kylie hamwe na Nina [Peninah] nawe ukina filime

Kylie hamwe na Mama Miracle

Kylie yishimiye kwambikwa impeta n’umukunzi we

Inshuti ze zishimiye intambwe yateye