Ni umuco usanzwe mu itorero rya ADEPR aho usanga amakorali atandukanye abarizwa ku itorero runaka ategura igiterane agatumira amakorali ndetse n’abahanzi. Kuri ubu mu itorero rya ADEPR Paroisse Nyarugenge hari hatahiwe Shalom choir nk’uko ubufindo bwo kujya gutamba bwafashe umusaza Zakaria.

Kuri iyi nshuro, Shalom Choir igiye kwifatanya na Hoziana choir - Korali nkuru kuri Paroisse Nyarugenge, Shiloh choir izaturuka i Musanze ndetse n’umuramyi Bosco Nshuti, mu gihe Pastor Mugabo ategerejweho kuzatanga umutsima utera imbaraga binyuze mu ijambo ry’Imana.

Kuri uyu wa Kane tariki ya 20 Werurwe 2025, Shalom Choir yakoze ikiganiro n’itangazamakuru. Iki kiganiro kikaba cyitabiriwe na Jean Luc Rukundo Umuyobozi mukuru wa Shalom Choir, Mme Uwamahoro umuririmbyi wa Shalom choir, umuramyi Bosco Nshuti, Tuyisenge Innocent umutoza w’amajwi wa Shalom choir, Ndahimana Gaspard Umuyobozi wungirije ndetse na Léa Mukandangizi Umuyobozi wa Hoziana Choir.

Iki kiganiro kibanze kuri Shalom Worship Experience igiterane cy’iminsi 2 giteganyijwe hagati ya 22-23/03/2025.

Jean Luc Rukundo yasobanuye ko bateguye iki giterane gifite intego yo kuramya Imana mu buryo bwimbitse mu gihe cy’iminsi ibiri. Yavuze ko gutumira itangazamakuru hagamijwe gusakaza ubutumwa bwiza mu gihugu cyose kuva I Rusizi kugera Rusumo.

Ni igiterane kizabera mu rusengero rwa ADEPR Nyarugenge rwakira hagati (3500-4000). Jean Luc yavuze ko bizeye ko itangazamakuru rizabafasha kugeza ubutumwa bwiza ku banyarwanda barenga miliyoni 14. Ati: "Ikirere cy’u Rwanda kizaba cyafashwe n’ubutumwa bwiza."

Jean Luc yakomeje avuga ko iki giterane akurikije aho imyiteguro igeze, bizagenda neza. Yavuze ko intego yacyo ari ukwegereza imitima y’abantu kuri Kristo.

Bimwe mu bikorwa bitegerejwe cyane muri iki giterane: Uburyo bwiza bwo kuramya no guhimbaza kandi bigakorwa mu buryo bwimbitse abantu bakabasha kuganira n’Imana. Jean Luc yavuze ko abantu bazaza biteguye ibihe byo kwegerana n’Imana no kuyibwira ibyananiranye mwuka wera akongera gukorera mu bantu.

Umunyamakuru Mupende Gedeon wa InyaRwanda.com yabajije itandukaniro riri hagati ya Shalom Worship Experience na Shalom Gospel Festival igitaramo cy’amateka cyabaye umwaka wa 2023 muri BK Arena.

Jean Luc yavuze ko ubushize yari concert mu gihe kuri ubu ari igiterane, bateganya kuzaririmba indirimbo zizwi yaba izabo bwite ndetse n’iz’abandi mu gihe. Yavuze ko mu gitaramo cyavuzwe haruguru bakoreye muri BK Arena, habayemo ibindi bikorwa birimo no kuremera abakobwa babyariye iwabo bo mu murenge wa Kinyinya aho babahaye imashini 47 zidoda.

Impamvu kuri ubu batateguye Shalom Gospel Festival, ubuyobozi bwa Shalom Choir bwavuze ko buri mwaka bagira iteganyabikorwa aho basanze ari igihe cyiza cyo kubanza gusohora indirimbo bakoze zigafasha imitima yabanyarwanda.

Nyuma yo kwicarana n’ubuyobozi bwa ADEPR basanze uyu mwaka ari igihe cyo gufatanya n’ubuyobozi kongera kugarura ububyutse mu bakristo kugira ngo mwuka wera yongere kuganza mu mitima y’abantu. Gusa, ubu buyobozi bwahamije ko Shalom Gospel Festival itavuyeho.

Ku bakiriye agakiza muri Shalom Gospel Festival, Bwana Gaspard Umuyobozi wungirije wa Shalom Choir yavuze ko abo bantu bakomeje gukurikiranwa. Yavuze ko hari ababwirijwe ubutumwa bwiza barimo indangamirwa za Kinyinya bakomeje kwiteza imbere bakaba bashize koperative y’ibihumyo.

Benshi mu banyamakuru bagarutse ku mpamvu zatumye iyi korali ikorera igiterane mu rusengero aho gukorera muri BK Arena aho bibazaga niba igitaramo cyo mu mwaka wa 2023 kitarabasigiye imyenda. Kuri iki kibazo, ubuyobozi bwa Shalom Choir bwasubije ko gutaramira muri BK Arena nta gihombo byabateye.

Umunyamakuru wa Paradise yabajije Bosco Nshuti impamvu yatumye yumva bwangu akamaro ko gutaramana na Shalom Choir. Bosco Nshuti ati: "Nishimiye intego bafite yo kuramya no guhimbaza Imana". Yavuze ko intego ya Shalom choir yo kuramya Imana no gusenga ikwiye gushyigikirwa.

Bosco Nshuti umwe mu baramyi bakundwa kubi n’abakunzi ba Gospel ndetse n’itangazamakuru, hano yifotoranyaga n’umunyamakuru wa Paradise ndetse na Mugisha Yvonne Saccha wa Flash TV.

Ku bafite impungenge z’uko urusengero rwa ADEPR ruzaba ruto ahanini bitewe n’uko iyi korali iherutse kuzuza BK Arena, Jean Luc Rukundo yavuze ko abantu bazitabira iki giterane batazabura aho bicara dore ko hateganyijwe intebe 2000 reserve hateganywa indi myanya 1000 y’abantu bazarebera kuri Screen.

Umwe mu banyamakuru yakomoje ku mubano uri hagati ya Hoziana Choir na Shalom choir zifatwa nka Korali zikunzwe cyane mu itorero rya ADEPR. Umuyobozi wa Hoziana Choir yasubuje ko bafitanye umubano mwiza na Shalom Choir. Yongeyeho ko nka Korali nkuru bagomba kwerera imbuto Shalom choir bafata nka barumuna babo.

Abanyamakuru bari babucyereye

Abayobozi baje biteguye gusubiza itangazamakuru. Biragaragara ko muri repetition bakoze, ibi nabyo byahawe umwanya.

Yaboneyeho kwibutsa ko Hoziana Choir yiteguye guhaguruka mu muhamagaro wabo bakaririmbora Imana mu muhamagaro wabo abantu bakuzura umwuka wera.

Abayisenga Christian wa Isibo Radio &Tv umwe mu banyamakuru bazwiho kubaza ibibazo by’akasamutwe.

Dudu Rehema wa Life Radio. Uyu mubyeyi aha yohererezaga umuryango we ubutumwa abamenyesha ko yageze mu nama amahoro.

Mc Gatabazi ni umwe mu bitabiriye Press Conference ya Shalom choir

Bosco Nshuti ati "intego y’iki gitaramo ni nziza,gusa tariki ya 13/07/2025 ndabatumiye, muzaze mwambaye neza". Yavugaga ku gitaramo cye Unconditional Love Season 2

Aba banyamakuru barimo Senior Ntirenganya Ange Daniel wa Umucyo Fm, Esperance bakorana umwe mu "banyamakuru bubatse umunwa", Senior Boniface na Brenda umwe mu banditsi beza bati: ’’Gahunda ni ’’ntugasaze’’

Nikuze Honette umwe mu mpirimbanyi za Gospel ati: ’’Ese bite by’iriya Korali mwatumiye i musanze?"

Tubibutse ko iki giterane kizasozwa ku cyumweru tariki ya 23/03/2025 bikaba byitezwe ko Bosco Nshuti azaririmba ku munsi wa nyuma w’iki giterane. Nka Paradise, reka tubature indirimbo ’’Yampinduriye ubuzima" ya Shalom Choir kandi "Tuzahurire i Nyarugenge".