Prophet Claude Ndahimana, ni Umushumba Mukuru w’Itorero Soul Healing Revival Church, akaba yaratumiye Abakristo basengera mu Itorero rimwe ndetse n’abandi bose babyifuza mu gitaramo cy’amasengesho cyo gusoza umwaka wa 2023, mu ijoro ryo ku wa 31 Ukuboza, kinatangira umwaka mushya wa 2024, kuri Dove Hotel mu Mujyi wa Kigali.

Ni igitaramo kitwa Cross Over 23 (kwambuka umwaka wa 2023) kizaba gifite intego igira iti: “Prophetic rain cross overnight (ubuhanuzi bw’imvura bwambutse ijoro ryose)”, bisobanuye ko kizaba kirimo ubuhanuzi bwinshi kuko uyu Mukozi w’Imana asanzwe ahanura kandi ibyo ahanuye bikaba impamo.

Iki gitaramo kizaba kuva saa mbili z’ijoro kugera mu gitondo, intego yacyo ishingiye mu gitabo cya mbere cya Samweli 10: 6 hagira hati: “Umwuka w’Uwiteka ari bukuzeho cyane uhanurane na bo, uhereko uhinduka ube umuntu mushya.”

Muri videwo aheruka gushyira ku rubuga rwe rwa YouTube rwitwa Prophet Claude N TV, ikaba yarafatiwe mu rusengero ku itariki 14 Ukuboza 2023 mu mwanya wo gushimira Imana, umugore wari umaze imyaka atabona urubyaro kubera ukuvamo kw’inda yabaga atwite, yashimiye Imana anashimira cyane Prophet Ndahimana Claude wamuhanuriye ko inda azatwita ubutaha izavuka.

Uwo mugore yagiye mu rusengero yitwaje n’umuntu wo guhamya uko Prophet Claude yamuhanuriye.

Nk’uko yabivuze, umwana yari aheruka kubyara yagize imyaka 15 yose aba ari bwo yongera kubyara. Inda yatwaye nyuma yaho zageraga mu mezi atatu zikavamo, biba inshuro enye zose. Ibi byatumye umuganga w’umuhanga cyane ndetse w’umudogiteri amubwira ko kubyara undi mwana bitazashoboka.

Nyuma yaje guhurira n’umuhanuzi Claude i Kanombe amuhanurira ko azabyara umwana ndetse anarenzaho ko azaba ari umukobwa mwiza w’inzobe abantu bazajya barangarira.

Bidatinze, ubuhanuzi bwarasohoye abyara umwana w’umukobwa kandi koko abantu baramurangarira. Ibi byatumye aza mu rusengero ashimira Imana kandi atanga ituro ry’imifuka itatu ya SIMA.

Yagize ati: “Ibi byose mbikesha Papa Prophet Claude. Ni umuhanuzi w’Imana, ndi umugabo wo kubihamya.”

Si uyu gusa kuko hari n’abandi benshi Prophet Claude yahanuriye bikaba impamo akaba ari yo mpamvu no muri iki gitaramo yateguye kizaba kirimo ubuhanuzi bwinshi.

Ku itariki ya 2 Ukuboza 2023 kuva saa tatu za mu gitondo yari ayoboye igiterane kitwaga "Kwambuka Mbere yo Kwambuka" cyateguwe na Soul Healing Revival Church ye, kuri Dove Hotel mu Mujyi wa Kigali kandi na bwo yarahanuye.

Muri iri joro risoza umwaka, Prophet N Claude umaze kumenyekana mu Rwanda cyane cyane mu Mujyi wa Kigali, azakoresha impano yahawe ahanurire abo Umwuka uzamwerekezaho.

Uhawe ikaze mu gitaramo cyo gusoza umwaka