Ntabatindira mudatangira gutekereza ba Sandrine. Ni umuhango wari witabiriwe ku mpande zombi aho ababyeyi, inshuti zabo, abo bakorana umurimo w’Imana mu itorero rya Shiloh Mountain Church, wabonaga bishimiye kubona abana babo baremesheje ibirori nya birori bibanziriza ibirori nyamukuru.

Ni ibirori byari biteguye neza dore ko byabereye muri Hotel. Ku maso byagaragaraga ko Ange atazi icyo Seba atekereza mu mutima we. Mu gihe inshuti zabo zari zikomeje kwibaza serie ikurikira, Seba yegereye Ange, aca bugufi, ubundi yinjira mu nganzo y’Imitoma;

Ati" Ange rurabo rwanjye nkunda, ruhora mu mutima wanjye, niwowe ntereyeho, niyo mpamvu nshibuka buri munsi, kuva ku munsi wa mbere duhura, ubuzima bwanjye ntibwigeze buba uko meze ubu, wampinduriye ubuzima, wanteretse ku isi nzima".

Seba akomeza yongorera Ange ati "Niwowe ntereyeho, niyo mpamvu nzagukurikira aho ugiye hose". Muri ako kanya, Seba yongera kubwira Ange ati: "Ntabwo nemeraga ko abakobwa nkawe babaho. Ni impamo, ndi umunyamahirwe kuko nakwiboneye". Muri ako kanya, mu kinyabupfura kinshi yahise amwambika impeta y’urukundo (fiancaille).

Ange nawe kwihangana byaramunaniye, asuka amarira y’ibyishimo, niko kubwira Seba ati: "Cherie unkoreye umunsi, nanjye nzakwishyura!" Mu ijwi ryiza nk’iry’abamikazi Ange ati: "Urukundo rwanjye, umutima wanjye nihebeye, ndifuza iyaba buri munsi hakabaye uyu munsi, hakaba heza nk’uko ugaragara".

Ubwo yahise atumbira umukunzi we mu maso ati: "Rukundo, sinzibagirwa umunsi twahuriraga ha handi, ariko ubu noneho nyuma y’iyi mpeta y’akataraboneka unyambitse bigiye guhinduka, ntituzongera guhura, ahubwo tuzahorana. Umutima wanjye, ubuzima wanjye, byose byagiye aho guturiza, umunsi tuganira maze ukansaba kuba uwawe. Wakoze kumpesha ishema rungano, nanjye niteguye gutura mu gituza cyawe iteka".

Nyuma y’iyo mitoma yabereye mu rwongorerano, aba bombi bahoberanye biratinda, uwaribara ni uwahabaye.

Paradise.rw yaganirije Seba imubaza umwifato agira ati: "Ndumva nishimye, mubuzima ni bwo nakwishima". Yongeyeho ati"Gusa iminsi ni imitindi, sinjye uzabona ndi kumwe na Ange ubudatandukana."

Ubwo yabazwaga ibyerekeranye n’umunsi w’ubukwe, yatangaje ko rwose nta kabuza, uyu mwaka uzasiga kwisegura imisego ya gisore bibaye amateka. Yagize ati"Mube murya umunyu, ibirori biratashye".

Tubibutse ko Sebanani Narcisse (Seba) ari umucuruzi ndetse n’umushoramari mu bikorwa bitandukanye, akaba akorera mu mujyi wa Kigali. Uwimana Ange nawe ni umwe mu bacuruzi bakomeye cyane akaba azwiho kwambika abasirimu b’i Kigali.

Seba amaze imyaka myinshi ari umuyobozi w’urubyiruko mu itorero rya Shiloh Player Mountain mu gihe Uwimana Ange asanzwe ari umuramyi ufatwa nk’inkingi ya mwamba mu itsinda rya Wisdom worship ribarizwa muri iri torero.

Amakuru twamenye ni uko aba bombi bamaze imyaka 2 bakundana. Gusa bakaba baragize urukundo rwabo ubwiru bitewe n’uko Imana yababujije kubivuga ku mpamvu aba bombi bagize ubwiru.

Seba aba ahobeye Ange ati: "Sinigeze mbasha kumenya neza ko nzagira ubuzima bw’umunezero mbukesha wowe igihe nakubonaga mu maso yanjye bwa mbere nkumva ibyishimo bitashye umutima wanjye"

Seba na Ange batangiye urugendo ruganisha ku kubana