Pasiteri Christian Gisanura yigishije ko gusenga atari ugutuma Imana imenyeshwa ibyo tutarabona, kuko Imana iba izi ibyo dukeneye mbere y’uko tubivuga. Dusenga kuko isengesho ari ikimenyetso cy’umubano dufitanye n’Imana nk’umwana n’umubyeyi.

Umwana ntasaba umubyeyi ngo amumenyeshe ko akeneye kurya cyangwa kwiga, ahubwo asaba kuko azi ko umubyeyi amwumva kandi amukunda. Ni ko bimeze no ku Mana: dusenga dushingiye ku kwizera, atari ku bw’amagambo menshi, ahubwo ku mutima uhuje n’ubushake bwayo.

Pasiteri Gisanura agaragaza ko hari urwego umuntu ageramo, umutima we ukaba waratunganiye Imana, ku buryo asubizwa n’Imana atarasenga, kuko ibyifuzo bye biba bihuje n’ukuri n’ubushake bw’Imana.

Ibi bitwereka ko gusenga atari uguhata Imana ngo iduhe, ahubwo ko ari ukwiyegurira gukora ubushake bwayo. Dusenga kuko dufite Yesu, tukamwizera nk’umubyeyi wita ku bana be, uha umwana ibyo akeneye n’iyo yaba atabimusabye.

Ni yo mpamvu dusenga tudacika intege, tunashimira Imana, kuko tuzi ko itwumva kandi ko iyo dusabye mu buryo ishaka, iba yaratugeneye igisubizo mbere. Isengesho ritwigisha kwiringira Imana, kuyigirira icyizere nk’umubyeyi muzima, no kuyishimira ku byo iduha kuko akenshi biza mbere y’uko tubisaba.

Mu ntangiriro z’uyu mwaka mushya, mu kwezi kwa mbere kwahariwe gushimira no guhimbaza Imana, Pasiteri Christian Gisanura yatanze inyigisho ikomeye ishingiye ku Ijambo ry’Imana ryo mu 1 Yohana 5:12-15, yibutsa Abakristo impamvu ikomeye yo gushima Imana: Yesu Kristo, ubugingo buhoraho n’igisubizo cy’amasengesho.

Pasiteri Gisanura yibanze ku murongo ugira uti: “Ufite uwo Mwana ni we ufite ubwo bugingo.” Aha yagaragaje ko gushimira Imana bitangirira ku kumenya no kwemera ko kugira Yesu Kristo ari byo shingiro ry’ubuzima nyakuri.

Ubugingo buhoraho si ikintu tuzabona ejo hazaza gusa, ahubwo ni impano dutangira kugira uyu munsi iyo twakiriye Yesu mu mitima yacu. Ni yo mpamvu umwaka ugitangira, tutawinjiramo dutinya, ahubwo tuwinjiranamo ibyiringiro n’ibyishimo byo kumenya ko dufite ubugingo buhoraho.

Mu gushimira Imana ko yaturinze mu mwaka ushize, Pasiteri Gisanura yibukije itorero ko uburinzi bw’Imana atari impanuka, ahubwo ko ari imbuto zo kuba mu bumwe na Kristo.

Abizeye Yesu, nubwo baba baranyuze mu bigeragezo, indwara, ibihombo cyangwa intimba, bagumaho kuko Imana iba iri kumwe na bo. Ni yo mpamvu uyu mwaka mushya ugomba gutangirana ishimwe, atari ukubera ko byose byagenze neza, ahubwo kubera ko Imana itigeze idutererana.

Yongeye kwibutsa ko udafite Yesu aba atagira byose, naho ufite Yesu we akaba afite byose. Ushobora kuba waratakaje byinshi mu mwaka ushize, ariko niba utaratakaje Yesu, nta cyo wahombye. Kandi niba waramubonye muri uwo mwaka, wungutse ikintu kiruta byose.

Ibi bituma ukwezi kwa mbere kw’umwaka kuba umwanya mwiza wo kwisuzuma: Ese Yesu atuye mu buzima bwanjye? Ese ni we shingiro ry’icyizere cyanjye?

Pasiteri Gisanura yanagarutse ku masengesho, ashingiye ku murongo uvuga ko Imana itwumva iyo dusabye nk’uko ishaka. Yigishije ko impamvu dusenga atari uguhata Imana, ahubwo ari ukugaragaza kwizera kwacu.

Hari igihe Imana isubiza tutarayisaba, kuko iba izi umutima wacu kandi ibyifuzo byacu bihuje n’ubushake bwayo. Ibi byerekana urukundo rwayo rwa kibyeyi, rurenze urw’abantu bose.

Mu ntangiriro z’uyu mwaka, Abakristo basabwe kudacika intege mu masengesho, ahubwo bagasenga neza, basenga bashaka mbere na mbere ubwami bw’Imana no gukiranuka, aho gusenga bashaka gusa iby’isi. Iyo dushyize Imana imbere, ibindi byose irabiduha.

Pasiteri Gisanura yasoje inyigisho ye ashimangira ko kwizera kudafite imirimo kuba gupfuye, bityo gushimira Imana ntibigomba kugarukira ku magambo gusa, ahubwo bigomba no kugaragarira mu mibereho yacu ya buri munsi: mu rukundo, mu gufasha abandi, no mu kubaho dukurikiza ukuri kw’Imana.

Muri uku kwezi kwa mbere k’umwaka, iyi nyigisho itwibutsa ko dufite byinshi byo gushimira Imana: yaduhaye Yesu, yaduhaye ubugingo buhoraho, yaraturinze mu mwaka ushize kandi ikomeje kudufasha muri uyu mwaka dutangiye. Ni yo mpamvu dukwiye gutangira uyu mwaka tuyishima, tuyihimbaza, kandi tuyiringira byimazeyo.