Ni intambwe nshya itunguranye kuri uyu muhanzi wamamaye cyane mu ndirimbo z’urukundo n’izisanzwe, ariko ubu akaba agaragaje impinduka ko na we ari umuntu ushobora gufata umwanya, agahimbaza Imana.

Mu mashusho yashyize ku rubuga rwe rwa Instagram, Safi Madiba yumvikana aririmba agace gato k’iyi ndirimbo, ahamya ukwizera kwe mu magambo y’Icyongereza agira ati: “Nta kintu cyanshyira hasi…. Sinabaho ntafite Imana mu buzima bwange.”

Mu butumwa yanditse, yagize ati:“Niba Imana iri kumwe natwe, ni nde waturwanya?” (If God be for us, who can be against us.)

Aya magambo, afitanye isano n’amagambo yo muri Bibiliya, yerekana ko uyu muhanzi ari gutekereza ku mbaraga n’uburinzi by’Imana mu buzima bwe. Abakurikirana umuziki we bamaze gutangira kumugaragariza ko bishimiye iri hinduka, bamwe bamushimira uburyo arimo guhindura icyerekezo cy’umuziki we ugasatira ibikorwa byo gukomeza kwizera.

Safi Madiba asanzwe asengera mu itorero ry’Abadivantiste b’Umunsi wa Karindwi, kandi yigeze no kugaragaza ko akunda indirimbo zo kuramya Imana nubwo yari azwi mu muziki usanzwe. Iyi ndirimbo nshya rero irasa n’aho ari yo yabaye nk’umwanya wo kugaragaza aho ahagaze mu kwegerana n’Imana.

Abasesenguzi b’umuziki bavuga ko indirimbo “Holly Father” ishobora kuba intangiriro y’urugendo rushya rwa Safi mu muziki wo kuramya, bikaba bishobora gutuma benshi bamwiyumvamo nk’umuhanzi uririmba izo ndirimbo.

Nibiramuka bikomeje gutya, ashobora kuba umwe mu bahanzi bake bo mu Rwanda bakomeje kurushaho kwiyegurira Imana binyuze mu buhanzi, bagaha umuziki wabo umurongo wo kuramya Imana n’icyerekezo cy’ubuzima bushya bwo kuyikorera.

Safi Madiba asengera mu Badive