Paradise.rw yanyarukiye mu murenge wa Rutunga uyoborwa na Bwana Iyamuremye François ibakurikiranira iki gikorwa cyiswe"Dufitanye Igihango". Iki gikorwa cyari kigamije kugabira amatsinda y’ubumwe n’ubwiyunge ndetse n’abana bakomoka kuri iyi miryango.

Umuhango witabiriwe n’abayobozi b’Umurenge wa Rutunga mu nzego zishinzwe umutekano ndetse n’inzego bwite za Leta, harimo Umunyamabanga Nshingwabikorwa w’umurenge wa Rutunga bwana Iyamuremye Francois, Uhagarariye Ingabo, Uhagarariye DASSO, Umuyobozi wungirije wa Njyanama, Ushinzwe Imibereho myiza y’abaturage, uhagarariye amatsinda y’ubumwe n’ubwiyunge ndetse n’imbaga y’abaturage bari buzuye inzu mberabyombi yabereyemo iki Gikorwa.

Uyu muhango wabereye mu Murenge wa Rutunga, mu Karere ka Gasabo, mu Mujyi wa Kigali, Tariki ya 06 Kamena 2023, wabimburiwe n’umwanya wo kwidagadura twafashijwemo n’umuhanzikazi Nimugire Kellia, wasusurukije abantu mu ndirimbo z’ubumwe n’ubwiyunge.

Nyuma yo kumara gutanga ikaze byakozwe n’Umunyabanga Nshingwabikorwa w’Umurenge wa Rutunga, Umuyobozi w’Umuryango Light Generation Organization akaba ari nawe Fondateri MASENGESHO JEAN BAPTISTE yahawe umwanya maze ageza Imbwirwaruhame ku bitabiriye uyu muhango.

Yatangiye asobanura Umuryango Light Generation Organization mu buryo bwimbitse, ati "Mbere yo kuvuga ku muryango, munyemerere tubanze dushimire Imana yaduhaye u Rwanda nk’ingobyi iduhetse.

Munyemerere by’Umwihariko dushimire Leta y’Ubumwe bw’Abanyarwanda, irangajwe imbere n’Umutoza w’Ikirenga Nyakubahwa Perezida wa Repubulika y’u Rwanda, Paul Kagame, we wemeye kuba Umuyoboro mwiza wo Kugeza u Rwanda aho Rwifuzwa na buri wese. Ubu kuba Umunyarwanda bikaba ari ishema nyamara mbere byari ipfunwe.

Nyuma y’amateka mabi yigishijwe akabiba urwango mu Banyarwanda, twari dusangiye Igihugu, umuco, ururimi n’ibindi byaduhuzaga, Ayo mateka mabi akatuzanira umwijima watumye habaho Jenoside yakorewe Abatutsi muri Mata 1994 yadutwaye Abarenga 1,000,000 ndetse ikazanira igihugu cyacu ikimwaro, ariko Leta y’Ubumwe bw’Abanyarwanda ikabasha guhagarika Jenoside yakorewe Abatutsi ndetse no kunga Abanyarwanda.

Abayobozi b’umuryango Light Generation Organization hamwe n’abayobozi b’umurenge wa Rutunga. Bwana IYAMUREMYE Francois (uwa 2 uturutse iburyo), Umunyamabanga Nshingwabikorwa bashyikiriza Inkoni n’inkuyo MUZEHE RUKEMAMPUNZI

Yakomeke agira ati "Umuryango Light Generation Organization twishyize hamwe nk’Abanyarwanda n’inshuti z’u Rwanda, kugira ngo duhuze imbaraga mu cyerekezo cyo kugira ngo tugere ku mpinduka nziza mu Mitekerereze, mu Bukungu, mu Mibanire n’ahandi. Ikindi, tugomba gucana urumuri rutanga Umucyo utuma isi iba nziza, binyuze mu bikorwa bitandukanye no mu ntego z’Umuryango harimo:

1.Gufasha Abanyarwanda n’abandi kuva mu bwigunge binyuze mu kigo gitanga ubujyanama n’ubuvuzi bw’imitekerereze, ibyiyumviro n’imyitwarire bya Muntu.

2.Gutegura abayobozi beza b’ejo hahaza n’abafashamyumvire binyuze mu gutanga amahugurwa agamije kubongerera ubushobozi.

3.Kubungabunga no kwita ku bidukikije.

4.Kubungabunga ubuzima bw’abana baba mu mihanda hagamijwe kubasubiza mu buzima busanzwe (mu miryango yabo).

5.Kurwanya Ihohoterwa rikorerwa abana, abagore n’abagabo.

6.Kurwanya Ibiyobyabwenge mu rubyiruko.

7.Gushimangira Ihame ry’Ubumwe n’Ubwiyunge binyuze mu mahugurwa n’ibikorwa bitandukanye.

8.Gushishikariza abanyamuryango n’abanyarwanda muri rusange kurangwa n’umuco wo kwigira, kwiteza imbere no kwihangira Imirimo.

9.Gufasha Imiryango itishoboye kubonera abana babo ibikoresho by’ishuri n’amafranga y’ifunguro ritangirwa ku ishuri.

By’Umwihariko twateguye igikorwa ngaruka mwaka cyiswe "DUFITANYE IGIHANGO". Aho tugira tuti "UBUMWE BW’ABANYARWANDA AKABANDO KADUKUYE MU MWIJIMA". Ni igikorwa cyo kugabira amatungo amatsinda y’Ubumwe n’Ubwiyunge hagamijwe gushimangira intambwe y’Ubumwe n’Ubwiyunge Abanyarwanda tumaze kugeraho twikuye mu mwijima tutarandaswe n’amahanga".

Yakomeje ati "Nk’uko mwabyumvise aya matsinda tugabira uyu munsi, ni amatsinda ahuje Abarokotse/Abakorewe Jenoside ndetse n’abayikoze".

Umuryango Light Generation kandi washimye kugabira aya matsinda ku mpamvu zigera kuri enye (4):
1.Kubashimira Intambwe nziza bateye.
2.Gushimangira Igihango n’isano dufitanye(Ubunyarwanda).
3.kwibukiranya no kwiga amateka hagamijwe kwirinda kuyagoreka no kuyahonyora.
4.Kurangwa n’umuco wo kwigira no Kwiteza imbere.

Umuryango kandi wagabiye amatungo magufi harimo inkwavu 10 n’inkoko 10 Abana bakomoka kuri abo byabyeyi. Ati "Ibi bizadufasha gusobanurira urubyiruko amateka mabi yaranze igihugu cyacu,Uruhare Abanyarwanda twagize rwo kongera gusana igihugu cyacu.

Duhereye kuri aya matungo kandi ahawe aya matsinda baba abakuze n’abana bazakomeza korozanya hagati yabo bityo barusheho gukomeza igihango bafitanye ndetse no kwiteza imbere".

Umuyobozi wa LGO, MASENGESHO JEAN BAPTISTE, aha yari arimo gushimira ababafashije muri iki gikorwa

Uyu muyobozi yasoje ashimira abagize Amatsinda y’ubumwe n’ubwiyunge amahitamo meza bagize n’intambwe nziza bateye kandi ayizeza ko umuryango wa LGO uzakomeza gufatanya bya hafi na hafi n’amatsinda y’ubumwe n’ubwiyunge ya Rutunga.

LGO yashimiye ubuyobozi bw’umurenge wa Rutunga bwayikinguriye amarembo yo gutangirizamo iki gikorwa ngaruka-mwaka kiswe DUFITANYE IGIHANGO “ UBUMWE BW’ABANYARWANDA AKABANDO KADUKUYE MU MWIJIMA.

Nyuma yo gusobanurira abitabiriye iki gikorwa, umuryango Light Generation mu buryo bwimbitse, hakurikiyeho Ikiganiro cy’Ubumwe n’Ubwiyunge cyatanzwe n’Umutumirwa Pastor RUZIBIZA Viateur, cyabaye ikiganiro cyiza cyane.

Yabanje kwinjira mu mateka y’u Rwanda asobanura uburyo Abazungu baje nk’abagenzi bigendera bakaza gutata umubano w’abanyafrika bagasubira iwabo bakajya kujya inama yo kuza "Kuducamo ibice ngo babone uko batuyobora".

Nyuma yaho baje noneho ari abashyitsi badateganya gutaha, bagatura maze "bakatubibamo urwango". Yavuze ko ikibabaje bamwe bitwaje ivangiri. Ati "Byaje kuba umunuko noneho mu 1994 Abihaye Imana nabo bijanditse muri Jenoside yakorewe Abatutsi".

Pastor Ruzibiza Viateur yakomeje avuga ko abanyarwanda muri rusange bafite umukoro ukomeye wo kugarura ibyo banyazwe (Igihango, Urukundo, Indangaciro) ndetse no gusigasira ibyagezweho. Yavuze ko kugira ngo abanyarwanda bagere ku bumwe n’ubwiyunge basabwa ibintu by’ingenzi bikurikira:

1.Kugarura ibyo banyazwe
2.Kuruka ibintu baatamitswe
3.Gukora urugendo rwo Gukira
4.Gukora, Guharanira Kwiteza imbere
5.Gusaba Imbabazi no Kubabarira
6.Kurera abatoya (Kubigisha Umuco n’indangagaciro)
7.Kurinda ibyagezweho

Abantu bamaze kumva ikiganiro bashimye, batanga ibitekerezo ndetse babaza ibibazo.
Nyuma yo guhana ibitekerezo hakiriwe ubuhamya bw’ababa mu matsinda y’ubumwe n’ubwiyunge.

Umwe mu barokotse Jenoside yakorewe Abatutsi yatanze ubuhamya avuga ukuntu nyuma ya Jenoside yaheranywe n’ubwoba n’agahinda akajya yumva no kujya mu bantu atabikeneye kuko nawe yibazaga ati ’ubundi kuki atari jyewe wapfuye’?

Uyu mubyeyi yabwiye abantu ko nyuma yo kwitabira amahugurwa ya Mvura Nkuvure, kudaheranwa byamugiriye umumaro kugeza ubwo ababarira abamuhekuye.

Hakurikiyeho abagabo 2 bakoze Jenoside yakorewe Abatutsi, bakemera icyaha bagasaba Imbabazi ndetse bagakora Igihano nsimburagifungo.

Bahuriye ku ruhare rw’ubuyobozi bubi bwabashoye mu bwicanyi bagahekura igihugu, bakica abo bafitanye isano n’ibihango ariko bashimira abo bahemukiye babahaye imbabazi ubu bakaba basangira akabisi n’agahiye.

Bashimiye kandi Leta y’ubumwe bw’Abanyarwanda yabahaye amahirwe yo kongera kwiyumvamo ko ari abanyarwanda kandi bayizeza ubufatanye no kuba impinduka z’ibyiza.

Hakurikiyeho umwanya wo kugaba, aho hatanzwe inka ku mutarage watoranijwe n’itsinda witwa RUKEMAMPUZI JEAN BOSCO. Hakurikiyeho kandi abaturage 4 bahawe Intama (Ihene), abo akaba ari HAVUGIMANA Gerard, MUTABAZI Pierre, BYUKUSENGE Mariya na NYIRAMBONABUCYA Appolinariya.

Abana 20 bakomoka kuri iyi miryango bahawe Inkoko 10, abandi 10 bahabwa Inkwavu kugira ngo nabo bagire itsinda bahuriramo nk’uko ababyeyi babo bayahuriramo.

Umuyobozi w’Umuryango Light Generation Organization, yongeye kubwira abana bagabiwe amatungo magufi ati "Amateka y’u Rwanda n’ubwo yabaye mabi akadusharirira, akadutera ikimwaro, ariko Ubudasa bw’abanyarwanda bwatumye tutazima".

Yongeye kubihanangiriza ati "Ayo mateka ntakibagirane kandi ntagahonyorwe.
Aba bana bazarushaho kumenya amateka y’igihugu ndetse biteze imbere binyuze muri aya matungo magufi nk’uko Akarere ka Gasabo kagira Slogan igira iti "URUKWAVU RUBYARA INKA".

Umushyitsi mukuru ari na we Munyamabanga Nshingwabikorwa w’umurenge wa Rutunga, yasoje uyu muhango agira ati "Dushimiye LGO yateguye iki gikorwa kandi tubijeje ko abo mugabiye tuzakomeza kubaba hafi kugira ngo baziteze imbere".

Pastor Ruzibiza Viateur atambutsa ikiganiro

Umusizi Liliane ati, ’Ndasiga nkasatirwa na Gasizi ka Sinzi’

Umuyobozi wa Light Generation Organization (MASENGESHO JEAN BAPTISTE na Pasteur RUZIBIZA Viateur bashyikiriza Inka Muzehe RUKEMAMPUZI JEAN BOSCO mu gikorwa DUFITANYE IGIHANGO. Umuyobozi wa Light Generation Organization yabwira amagambo akomeye Muzehe ati "Urakaramba mu Nka, Urakagira amata kandi Igicaniro cyawe ntikikazime".