Korali Ingabire Choir itangira, yatangiriye mu cyumba bigishirizagamo umwuga wo kuboha, itangizwa n’abakobwa 6 babyigaga ndetse n’abasore babiri barimo uwari mwalimu.

Yatangiriye mu cyumba cyo kuboha, itangizwa n’abakobwa 6 babyigaga ndetse n’abasore babiri barimo n’uwari mwalimu. Ni imwe muri korali zimaze gukusanya ibisarurwa byinshi no kumurikira Kristo iminyago myinshi.

Hagamijwe kwamamaza ubutumwa bwiza, Paradise.rw yiyemeje kuganira n’amakorali atandukanye hagamijwe kugeza ku bakunzi ba korali imigabo n’imigambi n’ibyagezweho kugirango andi makorali yige. Uyu munsi twabahitiyemo Ingabire Choir.

Ingabire Choir ikorera umurimo w’Imana mu itorero rya Pentekote (ADEPR) Ururembo rwa Muhoza, Paruwasi ya Muhoza itorero rya Muhoza, ahasanzwe habarizwa andi makorali akomeye nka Gosheni choir yamamaye mu ndirimbo "Uzi Kurinda".

Ni korali y’ubukombe dore ko ko imaze myaka 46 yose ikora umurimo w"Imana, bivuze ko ari imwe mu makorali yamanutse imisozi itambika ibibaya hagamijwe kuzanira Kristo iminyago. Abo hambere barabizi ko hifashishwaga ipenda n’ingoma z’uruhu mu ngendo z’ivugabutumwa.

Ni imwe muri korali zo hambere dore ko mu mwaka wa 1979 ari bwo yavutse itangirana n’ubutumwa bwiza mu itorero rya Muhoza, mu cyahoze ari ururembo rwa Ruhengeri.

Itangira ry’iri torero ryari rito doreko ryatangiranye abakristo batarenze 50, bari biganjemo abakene nyakujya, abandi bakaba barimo abafite ubumuga butandukanye bajyaga imbere y’Imana ariko bashaka no guhabwa imfashanyo zatangwaga n’abamisiyoneri bari batangije ubutumwa bwiza nk’uko ubuyobozi bw’iyi korali bwabitangarije Paradise.

Gusa Kristo yakomeje kwagura iyi korali dore ko kuri ubu ari umwe muri korali zimaze gukora indirimbo nyinshi zirenga 800, bakaba ari abatunzi mu buryo bw’umubiri no mu mwuka bakaba banatungishije benshi.

Kuri ubu Ingabire Choir ni imwe muri Korali zifite umubare w’abaririmbyi ushyitse dore ko igizwe n’abaririmbyi 156, barimo abagore 67, abagabo 52 ndetse n’urubyiruko rugera kuri 37. Ni urugendo rutoroshye kuri aba baririmbyi dore ko rwaranzwe n’ibyishimo n’amakuba muri iyo myaka yose.

Ingabire Choir iri mu makorali afite amateka akomeye mu Rwanda

Mu bihe bibi batazibagirwa, ni ugupfusha bamwe mu baririmbyi no kuba hari bamwe muri bagenzi babo batangiranye urugendo bagacika intege, mu gihe hari byinshi byo kwishimira nk’ibirori byo gushyingira, kubona urubyaro kw’abaririmbyi bari bafite isezerano, kubona akazi kuri bamwe, kwagurirwa imbago mu buryo bw’umwuka no kubwiriza ahantu hatandukanye hakaboneka iminyago myinshi nk’uko twabitangarijwe n’ubuyobozi bw’iyi korali.

Muri iyi myaka yose igera kuri 46, ubuzima bwa buri munsi bw’iyi korali bwaranzwe n’ibihe by’amasengesho, ivugabutumwa rishingiye ku ndirimbo no ku mirimo, umwimerere ushingiye ku myizerere y’itorero rya Pentekote, kubana neza n’andi makolari n’ibindi bigamije guteza umurimo w’Imana imbere.

Iyi korali yakoze ingendo nyinshi z’ivugabutumwa mu Ntara zose z’u Rwanda, ndetse no mu mahanga nko mu gihugu cya Uganda mu Turere twa Mubende na Kiboga. Mu mpera z’umwaka wa 2024, iyi korali yakoze urugendo bafata nk’urw’amateka, aho bari batumiwe mu cyumba cy’amasengesho cyo ku itorero rya Nyarugenge.

Kuri ubu Ingabire Choir iyoborwa na Bosco Birihanze. Agaruka ku rugendo rw’ivugabutumwa rw’amateka bakoreye i Nyarugenge, yagize ati: “Uru rugendo twarwakiye turwishimiye cyane, kuko ni rwo rwa mbere twari dukoreye i Nyarugenge, ahantu dufata nk’ahahoze icyicaro cy’itorero ryacu". Yakomeje ati: "Ni ahantu hatumye korali yacu irushaho kumenyekana kuko yari ikurikiranwe n’abantu benshi bari ahantu hatandukanye.”

Yarongeye ati: "Ni ibihe byiza twahagiriye, n’uburyo Imana yadukoresheje iby’ubutwari, ikindi twabonye abaje barwaye bashima Imana yabakirije mu iryo teraniro. Indirimbo twahafatiye na zo zarakunzwe cyane ku rugero tutabitekerezaga, zagize amashusho asa neza, n’ubwo zose uko twaziteganyaga zitafashwe kubera ikoranabuhanga ryadutengushye ku cyiciro cya 2."

Agaruka ku musaruro w’ibikorwa byagezweho mu rugendo rw’imyaka 46 bari mu murimo wo kuririmba, Bwana Ingabire yavuze ko bamaze gukora indirimbo zirenga 800.

Kuri ubu Ingabire Choir imaze kugwiza imizingo (Alubumu) eshatu z’amajwi n’eshatu zifite n’amashusho. Indirimbo zabo zose ziboneka ku muyoboro wabo wa YouTube witwa ‘Ingabire Choir Family.’

Imugabo n’imigambi irakomeje Mu bwami bw’Imana .Mu mwaka wa 2025 bateganya ibitaramo Aho bateganya gutaramana na Chorale Elayo mu kwezi Kwa Gashyantare.

Iyi korali irateganya kuzakora igiterane cy’amateka aho bateganya kuzataramana na Hoziana Choir y’i Nyarugenge mu giterane kizabera kuri Stade Ubworoherane. Si ibi gusa doreko bateganya n’ibitaramo 3 by’amavuna bizabera muri Paruwasi z’Ururembo rwa Muhoza.

Iyi korali yakataje mu ikoranabuhanga no kujyanisha n’igihe. Kuri ubu batangiye imyiteguro yo kuzakora indirimbo mu buryo bugezeeho bwa ‘Live Recording’ y’indirimbo zigera ku 10. Indi mishinga harimo kugura ibyuma by’umuziki bigezweho bizabafasha mu ivugabutumwa, ibikorwa byo kuremera abatishoboye no gushyira hanze indirimbo nshya zigera kuri 6.

Muri ibi bikorwa byose, abagize Chorale Ingabire barasaba abakunzi b’ibihangano byabo n’Abakristo muri rusange, gukomeza kubashyigikira binyuze mu kubaha inkunga y’amasengesho, ibitekerezo byubaka umurimo, n’inkunga y’ubushobozi bw’ibifatika.

Ingabire Choir yamenyekanye mu ndirimbo nka "Tugiye Iwacu mu ijuru", "Umuhati wanyu si ubusa", "Mbon’ijuru rishya", "Ndaje Mwami", "Imana ibwira Mose" n’izindi.

Korali Ingabire imaze imyaka 46 mu rugendo rwo kwamamaza ubutumwa bwiza