Mu ijwi riremereye ryo mu gituza, yaranyegereye ampa impanuro, nka zimwe Yakobo amaze gusaza yahaye abana be ndetse n’abuzukuru (Itangiriro 49).

Yagize ati "Muhungu wanjye, umva impanuro z’umusaza, urabizi uhereye cyera, twasangiraga byose, twagendanye amajoro, twararanye mu mihana dusenga Imana. Ibuka imisozi ya Byumba twatereye, tumanuka ibishanga.

Twasengeye Imana mu kuri no mu mwuka, none ndakwinginze ntuzatentebuke ngo utatire igihango, ntuzibagirwe gukora kw’Imana, ntuzibagirwe ko yagukijije indwara, ntuzibagirwe ko yakugize uw’igiciro.

Uzahorane amashimwe iteka, iminsi yose jya usenga Uwiteka Imana yawe, wibuke Kristo wavuye mu rubyaro rwa Dawidi, akakubera inshungu y’ubugingo bwawe. Iryo jambo ry’umusaza, naribitse ku nkingi y’umutima wanjye!

Ubanza wagira ngo, umuhanzi w’umuhanuzi David KEGA yaranyumvaga! Nyuma y’iminsi mikeya, yunze mu mpanuro y’umusaza, akora mu nganzo asuka amashimwe ye ku Mana.

Mu gihe nari mu kirere cyo kwibuka ijwi ry’umusaza ryansabaga gutandukanya inzira y’ukuri n’izindi nzira zigaragara nk’ukuri ariko zifite ahandi zigana, ni bwo Imana yohereje umuramyi mwiza mu miririmbire uwo ni David Kega. Ubanza ba Dawidi bose Imana yarabahaye umugisha, nawe nushake uzaryite ubuheture.

David Kega umuramyi watangariwe cyane kubera impano ye

Mu ndirimbo nziza cyane, umuramyi David Kega yararirimbye ati "Amapfa yarateye turabyobuha, tugera mu butayu imigezi iradudubizaa, inzira zirushaho kunyerera cyan. Nyamara ntitwahagarara turakomeza!. Numvise iyo ndirimbo, nanjye nti "Alleluiaaaah".

Mu gihe nendaga kumubwira ngo subiramo, yahise yungamo ati "Twumvise amajwi menshi aduca intege, atubwira ko ahari Imana itatwumvira, bamwe muri twe bageze aho barananirwa, twe dukomeza gutambira isezerano. Kwiyumanganya byahise byanga, nanjye nti "Big Amen".

Mbega umunsi ngo urambera mwiza!!!! Numvise nabwira David Kega nti "Uwiteka Imana nasenze, ikomeze kuzuza amavuta mu mperezo, ntukaburire impembuzo itorero ry’Imana muhungu mwiza!!!

Gusa byanteye amatsiko, ndavuga nti ’reka mbaririze David, menye neza imvo n’imvano y’iyi nganzo ntategereje ko mbazwa ibye n’abakunze iyi ndirimbo yise "Yarabisohoje". Niba nawe itarabisohoza, izere Imana, zirikana ibyo yagukoreye mbere, iyasohoje ibya David, ntiyigeze icika amaboko.

Nanze kugenda aka njyenyine, nibutse ko Yoabu umugaba w’ingabo za Dawidi, yanze kwitirirwa Umurwa yatsinze, asaba ko witirirwa Umwami Dawidi. Nanjye nanze kwegera David nka Frodouard, mwegera nka Paradise.rw. Nyamuneka ibya Paradise.rw tubiharire Paradise.rw kuko yabiharaniye.

David KEGA, ni umuririmbyi akaba n’umwanditsi w’Indirimbo zo kuramya no guhimbaza Imana. Ni umwe mu baramyi batangiye umurimo w’uburirimbyi mu buto bwe.

Yatangiye umurimo w’uburirimbyi ubwo yaririmbaga muri korali yo mu ishuri ryo Ku cyumweru (Sunday School) nyuma aza kuririmba muri korali yitwa El Shadai ari nayo yamenyekanyemo cyane akaba n’umwe mu bacuranzi beza ba Solo. Aba baririmbyi bazwi mu ndirimbo "Cikamo".

Nyuma yo gukora umurimo w’Imana imyaka myinshi muri Korali, KEGA yakomeje kwiyumvamo umuhamagaro w’uburirimbyi ku giti cye, nk’uko na benshi mu nshuti ze za hafi zamubonagamo uwo muhamagaro.

David Kega yaje gufata umwanzuro wo kuririmba ku giti cye, asohora indirimbo yitwa "Yarabisohoje".

Mu kiganiro yagiranye na Paradise.rw, yagize ati "Yarabisohoje ni indirimbo ya mbere kuri Album yitwa IZUBA RYA NIJORO. Ni indirimbo nakuye mu ijambo ry’Imana riri muri Luka 1:37 rivuga riti "Kuko ari nta jambo Imana ivuga ngo rihere!!".

David Kega yakomeje agira ati "Nahuje iri jambo ry’Imana n’ubuhamya bw’inshuti ze zajyaga zimbwira uburyo Imana yagiye ibaha amasezerano mu gihe kigoye cyo kuyizera, none ikaba "Yarabisohoje nk’uko yabivuze".

Ni umuhanga cyane mu miririmbire, bikaba bisanzwe kuri we dore ko ari umutoza w’amajwi muri EL Shaddai

Iyi ndirimbo ikaba imwe mu ndirimbo zanditse neza ndetse inakoze mu buryo bugezweho bwa gihanga. Ikindi wayimenyaho, ni indirimbo bigaragara ko yamutwaye ubushobozi buhambaye.

Ni indirimbo yakoze mu buryo bw’amajwi na Producer Nicolas, amashusho akorwa na Musinga (Director). Ni imwe mu ndirimbo bigaragara ko yanyuze mu biganza bya equipe nini, y’abantu barenga 25.

Uyu muramyi ahamya ko ubutumwa bw’amashimwe buhora bukomenga ku ndiba y’umutima we, ahanini bitewe n’imirimo itarondoreka Imana yakoze ku buzima bwe mu bihe bitandukanye.

Yagize ati: "Ndashima Imana yangiriye icyizere ikampesha ubutumwa bwayo bwera". Yongeye gushima Imana ku bw’abantu b’umugisha ikomeje kumuhuza nabo barimo abanyamakuru basakaza ubutumwa bwiza buganisha mu guhindurira abantu ku kwizera umwami Yesu Kristo.

David Kega avuga ko ahora azirikana ibihe byiza yagiye agirira ku ruhimbi, by’umwihariko igitaramo cyabereye mu gihugu cya Uganda, Imana ikabakoresha iby’ubutwari.

Ni umwe mu baramyi badahangayikishijwe n’imbogamizi n’ibicantege bitera benshi kuva mu muhamagaro, kuko ahamya ko mu gihe gikwiriye Imana yatangije urugendo ikora ibikomeye.

David KEGA avuga ko nyuma y’iyi ndirimbo ateganya gusohora izindi ndirimbo nyinshi, mu rwego rwo gutegura album y’indirimbo hagati ya 7 ndetse na 10, akaba yizeza abakunzi be ko uyu mwaka ateganya gusohora nibura indirimbo eshanu.

Kega arategnya ko uyu mwaka uzarangira yarashyize hanze indirimbo 5 ziri kuri Album ye ya mbere

RYOHERWA N’INDIRIMBO "YARABISOHOJE" YA DAVID KEGA