Itorero Living Word Temple riri mu myiteguro yo kuva i Kigali ahari icyicaro gikuru, rikamanuka i Huye mu mu giterane kizaba kihabereye ku nshuro ya mbere, kizaririmbamo amakorari n’abahanzi bakomeye barimo na Theo Bosebabireba.
Kizaba ku wa 23 Werurwe 2024, mu kibuga cy’umupira giherereye hafi y’i Centre ya Mugogwe, mu Murenge wa Rusatira, mu Karere ka Huye, kuva saa Mbili kugera saa Kumi n’Ebyiri. Mu rwego rw’itorero, ni muri Paruwasi ya Save, dore ko n’amwe mu makorari azaririmba harimo ay’i Save mu Karere ka Gisagara.
Ni igiterane gifite umutwe uvuga ngo ‘Kubaka Umurimo’ ushingiye ku magambo aboneka muri Nehemiya 2: 18 hagira hati: “Mbabwira ukuboko kw’Imana yanjye uburyo kwangiriye neza, mbabwira n’amagambo umwami yambwiye. Baravuga bati; “Nimuhaguruke twubake.” Nuko biyungamo bagira imbaraga zo gukora uwo murimo mwiza.”
Amakorari azaririmbamo ni abiri yo muri Paruwasi ya Save, ni ukuvuga Korari Ituze na Korari Philadelifia. Si yo gusa azaba ahari kuko na Sauti Hewani Ministries (Ijwi Riranguruye) yahuriye ku ruhimbi na Rose Muhando mu bitaramo bya Dana Morey yakoreye muri Kirehe izaba ihari.
Sauti Hewani Ministries imaze kubaka izina nyuma y’umwaka imaze itangiye ivugabutumwa mu buryo bwagutse, dore ko yabanje kuba korari muri Bethisaid Holy Church. Sawuti Hewani iri ku rwego mpuzamahanga aho ifite abaririmbyi bageze kuri 80 bari mu gihugu cy’u Rwanda n’abandi bari mu bindi bihugu. Iyi rero ni yo yatumiwe ngo izaze kwifatanya n’ayo yandi abiri yo muri Save.
Hazaba kandi hari n’abahanzi batandukanye barangajwe imbere na Theo Bosebabireba, Karabokimana Patrick, Harerimana Etienne, Angelique Nyirabahire na Celine Mukakanani.
Mu bavugabutumwa bazigisha Ijambo ry’Imana harimo nyiri ugutegura iki giterane, uzakira aba batumirwa bose, ari na we uhagarariye iri torero Living Word Temple, ururembo rw’Intara y’Amajyepfo, Rev. Rugamba Erneste, Pasiteri Ntigurirwa Anastase uhagarariye Paruwasi ya Save izabakira, Rev. Dusabeyezu Jean Aime (umushyitsi) na Ev. Semanza Jean Bosco (umushyitsi).
Mu kiganiro Paradise yagiranye na Rev. Rugamba Erneste uzaba ari umuhuza (cyangwa umusangiza w’amagambo MC), yavuze icyo abantu bakwitega muri iki giterane agira ati: “Abantu bazahabwa ubutumwa bwiza, bakire Yesu nk’Umwami n’Umukiza mu bugingo bwabo, bihane ibyaha byabo, bityo bazabone ubugingo buhoraho.”
Nk’uko Rev Rugamba yabitangarije Paradise, iri torero ryashinzwe na Bishop Karagire Kaniziyo, ritangirira mu Mugi wa Kigali. Kuri ubu rigenda rigaba amashami hirya no hino, aya mbere akaba yaratangijwe mu Karere ka Gisagara (Save) kandi no muri Huye iki giterane kizasiga amahirwe yo kuba hatangizwa irindi, mu buryo bwo kubaka umurimo nk’uko intego y’igiterane ivuga.
