Mu byamamare byose byitabiriye ubu bukwe, Israel Mbonyi uririmba indirimbo zo kuramya no guhimbaza Imana, ari mu bakoze ibitangaza binyuze mu kuririmba zimwe mu ndirimbo ze zakunzwe ku rwego rw’umugabane.

Kuri Jalia Mlimani mu busitani, mu Murenge wa Rusororo, mu Karere ka Gasabo, mu Mujyi wa Kigali ni ho The Ben yatangiye inkwano, aziha umuryango w’umugore we Miss Uwicyeza Pamela, nyuma ya saa kenda z’igicamunsi.

The Ben yari yambaye Kinyarwanda yaherekejwe n’ibyamamare bitandukanye, birimo Abanyarwanda urugero nka Andy Bumuntu, Igor Mabano, Israel Mbonyi n’abandi, ndetse n’abo muri Amerika urugero nk’uwari wamubereye Parrain, Jimmy inshuti ye yo muri Amerika akaba n’umuherwe w’umushoramari.

Uyu muhanzi The Ben udahwema kugaragaza uko akunda Imana, nk’uko byatangajwe, mu mihango yo gusaba no gukwa nta nzoga zari zirimo, cyane ko bamwe mu babwitabiriye bari Abakristo bo mu matorero atanywa izisembuye, urugero nka Israel Mbonyi wo muri Restoration Church.

Nyuma yo gusaba umugore we Miss Uwicyeza Pamela akamuhabwa, nyuma y’imyaka ine bakundana, The Ben yapfukamye hasi ashimira Imana, aririmba indirimbo zo kuyiramya no kuyihimbaza kandi asaba abari aho kumufasha.

Ni bwo na Israel Mbonyi, umuhanzi nyarwanda ukunzwe mu ndirimbo zo kuramya no guhimbaza Imana, umaze igihe azwi ku yitwa Nina Siri iri mu Giswayile, indirimbo izwi hafi muri buri gihugu cyo muri Afurika cyane cyane mu Rwanda no mu bihugu bikoresha Igiswayile birimo Kongo, Tanzaniya na Kenya aho yagiye iba iya mbere ku rutonde rw’izikunzwe, yahagurutse afatanya na The Ben kuyiririmba, maze abari babwitabiriye bafatanya na bo, ahari habereye imihango hasa n’ahahindutse mu rusengero.

Bafatanyije no kuririmba izindi ndirimbo za Israel Mbonyi zo mu Kinyarwanda, The Ben na we aririmba indirimbo ye yakoreye kuramya no guhimbaza Imana, indirimbo avuga ko we na mama we bakunda cyane yitwa Ndaje.

Biteganyijwe ko The Ben asohora indirimbo kuri 16 Ukuboza 2023, ikaba izabanziriza iyo azasohora yo kuramya no guhimbaza Imana. Nk’uko The Ben yabitangaje mu minsi ishize, muri ubu bukwe bwe nta nzoga zari zihari, hari ibinyobwa bidasindisha byonyine.

Israel Mbonyi afite igitaramo gikomeye kuri Noheli y’uy mwaka, akaba ari igitaramo kizabera muri BK Arena. Amatike yamaz kugera hanze, nawe wagura iyawe hakiri kare.

Israel Mbonyi yizihiye abageni n’abatashye ubukwe bose

The Ben yasabye anakwa Pamella aratungurana aririmba indirimbo ya Gospel

Israel Mbonyi arataramira abakunzi ba Gospel kuri Noheli muri BK Arena