Mu Rwanda no ku Isi hose, urubyiruko rukomeje guhura n’ikibazo cyo kutamenya icyo rushobora gukora, kutamenya abo bari bo no kudafata imyanzuro ifite icyerekezo.

Mu rwego rwo kubafasha kuva muri urwo rujijo, Ntihinduka Mordecalle uzwi nka Decalle, umutoza w’amajwi muri Shiloh Choir ya ADEPR Muhoza mu Karere ka Musanze, yatangije umushinga witwa “Life of Impact”.

Muri uwo mushinga, Decalle yashyizeho igikorwa cyihariye cyitwa “Shaping the Visionaries”, kigamije gufasha urubyiruko gusobanukirwa abo bari bo, kumenya intego zabo no gutangira kubaho ubuzima bufite impinduka nziza ku bandi.

Iki gikorwa kirimo kuramya no guhimbaza Imana, ibiganiro ku buzima n’imyanzuro, kwiga binyuze mu nkuru (storytelling), ibiganiro mpaka (discussions), dialogue, Q&A ndetse no kungurana ibitekerezo ku bibazo urubyiruko ruhura na byo.

Aganira na Paradise, Decalle yagize ati: "Life of Impact ni umushinga mugari (Umbrella project) ugamije gufasha urubyiruko kwimenya, kumenya intego zabo no kubaho ubuzima bufite impact.

Uyu mushinga wubakiye ku gitekerezo cya “Worship in Mentorship” aho gukura mu by’umwuka bihuzwa n’ubujyanama bufatika ku buzima bwa buri munsi. Munsi ya Life of Impact hategurwa ibikorwa bitandukanye (gathering/programs).

"Shaping the Visionaries" ni izina rya sessions cyangwa gathering zikorwa muri uwo mushinga. Ni platform aho urubyiruko ruhurira, rukaramya, rukigishwa, rukaganira ku bibazo by’ubuzima, kandi rugahabwa ’direction’ ifatika."

Yakomeje ati: "Buri session igira theme yihariye, bitewe n’ikibazo cyangwa intego igamije gukemura muri iyo period. Urugero: Discovering Who You Are & Your Purpose, Healing & Identity, Leadership & Responsibility; and From Confusion to Clarity".

Themes zirahinduka, ariko intego ya Life of Impact iguma ari imwe: Kubaka “a community of impact” abantu bafite icyerekezo, bafite indangagaciro, kandi bafite impact muri society".

Yavuze ko ’Shaping the Visionaries’ igamije kwigisha urubyiruko ko kuramya Imana birenga imipaka yo mu rusengero, bikaba uburyo bwo kubaho neza, gufata imyanzuro y’ukuri, gukorera ku ntego, no gukorera Imana aho umuntu yaba ari hose.

Decalle yatangaje ko abazabyitabira bazunguka byinshi birimo gusobanukirwa abo ari bo, kuva mu rujijo no mu bwoba, kongera icyizere n’icyerekezo byabo, no gutangira urugendo rwo kubaho ubuzima bufite intego n’ingaruka nziza ku bandi.

Shaping the Visionaries izaba ku nshuro yayo ya mbere tariki ya 28 Werurwe 2026, aho kwinjira bizaba ari ubuntu. Ni umwanya wihariye ku muntu wese wibaza ati “Ndi nde? Intego yanjye ni iyihe?” kandi wifuza gutangira urugendo rushya rw’ubuzima bufite ingaruka nziza.

Ntihinduka Mordecalle yemeza ko umushinga wa “Life of Impact” uzafasha urubyiruko kumenya abo ari bo no gutangira kubaho ubuzima bufite intego