Mu mwaka wa 2016 Pastor Kayiranga Innocent wamamaye mu ndirimbo "Ngarutse Imbere Yawe", yatangaje ko iyi ndirimbo yamwinjirije arenga Miliyoni 20 Frw. Ni umuhanzi ukunzwe cyane muri Nyagatare na Uganda, akaba akunze kuririmba mu bukwe n’ibiterane.

Pastor Kayiranga ari mu bahanzi bazaririmba mu giterane cy’umuvugabutumwa Dana Morey gitegerezanyijwe amatsiko menshi mu Karere ka Nyagatare. Ni igiterane cyiswe icy’Ibitangaza n’Umusaruro. Cyatangiye gutegurwa muri Mata uyu mwaka. Amashyushyu ni yose ku batuye i Nyagatare.

Iki giterane cyiswe cyateguwe n’umuryango A Light to the Nations Africa Ministries uyoborwa ku Isi na Ev. Dr Dana Morey, naho muri Afrika akaba ari Pastor Dr. Ian Tumusime. Mu minsi 3 kizamara, kizabera mu kibuga cy’umupira cya Rukomo, mu Murenge wa Rukomo, mu Karere ka Nyagatare. Kwinjira ni ubuntu ku bantu bose ndetse nta rungu rizahaboneka kuko abazitabira bazataramirwa n’abahanzi b’ibyamamare.

Umuvugabutumwa w’umunyamerika, Dana Morey, niwe uzigisha ijambo ry’Imana muri iki giterane ndetse amakuru inyaRwanda yamenye ni uko yamaze gusesekara muri Nyagatare. Abahanzi nabo bari kuhagera, abo akaba ari Theo Bosebabireba, Rose Muhando, Pastor Kayiranga Innocent ukunzwe cyane i Nyagatare ndetse n’amakorali 10 ariteguye.

Mbere y’uko iki giterane kiba, A Light to the Nations (aLn) yakoze ibikorwa bitandukanye by’ubugiraneza mu gufasha abaturage b’Akarere ka Nyagatare kaberamo iki giterane. Ibi bikorwa byabereye mu Mirenge 8 yo muri aka Karere, birahura n’intero ya aLn igira iti "Roho Nzima mu Mubiri Muzima".

Ubusanzwe aLn igira inkingi 3 igenderaho. Inkingi ya mbere ni ukubwiriza abantu ubutumwa bwiza hagamijwe kubazana ku Mwami Yesu Kristo. Inkingi ya kabiri ni ugushyigikira cyangwa gutera intege umubiri wa Kristo cyangwa Itorero rya Kristo. Inkingi ya gatatu ni ugufasha abakene.

Rev. Baho Isaie uri mu itsinda riri gutegura iki giterane cy’i Nyagatare, yatangarije itangazamakuru bimwe mu bikorwa byacyibanjirije. Yavuze ko "umuvugabutumwa Dana Morey ni we uzigisha, niwe duteguriye kugira ngo aze abwirize ubutumwa bwiza".

Yanahishuye abandi baririmbyi bazaririmba muri iki giterane nyuma y’uko abari bazwi ari Rose Muhando na Theo Bosebabireba ari nabo basanzwe baririmba mu biterane hafi ya byose bya aLn. Urugero rwa hafi ni igiterane cy’amateka baherutse guhuriramo i Burundi.

Abandi banyamuziki biyongereye mu bazaririmba i Nyagatare ni Stella Manishimwe, Pastor Kayiranga Innocent wo muri Nyagatare, n’amakorali icumi, worship team y’abaririmbyi bishyize hamwe bo mu matorero atandukanye muri Nyagatare, "urumva ni ibintu byiza pe".

Rev Baho Isaie ati "Ibyo byose bateguwe na A Light to the Nations ifatanyije n’amatorero yose ndetse n’Akarere ka Nyagatare". Yavuze kandi ko byagizwemo uruhare n’Imirenge 8 yabereyemo ibikorwa binyuranye byabanjirije iki giterane cy’Ibitangaza n’Umusaruro.

Mu bikorwa byabanjirije iki giterane cy’i Nyagatare harimo ubukangurambaga bwo kurwanya ibiyobyabwenge mu Mirenge 8 irimo Nyagatare, Rukomo, Katabagemu, Tabagwe, Mimuli, Mukama, Gatunda n’iyindi. Ubusanzwe, Akarere ka Nyagatare kagizwe n’Imirenge 14.

Ubu bukangurambaga bwabereye mu bigo by’amashuri yose abanza n’ayisumbye agize iyo mirenge, ndetse no mu ma senteri atandukanye. Aho hose hatangiwe ubutumwa bwiza bwa Yesu Kristo. Hatanzwe kandi imipira y’amaguru mu gufasha abana gukora siporo no kuzamura impano zabo, kandi buri kigo cyose cyahawe imipira itari munsi y’itanu; iy’amaboko n’iy’amaguru.

Ati "Na nyuma yaho twagize ikindi giterane kuri stade ya Nyagatare aho bafatanyije n’urubyiruko rwo mu Karere ka Nyagatare, inzego z’umutekano, Akarere n’Abapasitori, aho hose haba ibyo bikorwa ariko harimo n’Ijambo ry’Imana. Pastor Dr Ian ni we wigishije uwo munsi kuri stade".

Yavuze ko aLn yubatse kandi inzu ebyiri zubakiwe abatishoboye. Imwe yubatswe mu Murenge wa Rukomo, indi yubakwa muri Karama, ndetse basannye ikiraro giherereye muri Cyabayaga n’ikindi cyambuka kijya ku mashuri ya Rukomo ndetse n’ikindi cyambuka kijya mu kibuga kizaberamo iki giterane mu mpera z’iki cyumweru guhera kuri uyu wa Gatanu.

Rev Baho ati "Turiteguye, umuvugabutumwa (Dana Morey) arabanza hano ndetse yamaze kuhagera, abahanzi nabo barimo baraza, hasigaye nyine gutangira ku munsi w’ejo hanyuma tugasoza ku cyumweru".

Yibukije ko nyuma yo gukorera ivugabutumwa i Nyagatare, bazahita bimukira muri Bugesera mu cyumweru gitaha (tariki 14-16 Nyakanga). Igiterane kizajya gitangira buri munsi saa munani ariko hari na Seminari y’Abizera izajya igitangira mu gitondo kuva saa Mbiri kugeza saa Sita.

Abazitabira ibi biterane byombi bazahembuka mu buryo bw’Umwuka ariko kandi bamwe muri bo bazanagira amahirwe yo gutahana mu rugo ibikoresho bitandukanye by’agaciro kenshi birimo moto, telefone, igare, televiziyo n’ibindi binyuranye. Hazatangwa kandi impano zirimo inka n’ihene. Kujya mu banyamahirwe, birasaba kugera kare aho ibi biterane bizabera, nibura saa Saba z’amanywa.

Stella Manishimwe ategerejwe i Nyagatare

Pastor Kayiranga arakunzwe cyane i Nyagatare

Ev. Dana Morey ari kubarizwa i Nyagatare

Imyiteguro igeze ku 100%

Bateruye isengesho basabira iki giterane cy’i Rukomo