Ubutumwa bwe bwari bukomeye, busaba kureba ku kuri, ubutabera, n’igisubizo kirambye kuri iyi ntambara imaze imyaka myinshi. Nk’Abakristo, duhamagarirwa gukunda ubutabera, kugira impuhwe no kugenda twicishije bugufi imbere y’Imana (Mika 6:8).

Imizi y’ikibazo: Ubutabera bwarahindanyijwe

Intambara yo muri RDC yateje akarengane n’ubuhunzi ku bantu ibihumbi, by’umwihariko abavuga Ikinyarwanda barenganywa buri munsi.

Perezida Kagame yagaragaje ko u Rwanda atari rwo rwatangije iyi ntambara, ati:
“Iyi ntambara mubona nta bwo yatangijwe n’u Rwanda, yatangijwe na RDC. Aba bantu bari kurwanira uburenganzira bwabo nta bwo baturutse hano [mu Rwanda].”

Ibi biduha umukoro nk’Abakristo. Bibiliya iratwigisha iti: “Bumbura akanwa kawe uvugire ikiragi, Kandi uburanire abatagira shinge na rugero. Bumbura akanwa kawe uce imanza zitabera, Ucire abakene n’indushyi urubanza rutunganye.” (Imigani 31:8-9).

Tugomba kuvuga ukuri, tukamagana akarengane gakomeje gukorerwa abantu b’inzirakarengane muri RDC bimwa uburenganzira ku gihugu cyabo.

Ukuri kuruta ibinyoma

Perezida Kagame yanenze bamwe mu banyapolitiki n’imiryango mpuzamahanga bagoreka ukuri bagamije inyungu zabo.

Hari benshi bagaragaza impungenge gusa ari uko ibibazo bigeze mu bihe by’amage, nyamara bakirengagiza akarengane k’igihe kirekire.

Yesu ubwe yatubwiye ko ukuri kuzadukiza (Yohana 8:32). Icyo dusabwa ni uguharanira ukuri, ntitwemere gukurikira ibinyoma no gukwirakwiza ibitekerezo bidafite ishingiro.

Icyo Itorero rigomba gukora

Muri iyi ntambara ya M23 na DRC, Abakristo benshi barababaye. Amatorero yarasenywe, abayoboke baratatanye, ndetse aho basengeraga habuze umutekano.

Nyamara Bibiliya itwizeza ko Imana yumva gusenga kw’abayo: “Abakiranutsi baratatse Uwiteka arabumva, Abakiza amakuba n’ibyago byabo byose.” (Zaburi 34:18).

Kiliziya n’itorero bigomba guhaguruka nk’ijwi ry’amahoro. Yesu yaravuze ati: “Hahirwa abakiranura, Kuko ari bo bazitwa abana b’Imana.” (Matayo 5:9).

Ntidukwiye kurebera akarengane n’amasengesho gusa, ahubwo tugomba no gukora ibishoboka byose kugira ngo amahoro asagambe.

Ibyo tugomba gukora nk’Abakristo

Ubutumwa bwa Perezida Kagame buduhamagarira kutarebera ahubwo tugaharanira ibisubizo nyabyo.

Pawulo yanditse ati: “Irya mbere ya byose ndaguhugurira kwingingira abantu bose, no kubasengera no kubasabira no kubashimira, ariko cyane cyane abami n’abatware bose kugira ngo duhore mu mahoro tutabona ibyago, twubaha Imana kandi twitonda rwose.” (1 Timoteyo 2:1-2).

Dufite inshingano nk’Abakristo:

• Gusenga tutizigamye kugira ngo Imana igire icyo ikora kuri iki kibazo.
• Guharanira ukuri no kwamagana ibinyoma bikwirakwizwa ku Rwanda n’akarengane gakorerwa abavandimwe bacu.
• Kugirira impuhwe impunzi n’abababaye muri RDC n’ahandi hose.
• Gushyigikira ubutabera dukora uko dushoboye mu guharanira amahoro arambye.

Icyizere cy’amahoro: Imana izadukiza

Nubwo ibintu bisa nk’ibigoranye, dufite icyizere ko Imana izagarura amahoro. Bibiliya igira iti: “Azacira amahanga imanza, azahana amoko menshi. Inkota zabo bazazicuramo amasuka n’amacumu bazayacuramo impabuzo, nta shyanga rizabangurira irindi shyanga inkota, kandi ntabwo bazongera kwiga kurwana.” (Yesaya 2:4).

Dusabe Imana itange amahoro arambye muri RDC no mu karere kacu. Niduhagarara nk’abahamya b’ukuri, tugaharanira ubutabera n’amahoro, Imana izaduha umugisha (Amosi 5:24).

Igihe kirageze ngo duhagurukire gusengera amahoro muri Afurika no ku Isi yose!

Perezida Kagame aganira na CNN