Izo mpamvu zikwiriye gutuma udacika intege mu buzima yatangaje ni izi eshanu zikurikira:

1.Impamvu yo kubaho kwawe iraremereye kurusha ibibazo byose bikubangamiye uyu munsi.

2. Abo wibwira ko bameze neza nabo bakubwiye ibyabo wasanga ibyo wowe ufite, wita ibibazo bishobora kwihanganira cyangwa gukemuka.

3. Ibihe bihora bisimburana, nta bibi bihoraho, nta n’ibyiza bihoraho. Ejo hazakuzanira andi mahirwe azagufasha gukemura ibikubangamiye uyu munsi.

4.Hari igihe ibibazo biba ariyo mahirwe ari butume wishakamo imbarago zidasanzwe nawe ubwawe utari uzi ko wifitemo. Fata umwanya muto utekereze ku kibazo ufite, utekereze uburyo nka 3 wagikemuramo hanyuma bumwe muri bwo ubushyire mu bikorwa.

5.Gusitara ni ikimenyetso cy’uko urimo kugenda. Abaguye cyangwa abaryamye ntibasitara. Ikande aho usitaye, ubundi ukomeze ugende wirinde kongera gusitara aho wasitaye mbere.

Mu mwanya w’ahatangirwa ibitekerezo, abakunzi be bamushimiye babikuye ku mutima ku bw’ubwo butumwa busubiza imbaraga mu buzima.

Muri abo harimo n’Umuhanzi w’icyamamare mu Rwanda The Ben uri no gutegura gukora ubukwe muri iyi minsi.

Hari uwagize ati:“Amagambo meza arimo umuti kabisa, uri muganga pe! Kandi ibyo tunyuramo biruhije ni iby’igihe gitoya ntibihoraho.”

Abandi bamushimiye, bashyiraho udutima n’ibindi bigaragaza ko batewe imbaraga n’aya magambo.
Mu mwaka wa 2012 na bwo yasohoye indirimbo nziza cyane yise Komeza Utsinde aho aririmba avuga ko iyo umuntu ari kugera ku ntsinzi abantu bamwakaga ariko yakomeza bakamukunda.

Ati:“Ntawe uzakwanga nugumya gutsinda, burya bakwangira ko utsinda, uzabaze impamvu abakwanga impamvu bakwanga, burya bakwangira ko utsinda, komeza utsinde nshuti, ...”

Tom Close ni umuhanzi nyarwanda ariko mu buzima busanzwe ni dogiteri mu buganga. Izina rye nyakuri ni Dr Muyombo Thomas akaba Umuyobozi Mukuru w’Ikigo cy’Igihugu cyo gutanga amaraso (NCBT) kandi kuri ubu ni umwe mu bavuga rikumvikana mu Rwanda.