Itsinda ry’abaririmbyi b’indirimbo zo kuramya no guhimbaza Imana ribarizwa muri ADEPR Nyakabanda-Kicukiro ryasohoye indirimbo nshya yitwa "Hembura", ishingiye ku nkuru yo muri Nehemiya 1:1-8. Iyi ndirimbo, iri kumwe n’amashusho yayo meza, itanga ubutumwa bw’ihumure, kwihana no gusubizwaho n’Imana.

Amagambo y’iyi ndirimbo "Hembura" akomoka ku nkuru ya Nehemiya, umugabo wamenye ko Yerusalemu yasenyutse, akababara cyane, akarira, akiyiriza ubusa, agasenga Imana ngo igirire imbabazi abantu bayo kandi iyubake bundi bushya. Uyu murongo werekana ukuntu Nehemiya yari afite umutima wita ku gihugu cye n’ukwizera gukomeye mu masezerano y’Imana.

Binyuze muri iyi ndirimbo, iri tsinda ry’abaririmbyi ryifuza kwibutsa abantu imbaraga z’isengesho, ukwihangana no kwizera Imana mu bihe bigoye.

Erneste Rutagungira, umuyobozi uhagarariye iryo tsinda, aganira na Paradise yagize ati: “Twizeye ko Hembura izakora ku mitima ya benshi kandi ikabatera gukomeza gushaka Imana mu bihe bikomeye, nk’uko Nehemiya yabigenje.”

Iri tsinda, rizwiho indirimbo zo guhimbaza zuzuye ihumure n’ubutumwa bukomeza imitima, rikomeje kugira uruhare rukomeye mu iterambere ry’umuziki wa Gikristo haba mu Rwanda no hanze yarwo. Indirimbo yabo nshya ubu iraboneka ku mbuga nkoranyambaga zitandukanye no ku masoko y’indirimbo zo kuri murandasi.

Ku bantu bashaka guhabwa ihumure rishingiye ku Mana, Hembura ni indirimbo ikwiye kumvwa, kuko itanga ubutumwa bw’ihumure no gusubizwamo imbaraga n’Imana mu bihe bigoye.

Fata umwanya muto wumve iyi ndirimbo, ubone ihumure rituruka ku Mana

Galed Choir, itsinda ry’abaririmbyi b’indirimbo z’agakiza ryo muri ADEPR Nyakabanda-Kicukiro, rizwiho indirimbo zo guhimbaza zuzuye ihumure n’ubutumwa bukomeza imitima