Ayo magambo agira ati:

“kuko menye neza yuko naho rwaba urupfu cyangwa ubugingo, cyangwa abamarayika cyangwa abategeka, cyangwa ibiriho cyangwa ibizaba, cyangwa abafite ubushobozi, cyangwa uburebure bw’igihagararo, cyangwa uburebure bw’ikijyepfo, cyangwa ikindi cyaremwe cyose, bitazabasha kudutandukanya n’urukundo rw’Imana ruri muri Kristo Yesu Umwami wacu.”

Yasobanuye ko hari ubwoko bubiri bw’urukundo rw’Imana. Urwa mbere ni urukundo rusange Imana ikunda abantu bose, ari na rwo rwatumye itanga Yesu Kristo kugira ngo uwamwizera wese abone ubugingo buhoraho. Urwa kabiri ni urukundo rwihariye rugenewe abari muri Kristo Yesu.

Yagize ati: "Hari abantu benshi badasobanukiwe ko bakunzwe n’Imana mu buryo budasanzwe. Imana ikunda abantu bose, ariko hari n’urukundo rwihariye ikunda abari muri Kristo Yesu."

Pastor Gisanura yavuze ko kimwe mu bibazo bikunze kugaragara mu buzima bwa muntu ari ugukunda abantu bakunda abandi. Yavuze ko urukundo rw’Imana rwo rutandukanye n’urw’abantu kuko rudahinduka kandi ko rutarangira.

Yagize ati: "Ni gake usanga ukunze umuntu na we akagukunda. Ariko Imana yo iradukunda kandi urwo rukundo ntirushira."

Yakomeje asobanura ko umuntu ukunda Yesu ahura n’urukundo rw’Imana mu buryo bwimbitse. Yavuze ko ikimenyetso cy’urukundo nyakuri umuntu akunda Imana ari ukwemera kwiyima ibintu bimwe cyangwa kwirinda ibikorwa bishobora kumutandukanya na yo.

Yagize ati: "Kimwe mu bintu bituma upima urukundo ufitiye Imana ni ibyo wiyima cyangwa ibyo wanga gukora kugira ngo utayibabaza."

Mu gusoza, Pastor Gisanura yasabye abantu kwegera Yesu Kristo no kumusaba kuba hafi yabo, avuga ko kubana na Kristo bituma umuntu yinjira mu rukundo rwihariye rw’Imana.

Yatanze urugero rw’igice cya matera kiri mu mazi, agira ati: "Imibanire yacu na Yesu imeze nk’igice cya matera kiri mu mazi. Icyo gice kiba kiri mu mazi, amazi na yo akakibamo."