Umuhanzikazi w’indirimbo zo kuramya Imana wo muri Tanzaniya, Rose Muhando, yahakanye amakuru yavugaga ko yashyingiranywe n’umuvugabutumwa wo muri Kenya witwa Robert Lumbasi, nyuma y’uko uyu muvugabutumwa atangaje ku mugaragaro ko bamaze kurushinga.

Robert Lumbasi yari yatangaje ko yishyuriye inkwano ya Rose Muhando muri Tanzaniya mu mwaka wa 2023, anavuga ko bashyingiranywe mu ibanga. Mu rusengero, yari yamuvuzeho nk’“umubyeyi w’abana be” ndetse avuga ko ari n’“uwo Imana yamuhitiyemo,” bikaba byaratumye benshi batekereza ko koko ari umugore we.

Icyakora, mu kiganiro Rose Muhando yagiranye n’umunyamakuru ku wa 15 Mutarama 2026, yahakanye ayo makuru avuga ko nta gushyingiranwa guhari. Ati: “Oya, oya, nta kintu nk’icyo gihari.” Yongeyeho ko ari umwana w’Imana n’umukozi wayo, kandi ko iyo hari ikintu kimwerekeyeho, adatinya kukivuga ku mugaragaro.

Rose Muhando yanibukije ko akiri gushaka umugabo w’umuzungu (Mzungu) wifite kandi umukunda by’ukuri, avuga ko ataramubona kugeza ubu. Aya magambo ye yatumye abakoresha imbuga nkoranyambaga bagira urujijo n’urwenya, bamwe batangazwa n’uko inkuru ihindutse, abandi bagaragaza gutungurwa.

Nubwo Robert Lumbasi yari yatangaje ko bashyingiranywe, Rose Muhando we ashimangira ko atarashaka kandi ko ayo makuru atari yo, bikomeza guteza impaka mu bakunzi be n’abakurikira inkuru z’imyidagaduro.

Rose Muhando yahakanye ibyo kuba yarashyingiranywe na Lumbasi w’umuvugabutumwa muri Kenya

Robert Lumbasi yari yatangaje ko bashyingiranywe Rose Muhando arabihakana