Mu butumwa yashyize ku mbuga nkoranyambaga zabo, Alicia yagize ati: “Mana nkunda, ndagushimiye ku bwa murumuna wanjye. Murinde mu nzira zose anyuramo, uburinzi bwawe bumubeho, wuzuze iminsi ye ibyishimo, uyobore intambwe ze, urinde umutima we, kandi umugisha wawe umukurikirane aho azajya hose. Akurire mu bwenge, mu rukundo no mu mbaraga. Amen.”

Abakunzi babo n’abandi bakurikirana ibikorwa byabo mu muziki wa Gospel bifatanyije na Alicia, bifuriza Germaine Ufitimana isabukuru nziza y’amavuko, bamwifuriza imigisha myinshi n’iterambere mu buzima n’umurimo w’Imana.

Uretse ibi byishimo byo mu muryango, Alicia na Germaine, bazwi nk’abahanzi b’abaramyi bakomeje kuzamuka mu muziki wa Gospel mu Rwanda, bari no mu myiteguro yo gukomeza gushimisha abakunzi babo binyuze mu bihangano bishya.

Aba bavandimwe babiri b’abakobwa bagiye gusohora indirimbo nshya bise “Ibendera”, iri mu njyana ya Amapiano, injyana ikunzwe cyane muri iki gihe. Iyi ndirimbo yamaze kujya hanze mu buryo bw’amajwi (audio), mu gihe amashusho yayo ari hafi kurangira no gushyirwa hanze.

Nk’uko byatangajwe na Papa Innocent Ufitimana, se w’aba bakobwa, “Ibendera” ni indirimbo ifite ubutumwa bukomeye bwo guhumuriza imitima no gushishikariza abizera gukomeza guhagarara ku kwizera kwabo.

Yagize ati: “Ibendera ry’Umwami wacu Yesu ntirizigera rimanurwa. Ni indirimbo ifite ubutumwa bwo kwizera no guhumuriza imitima. Yanatunganyijwe mu njyana ya Amapiano, ku buryo n’abifuza kubyinira Imana bazibonamo.”

Yakomeje avuga ko amashusho y’iyi ndirimbo azaba afite umwihariko, agaragaza udushya tutigeze tuboneka mu zindi ndirimbo z’aba bakobwa, ashimangira ko videwo izahura neza n’ubwiza bw’amajwi yamaze gusohoka.

Alicia na Germaine bakomoka mu Karere ka Rubavu mu Ntara y’Uburengerazuba, bamaze igihe gito mu muziki, ariko ibikorwa byabo byamaze gutuma bagira izina rikomeye mu ndirimbo zo guhimbaza Imana.

Mu ndirimbo zabo zakunzwe harimo “Urufatiro”, “Rugaba”, “Ihumure”, “Wa Mugabo”, “Uriyo” na “Ndahiriwe”, zose zikubiyemo ubutumwa bwo kwizera no kwiringira Imana. "Uriyo" niyo ndirimbo yabo imaze kurebwa cyane.

Uretse impano mu muziki, aba bakobwa banashyize umunzani uringaniye hagati y’ubuhanzi n’amashuri. Alicia yiga ubuvuzi muri Kaminuza y’u Rwanda, Ishami rya Huye, mu gihe Germaine yiga Literature, French na Kinyarwanda (LFK). Nubwo ari abanyeshuri, bemeza ko umuziki bawufata nk’ubutumwa, kandi bazakomeza kuwukora uko babishoboye.

Indirimbo “Ibendera” itegerejweho kongera kwerekana icyerekezo gishya mu muziki wa Gospel mu Rwanda, aho injyana ishimishije ihuzwa n’ubutumwa bwimbitse bwo mu mwuka. Abenshi bayitezeho gukomeza guhumuriza imitima no gushimangira ukwizera kw’abayumva.

Mu gihe abakunzi babo bakomeje gutegereza amashusho yayo, biragaragara ko Alicia na Germaine bakomeje kuba icyitegererezo cy’urubyiruko, bagaragaza ko bishoboka guhuza impano, ukwiga n’umurimo w’Imana, byose bigakorwa mu murongo umwe w’icyerekezo n’urukundo rwo gukorera Imana.

Alicia yifurije murumuna we Germaine isabukuru nziza

Germaine yavutse ku wa 18 Ukuboza

Bari hafi gushyira hanze amashusho y’indirimbo Ibendera, amajwi yo wayumva nonaha kuri YouTube