Umuhanzikazi w’icyamamare mu Rwanda, Jesca Mucyowera yateguye igitaramo cy’amateka “Restoring Worship Xperience”, cyitezweho gusubizaho intege mu bugingo bw’abizera mu Rwanda, akaba yaragitumiyemo umunyempano utangaje Emma Rwibutso.
Umuririmbyi w’indirimbo zo kuramya no guhimbaza Imana, Jesca Mucyowera, yateguye igitaramo cyihariye cyiswe “Restoring Worship Experience” giteganyijwe kubera i Kigali ku wa 2 Ugushyingo 2025, kikazabera Camp Kigali (Kigali Conference and Exhibition Village) kuva Saa Kumi z’umugoroba (4PM) kugeza Saa Yine z’ijoro (10PM).
Iki gitaramo kizaba ari umwanya udasanzwe wo kongera gufasha abakunzi b’indirimbo zo kuramya n’abaririmbyi banyuranye kugaruka ku isoko y’ukuri yo gusenga. Indirimbo ze ziryoshye, abaramyi bandi yatumiye n’ijambo ry’Imana rizagaburwa na Apotre Mignonne bizafasha abazitabira guhembuka cyane mu buryo bw’Umwuka.
Iki gitaramo, cyateguwe na Jesca Mucyowera, kizaririmbamo abaramyi barimo Rwibutso Emma uherutse gushyira hanze Indirimbo nshya "Rukundo" yakoranye na Bosco Nshuti. Emma Rwibutso ni umuririmbyi n’umuyobozi w’ibikorwa byo kuramya uzwi mu ndirimbo zifasha abantu kwegera Imana no kongera gusubizwa imbaraga zo kuyishimira.
Rwibutso Emma amaze umwaka umwe mu muziki, ariko akomeje gufata bugwate abakunzi b’umuziki wa Gospel. Agiye kuririmba muri iki gitaramo cya Jesca nyuma yo gutaramana na Bosco Nshuti muri “Unconditional Love - Season 2”, akerekwa urukundo rwinshi.
Nk’uko byatangajwe n’abategura iki gikorwa cya Jesca, "Restoring Worship Xperience" igamije guhuza abantu b’ingeri zose mu mwuka wo kuramya Imana no kugarura ubusabane n’ubwiyunge mu mitima y’abakunzi b’umuziki wa gospel. Kizaba kirimo ibihe by’amasengesho, indirimbo z’umwimerere, n’ubutumwa bukangura imitima.
Amatike y’iki gitaramo yamaze kujya ku isoko, aho Regular ari 5,000 Frw, VIP 10,000 Frw, VVIP 20,000 Frw, VIP Table 25,000 Frw, na ho Table of 10 igura 200,000 Frw. Abashaka kuyagura bashobora kuyabona binyuze ku rubuga rwa www.mucyowera.rw cyangwa bagakoresha kode ya USSD *662*104#.
Iki gitaramo gishyigikiwe n’abafatanyabikorwa batandukanye barimo Dove Hotel, Beta Paints, Gospel Today, InyaRwanda.com, Authentic Radio, Sibo, Zabuco, Eagle Art, TV1, na GTV, bose biyemeje gushyigikira umurimo wo kuzamura urwego rw’ugusenga binyuze mu muziki.
“Restoring Worship Experience” ni kimwe mu bitaramo bitegerejwe cyane muri uyu mwaka, kikaba giteganyijwe gusiga imbuto nziza mu mitima y’abazacyitabira.
Jesca Mucyowera, uzwiho kuririmba indirimbo zifite ubutumwa bwo gukomeza no guhumuriza, yizeza abazitabira ko bazasohoka bahindutse, bafite icyerekezo gishya cyo gusenga Imana mu kuri no mu mwuka.
Ubu butumire ni umwanya udasanzwe wo kongera guhura n’Imana mu buryo bwihariye kandi butazibagirana.
Emma Rwibutso mu gitaramo cya Jesca Mucyowera
Jesca Mucyowera agiye gukora igitaramo gikomeye
RYOHERWA N’INDIRIMBO NSHYA YA EMMA RWIBUTSO
