Nk’uko byatangajwe na nyirayo, indirimbo Nimekuona ni indirimbo yo gushima Imana no guhamya imirimo yayo igaragara kandi ifatika. Mu butumwa yanyujijwe ku mbuga nkoranyambaga ayisangiza, yavuze ko “imirimo y’Imana igaragara, iboneka kandi ikaba ifatika.” Ati “Imana yacu twayibonye mu bihe byinshi bitandukanye.”

Indirimbo Nimekuona, yanditswe kandi iririmbwe mu Giswayile, bikaba ari bimwe n’ibikorwa n’abaramyi Vestine & Dorcas bagiye muri uwo muvuno. Nimekuona, ifite ibisobanuro bikomeye.

Mu nyikirizo yayo, umuhanzi agaragaza ubuhamya bwo kubona Imana ikingura “imiryango ikomeye y’ibyiza”, ku buryo n’abanzi bagira ubwabo bakavuga bati: “Uyu ni umwana w’Imana.”

Mu kiganiro Gisa Claudine yagiranye na Paradise, yasobanuye ko izina Nimekuona risobanura “narakubonye”, ashimangira ko impamvu nyamukuru yo kuyisohora ari ugushimira Imana no guhamya gukomera kwayo. Indirimbo igaruka ku buryo yabonye Imana ikora mu buzima bwe, imukingurira amarembo y’imigisha n’ibyiza bitandukanye.

Uyu muhanzi yanavuze ko abakunzi be bakwiriye ibyiza, akaba abateganyirza byinshi, kuko ateganya kubagezaho ibindi bihangano byinshi byiza mu minsi iri imbere.

Nimekuona yakozwe mu majwi na Martin Mugisha, na ho amashusho ayoborwa na Karenzo. Ni indirimbo ya Gospel yo mu Giswayile yibutsa abantu ko Imana ihora ari nziza kandi ko idahinduka.

Gisa Claudine ni umwe mu bahanzi ba Gospel bafite izina rimaze kumenyekana, aho kuri YouTube afite indirimbo zakunzwe n’abarenga ibuhimbi amagana, harimo Aho Wansize, Nabonye Ineza, Hakuna Machozi n’izindi zakunzwe n’ababarirwa mu bihumbi.

Reba indirimbo Nimekuona kuri YouTube