Ku wa 17 Gicurasi 2025, umuhanzikazi Antoinette Rehema ukorera umurimo wo kuramya Imana abinyujije mu ndirimbo zo kwamamaza Ubutumwa Bwiza, yasohoye indirimbo nshya yitwa “Ubibuke”.

Iyi ndirimbo ni indirimbo ifite uburemere bwihariye mu butumwa, ikaba igenewe by’umwihariko “abakozi b’Imana bo mu ibanga” – abo basengera abandi buri munsi, ariko bo ubwabo bakibagirana.

Dore impamvu 5 zatuma ushaka gutunga iyi ndirimbo muri telefoni cyangwa mudasobwa yawe:

1. Ifite amagambo agufata ku mutima n’ubutumwa budasanzwe

Mu gitero cya mbere cy’iyi ndirimbo, havugwa amagambo akomeye nk’agira ati:“Batwikorerera imitwaro yacu kandi na bo iyabo ibaremereye…”

Aya magambo asobanura neza uko abakozi b’Imana bagenda bihambiriye imitwaro y’abandi, nubwo na bo baba bafite iyabo. Buri wese wumva ari inshingano kwegera Imana, abona ko iyi ndirimbo imuvugaho.

2. Yubakiye ku isengesho ryuzuye impuhwe n’ishimwe

Indirimbo “Ubibuke” ni isengesho risabira umugisha abakozi b’Imana, ariko rinavuga ngo:
“Reka umugisha wawe ubabeho, ku bwo kunyibuka bagahora batakamba ku bwanjye”
Ni ijwi rivugira abasengera abandi, abo basengera ntibabibone, ikaba ari indirimbo ivugira benshi mu buryo butari busanzwe.

3. Ifite umwimerere mu njyana no mu miririmbire

Antoinette Rehema azwiho kuririmba mu buryo buhumuriza umutima. “Ubibuke” na yo irimo injyana isukuye, amajwi ateguye neza (Audio yakozwe na Loader), n’amashusho akurura amaso yafashwe na Santos Grial Baguela.

4. Igaragaza agaciro k’abakorera Imana mu bwiru

Indirimbo igira iti:“Bahoza ibipfukamiro byabo mu butayu… batungishije benshi cyane ku bw’umuhate wabo.” Ibi bigaragaza akamaro k’abantu basenga mu mutuzo, batavuga menshi, ariko bagahindura isi binyuze mu bwitange.

5. Ni indirimbo izagufasha gutekereza no gusengera abandi

“Ubibuke” si indirimbo yo kumva gusa, ahubwo ni n’isengesho. Ukimara kuyumva, ushobora guhita wumva uhamagariwe gusengera undi, cyangwa kwibuka gusengera “abagusengera.”

Nyirayo ni umuntu ushimira!

Antoinette Rehema yashimiye abamufashije barimo TFS (Trinity For Support), Frodouard Uwifashije, Patrick Nishimwe, n’abandi. Iki ni ikimenyetso ko ari umurimo wubakitse ku bufatanye bw’abafite umutima umwe wo kwamamaza Imana.

Reba indirimbo “Ubibuke” ya Antoinette Rehema kuri YouTube, kandi nurangiza kuyumva, ushobora guhita uyishyira muri “Favorites” cyangwa ukayikuramo ukayitunga, kuko ni indirimbo yo kubika iteka.

Uyu muhanzikazi ni umwe mu bahanzi bakora umuziki nyarwanda wo kuramya Imana batuye muri Kanada. Indirimbo ze, kuzitunga biba ari umugisha