Abanyamuryango ba AGT bunamiye abarenga ibihumbi 250 bashyinguye mu Rwibutso rwa Gisozi bishwe muri Jenoside yakorewe Abatutsi, basobanurirwa birambuye amateka asharira y’u Rwanda, abayobozi babi bakoreshaga politike mbi y’urwango, amacakubiri n’umujinya.

Iyo politike mbi yagejeje igihugu cy’u Rwanda kuri Jenoside yakorewe Abatutsi yaranzwe n’ubwicanyi ndengakamere bwambitse u Rwanda igisebo, abatutsi barenga Miliyoni bakicwa bazira akarengane mu gihe gito bazira uko bavutse, induru n’umuborogo bigakwira igihugu.

Mu kanya ko kwigishwa no kwitekerezaho, abitabiriye igikorwa cya All Gospel Today cyo kwibuka ku nshuro ya 29 Jenoside yakorewe Abatutsi, bongeye kwerekwa uburyo iyi politiki mbi yacengeye abenegihugu kugeza n’aho abihaye Imana, abashumba, amadini n’amatorero ndetse n’abayobozi b’Imiryango ikorana bya hafi n’amatorero, bishyoye muri ubwo bwicanyi.

Muri Jenoside yakorewe Abatutsi, abanyamadini nabo bambaye igisebo cyagejeje amadini, n’amatorero ku gutakarizwa icyizere nyuma ya Jenoside yakorewe Abatutsi, bamwe batangira kubiryozwa. Ubu bashyize imbere gushaka uko bagarurirwa cyizere.

Gusa Itorero riracyasabwa imbaraga z’umurengera ku kwigisha no kurwanya abayoboke n’abayobozi bakirangwa n’ingengabitekerezo ya Jenoside no gupfobya Jenoside yakorewe Abatutsi. 

Ibi byagarutsweho no mpanuro zatanzwe na Musenyeri Birindabagabo Alexis aho yibajije impamvu mu 1994 mu Rwanda abakristo n’abemera Imana barengaga 99 n’ibice byinshi ariko hakaba Jenoside yakorewe Abatutsi.

Umukozi wigisha akanayobora abasura urwibutso rwa Jenoside rwa Kigali ku Gisozi, nawe yabigarutseho avuga, anyomoza abavuga ko ihanurwa ry’indege ya Perezida Habyarimana ari ryo ryatumye mu Rwanda haba Jenoside yakorewe Abatutsi.

Yavuze ko Jenoside yakorewe Abatutsi ari umugambi mubi wari warateguwe kuva kera n’ubuyobozi bubi kuko iyo ndege yanaguyemo Perezida w’u Burundi ariko nta Jenoside yabaye mu Burundi mu 1994 nk’uko byagenze mu Rwanda.

Yanibukije ko mu Burundi bari bafite amoko mu 1994 ndetse n’ubu barayafite, ariko ntibageze ku bwicanyi ndengakamere nk’ubwabaye mu Rwanda muri Jenoside yakorewe Abatutsi muri Mata 1994. Kubura ubumuntu kw’abaturage bagaha intebe urwango babibwemo n’ubuyobozi bubi nibyo batumye umuturanyi yica mugenzi we wamugabiye, basangiye banasenganaga.

Umukoro ukomeye amatorero, amadini, abahanzi n’Itangazamakuru bya Gikristo bafite, harimo kwimakaza ubumuntu, bakaba abakristo atari ku izina gusa, bagahangana n’ingaruka za Jenoside yakorewe Abatutsi, bakarwanya ingengabitekerezo ya Jenoside haba mu butumwa butambutswa mu baririmbyi n’inkuru zandikwa n’izo bavuga mu bitangazamakuru binyuranye.

Abakristo n’abanyarwanda bose muri rusage, bakwiriye kunyomoza no kwamagana abifashisha imbuga nkoranyambaga, bagapfobya Jenoside yakorewe Abatutsi.

Umuryango All Gospel Today wateguye igikorwa cyo kwibuka Jenoside yakorewe Abatutsi, washinzwe mu 2013, ukaba uhuza abakozi b’Imana barimo abashumba b’amatorero, abanyempano barimo abaririmbyi, abatunganya umuziki, abanyamakuru ba Gospel, ndetse abayobozi b’amatsinda atandukanye y’abaririmbyi na za Ministeri zitandukanye.

AGT bunamiye abazize Jenoside yakorewe Abatutsi

Ubwo All Gospel Today bari basuye urwibutso rwa Jenoside rwa Kigali