Ni igitaramo cyari cyiswe Icyambu Live Concert Edition 2 kuko Edition 1 yabaye mu mwaka ushize wa 2022, muri iyo nzu ya Kigali BK Arena kitwa Icyambu Live Concert edition 1. Igitaramo cyo muri uyu mwaka w 2023 nacyo cyitabiriwe bikomeye, BK Arena iruzura.

Cyitabiriwe n’abarenga ibihumbi 10 kuko Arena yakira ibihumbi 12 gusa. Muri bo hari harimo abasitari batandukanye bo mu bihugu bitandukanye ndetse n’abakunda indirimbo zo kuramya no guhimbaza Imana Israel Mbonyi akora, abo mu Rwanda no hanze yarwo.

Muri abo basitari harimo The Ben uherutse gukora ubukwe n’uwitwa Uwicyeza Pamela basezerana imbere y’Imana, Muyoboke Alex ukunda gufasha abahanzi bakizamuka, umuhanzi wo muri Tanzaniya Ommy Dimpoz, umubyinnyi Sherrie Silver, Massamba Intore;

Uncle Austin, Marina, Miss Cadette, Gaby Kamanzi, Yvan Ngenzi, umunyamakuru w’imikino kuri RBA, Reagan Rugaju, Dj Ira n’abandi. N’abo muri siporo ntibatanzwe, abo ni Kwizera Janvier Rihungu, Nsabimana Zidane Eric, Nshuti Dominic Savio na Mugenzi Bienvenu.

Abandi basanzwe bari mu ngeri zose, abasaza, abakecuru, abagabo, abagore, abasore, inkumi n’abana bo mu bihugu birimo u Rwanda, u Burundi n’ahandi. Abari muri BK Arena bose wabonaga buzuye umunezero, baririmbana na Israel Mbonyi indirimbo ku yindi.

Muri iki gitaramo cya Israel Mbonyi, indirimbo ze zakunzwe zaririmbwe, abantu barishima cyane. Izo ni Nina Siri, Baho, Hari Ubuzima, Number One n’izindi zabageze ku mutima.

Igitaramo cya Israel Mbonyi cyagenze neza cyane ku buryo abafana be bari kuvuga ko Imana yamwigaragarijemo cyane. Abo barimo nka Red Blue JD.

Israel Mbonyi amaze kuba ikirangirire muri Afurika. Muri uyu mwaka wa 2023, ni we muhanzi wa mbere mu Rwanda mu bahanzi b’ingeri zose wabashije gukora indirimbo ikarebwa cyane. Nina Siri imaze kurebwa n’abarenga miliyoni 27 ku rubuga rwa YouTube.

Israel Mbonyi yongeye kwandika amateka yuzuza BK Arena