Avuga ku ndirimbo "Turabakumbura", Eleda yagize ati: "Ubutumwa nashakaga gutanga mu ndirimbo yanjye nise "turabakumbura" ni uko mu by’ukuri n’ubwo abacu bagiye tukibakeneye tudakwiriye guheranwa n’ibihe ahubwo dukomeze kwibuka twiyubaka kuko ntacyo twakora ngo tugarure abo twabuze.

Yakomeje ati: "Iyi ndirimbo inyibutsa cyangwa iributsa buri wese wabuze abe ibihe yagiranye nabo bakiri bazima kuko ni ibihe byari byiza abana bagiteta ku babyeyi, kuri basekuru na banyirakuru, umuryango wuzuye kadi wishimye.

Mu gihe ku mbuga nkoramyambaga hakomeje kugaragara ubutumwa bw’abapfobya Jenoside yakorewe abatutsi muri Mata 1994 biganjemo abasize bakoze Jenoside yakorewe Abatutsi, Eleda yakebuye urubyiruko arusaba kutarangazwa n’abitwikira imbuga nkoranyambaga bakayobya ababyarwanda.

Yagize ati: "Ubutumwa nagenera urubyiruko rukiyobywa n’abakoze amahano nababwira nti musigeho kuyoba ejo mutisanga mwashubije igihugu mu mwijima, amateka arahari aranditse inzibutso zirahari yewe n’abasigaranye imihoro ku majosi barahari mbese ubuhamya bugenda burahari, nibasome bige kandi bamenye ko nta cyiza cy’amacakubiri."

Yanahumurije intwaza zabuze imiryango yabo yose mu mwaka wa 1994 bitewe na Jenoside yakorewe Abatutsi. Yagize ati: "Ubutumwa nagenera intwaza ni uko nababwira nti mukomere icumu ryarunamuwe muhobere ubuzima dufite Imana yita cyane kubantu bayo kandi dufite ubuyobozi bwiza bubitaho. Mwe guheranwa n’ibihe nk’uko indirimbo yanjye ibivuga ahubwo Twibuke Twiyubaka, mu ijuru tuzabona abacu twongere twishimane bihebuje, mukomere mutwaze."

Sanze Eleda yageneye abanyarwanda ubutumwa bw’ihumure

Nyuma yo kwikura mu gikombe cy’ubwigunge, uyu muramyi yiyemeje guhumuriza imitima y’abaheranywe n’ingaruka za Jenoside.

Sanze Eleda ni umwe mu baramyi bakunze gusohora indirimbo zifite ubutumwa bw’ihumure. Uyu muramyi azwi cyane mu ndirimbo nka: Irumva, Ibisharira, Komera ku masezerano n’izindi. Ni umwe mu bagizweho ingaruka zikomeye na Jenoside yakorewe Abatutsi muri Mata 1994 dore ko yamutwaye Papa we.

Avuga ku rwibutso rubi Jenoside yamusigiye, Eleda yagize ati: "Mu kwezi kwa Kane nzirikana ibihe bishaririye nanyuzemo, urusaku rw’abana barira batagira gihoza ndetse n’amasasu yanyuze hejuru yanjye, mu by’ukuri byari ibihe by’umwijima ntasobanura."

Sanze Eleda yavuze ko Jenoside yakorewe Abatutsi yahitanye benshi mu bari bagize umuryango we barimo abo kwa nyina wabo dore ko harokotse Mama we gusa mu gihe kwa se umubyara harokotse se wabo na nyirasenge umwe gusa mu gihe bari bafite umuryango mugari.

Sanze Eleda kuri ubu arajwe inshinga no kwiyubaka no kubaka igihugu aho yiyemeje kwifashisha impano ye nk’umuhanzi mu guhamagarira isi yose kwimakaza ubumwe n’ubwiyunge n’iterambere ry’igihugu.

Amakuru Paradise ifite avuga ko uyu muramyi yitegura gusohora izindi ndirimbo nyinshi.